Ecclesiastes 10

Mien Bible (Thai Script) © Thailand Bible Society, 2007

← Chapter 9 Jump to: Chapter 11 →

1มู์ง ไต่ โหฒว ปุน ดาง เญย โย่ว เหฒวย มี่ง. ติ๊ เตียน หฮงง เญย เจ๊า หย่า ไฮ่ โหฒว หว่าย ธง-เม่ง เหธา ฌัง-หล่าง.

2ธง-เม่ง เมี่ยน เญย เฮญี้ยว ต้อ นิ่น อ๋อย โหฒว หอบ. เมี่ยน หฮงง เมี่ยน เญย เฮญี้ยว ต้อ นิ่น มี่ง โหฒว ต่อง.

3เมี่ยน หฮงง เมี่ยน ยั่ง กัน เจี๊ยน เจ๊า มี่ง, นิ่น ไม้ จั๋ง หาย หญู่ง. นิ่น กั้น ฒู้ง ปุน หฒวัง เมี่ยน เฒียะ ตุ๊ นิ่น เซ เมี่ยน หฮงง เมี่ยน.

4สี ก๊อง กุ๊น เม่ย วั้ว เต้า เฉีย เจี์ย เม่ย, ไม้ ตู๋ง ธ้วด เม่ย เญย ต๋อง, เหว่ย หฒุ เฮญี้ยว เญี์ยน ตุ๊, ไฮ่ เถง ซิ้ม ฆอย, ไม้ เป๋น สี่ โฮล.

5เยีย ปวัด เยียม เสย หฒั่ง ม่าย เหยียด หญู่ง เอ๊าะ สี่, เซ เป๋น เหยียด หญู่ง ต่อง เญย สี่ เยียม โหฒว โฮล กุ๊น สี่ เมี่ยน ธ้วด ต้าย,

6เซ ตุ๊ เหลียบ เมี่ยน หฮงง เมี่ยน ฝาว ฮลัง เญย เหว่ย, ปุ๊ด-ฒ่อย เมี่ยน เฒว์ย ไอ๊ เญย เหว่ย.

7เยีย ปวัด โหฒว โน่ว เญย เมี่ยน เก้ ม์า, หย่า ปวัด โหฒว โฮล เญย เมี่ยน ยั่ง เจ๊า ฮนั้ง โน่ว นอ.

8หาย เต้า เว้ด ค้วด, เหฑีย นิ่น หฒุ ด๊อด ค้วด กะญั์ว. หาย เต้า เบ๊าะ ทง หลาด, เหฑีย นาง ไฮ่ เญาะ นิ่น.

9หาย เต้า หฒุ หละเปย๊ย, เหฑีย หละเปย๊ย ไฮ่ ห่อย นิ่น มุน. หาย เต้า พิ เดี๋ยง-ด้ง, เหฑีย หฒุ เดี๋ยง ห่อย นิ่น.

10สี ก๊อง โป๊ว ด๊อง มี่ง, เมี่ยน หย่า ไม้ เหฑียว ไหล่, นิ่น อ๋อย หฒุ หล่ง ชะ ธั้ม. มป่า ธง-เม่ง ไฮ่ เถง เมี่ยน โหฒว ตุ๊ ธ้วด.

11ไม้ แก้ง โหฒว ฟ้าด ปุน นาง ฯฒฯ หฒุ นาง เญาะ ด่าง, ฆะฮ้า โหฒว ฟ้าด ปุน นาง เญย เมี่ยน ไม้ ตุ๊ หาย หญู่ง อ๊ะ.

12ธง-เม่ง เมี่ยน เญย ฑุ่ย ก๊อง ธ้วด ม่าย เอน-ฒี่ง เญย หว่า, มป่า เมี่ยน หฮงง เมี่ยน เญย ฑุ่ย ไฮ่ เหมียด กั้น.

13เมี่ยน หฮงง เมี่ยน เญย ฑุ่ย เจี์ย กอน ก๊อง เป๋น หฮงง เญย หว่า, เซ้ด เมว์ย หว่า เป๋น เอ๊าะ เญย ปู๊ ล่ง ปู๊ ตั๊ง หว่า.

14เมี่ยน หฮงง เมี่ยน ก๊อง หว่า ธั้ม. ไม้ ม่าย เมี่ยน ฮิ้ว ตุ๊ อ๋อย ม่าย หาย หญู่ง สี่ ธ้วด, ไม้ ม่าย หาย เต้า ไฮ่ บั๋ว นิ่น, นิ่น ไต่ มี่ง ฆะฮ้า ม่าย หาย หญู่ง สี่.

15เมี่ยน หฮงง เมี่ยน ล่าว หลุ่ย ปุน กั้น โค้ว, นิ่น ฒู้ง ล์อ ไม้ ปวัด เจ๊า เปียะ ฒี่ง.

16โอ เต่ย-ปูง อ่า, สี ก๊อง เม่ย เญย ฮู่ง เป๋น หฮญัง-เจ๊ย หลุน เญย เมี่ยน, เม่ย เญย เจียน ลู่ง ดอม เบ่น หญั่น เบ่น ฮบ โหฒว เหน่า หญิด, เม่ย หฒุ โค้ว อ๊ะ.

17โอ เต่ย-ปูง อ่า, สี ก๊อง เม่ย เญย ฮู่ง เตี๋ย เป๋น โหฒว โฮล เญย เมี่ยน เญย ตอน, เม่ย เญย เจียน หย่า หฒิว หอบ เญย เฒี่ยง โห่ เบ่น หฮนาง, หย่า หญั่น เหว่ย ตุ๊ ชะ, ไม้ เฒ์ย เหว่ย ฮบ ติ๊ว ฆวิน, เม่ย ฯฒฯ ม่าย ออน-เหลาะ.

18หลาย เมี่ยน เหลว่ย, เปย๊า-ง่อ ปยบ เหฌี่ย, หลาย ปั์ว เหลว่ย, เปย๊า เดี๊ยบ บยู่ง.

19เบ่น หฮนาง โฮล เญย เซ เหว่ย ปุน เมี่ยน โหฒว จอม, จั๊ด, อะหงุ่น ติ๊ว ปุน เมี่ยน เญย แหม่ง เฌียน-โย่ว. ญ่าน หย่า ไฮ่ ปุน เมี่ยน โหฒว ตุ๊ หญู่งๆ.

20ไม้ ตู๋ง เหฒียว ฮู่ง เตี๋ย เลี่ยม ไม้ ตู๋ง เยียม เฮญี้ยว เหฒียว, หย่า ไม้ ตู๋ง เยียม เกน เหฒียว ปุ๊ด-ฒ่อย เมี่ยน. เหฑีย ด๊าม-ลู่ง เญย เหนาะ ไฮ่ ดาม เม่ย เญย หว่า มี่ง, ม่าย ด๊าด เญย กะน้าย ไฮ่ ฒุ่น เม่ย ก๊อง เญย หว่า.

← Chapter 9 Jump to: Chapter 11 →