John 10

Mien Bible (Thai Script) © Thailand Bible Society, 2007

1เยซู ก๊อง, “เยีย ก๊อง เฒียน บั๋ว เม่ย บัว, หาย เต้า เปียะ ปะกี ยู่ง หลาด, ไม้ ยั่ง หลาด แก้ง เปียะ, ขูง ญอง ยั่ง กั้น นอม ต๋อง เปียะ, นิ่น โหฒว จั๋น-หฒะ หนิ่ม ยู่ง, ธ้าง ยู่ง ฮนั้ง.

2มป่า ยั่ง แก้ง เปียะ วั้ว เต้า เซ โก๋ว ปะกี ยู่ง เญย เมี่ยน.

3ฒั้ว แก้ง เญย เมี่ยน เถง นิ่น คอย แก้ง. ปะกี ยู่ง หย่า หมวัง นิ่น เญย เฉีย. นิ่น เอย เต้าๆ ปะกี ยู่ง เญย บั๋ว หฒยาว, ฯฒฯ ต้อ นิ่น บัว ธ้วด หลาด มี่ง.

4ปู๋ง นิ่น กั้น เญย ปะกี ยู่ง ธ้วด เหฑ่ง ต้าย, นิ่น มี่ง ด่าง. ปะกี ยู่ง หย่า กัน เจี๊ยน นิ่น มี่ง เหว่ย หฒุ นิ่น บัว เฒียะ ตุ๊ นิ่น เญย เฉีย.

5กั้น เต้า เมี่ยน ยู่ง ไม้ กัน. ขูง อ๋อย เปย๋า ฮนั้ง, เหว่ย หฒุ เฒียะ ไม้ ตุ๊ นิ่น เญย เฉีย.”

6เยซู ก๊อง น้าย ติ้ว หว่า-เป๊ย บั๋ว นิ่น บัว มป่า นิ่น บัว ไม้ เม่ง แปะ เอ๋ย เล์ย.

7เยซู ฯฒฯ แอ๋ง ก๊อง บั๋ว นิ่น บัว, “เยีย ก๊อง เฒียน บั๋ว เม่ย บัว, เยีย เซ น้าย เต๋ย ปะกี ยู่ง เญย หลาด แก้ง.

8ต้าย ด่าง เยีย วั้ว เต๋ย เหยียด ฒู้ง โหฒว จั๋น-หฒะ หนิ่ม ยู่ง, ธ้าง ยู่ง ฮนั้ง. มป่า ปะกี ยู่ง ไม้ หมวัง นิ่น บัว.

9เยีย เซ หลาด แก้ง. หาย เต้า ยั่ง เยีย น้าย เต้า แก้ง เปียะ อ๋อย ตุ๊ เหฌียว หย่า เปียะๆ ธ้วดๆ ล์อ หญั่น.

10จั๋น-หฒะ ต้าย ขูง อ๋อย หนิ่ม, อ๋อย ไต๋, อ๋อย เหมียด, มป่า เยีย ต้าย เหว่ย ปุน ป้าม เมี่ยน ตุ๊ เฒี่ยง แหม่ง, ฒู้ง อ๋อย ปุน นิ่น บัว ตุ๊ ตุ้น ยุ่น เญย แหม่ง.

11“เยีย เซ โก๋ว ปะกี ยู่ง หลง เญย เฒี้ยว. โก๋ว ปะกี ยู่ง หลง วั้ว เต้า หญุ่น เหว่ย ปะกี ยู่ง เซี้ย นิ่น เญย แหม่ง.

12ธี้ง ต้าย เญย กง-เมี่ยน ไม้ เฒ์ย เฒียน โก๋ว ปะกี ยู่ง เญย เฒี้ยว. ปะกี ยู่ง หย่า ไม้ เฒ์ย นิ่น กั้น เญย. ปวัด เฮยี่ย จู๊ ต้าย ฯฒฯ กวั่ง เจี๊ยน เปย๋า. เฮยี่ย จู๊ ฯฒฯ เป๊ด, แฮะ ปะกี ยู่ง กวั้น เปย๋า หฑาน เหฑ่ง.

13ธี้ง ต้าย เญย กง-เมี่ยน เปย๋า หมี่ อ๊ะ, เหว่ย หฒุ เมี่ยน ธี้ง นิ่น ฮนั้ง, นิ่น ไม้ เฑ่า ยู่ง.

14“เยีย เซ โก๋ว ปะกี ยู่ง หลง เญย เฒี้ยว. เยีย ฮิ้ว ตุ๊ เยีย เญย ปะกี ยู่ง, เยีย เญย ปะกี ยู่ง หย่า ฮิ้ว ตุ๊ เยีย,

15ฮนั้ง หฒั่ง เตี๋ย ฮิ้ว ตุ๊ เยีย, เยีย หย่า ฮิ้ว ตุ๊ หฒั่ง เตี๋ย. เยีย หย่า เหว่ย น้าย เต๋ย ยู่ง เซี้ย เยีย เญย แหม่ง.

16เยีย แอ๋ง กั้น ม่าย ปะกี ยู่ง, เซ ไม้ เฒ์ย เยียม น้าย นอม หลาด เญย ปะกี ยู่ง. เยีย อ๋อย หฒุ ต้อ นิ่น บัว ต้าย. นิ่น บัว ฯฒฯ หมวัง เยีย เญย เฉีย, หย่า เหธา น้าย เต๋ย เป๋น เหยียด กวั้น, ม่าย เหยียด เต้า เฒี้ยว โก๋ว นิ่น บัว ฮนั้ง.

17“หฒั่ง เตี๋ย ฮนั้ม เยีย เหว่ย หฒุ เยีย เซี้ย เยีย กั้น เญย แหม่ง ไต่. เยีย เซี้ย เยีย เญย แหม่ง เหว่ย แอ๋ง ตุ๊ แหม่ง หฑวน.

18ไม้ ม่าย หาย เต้า เฒาะ เยีย เญย แหม่ง, เยีย กั้น เซี้ย เยีย เญย แหม่ง. เยีย ม่าย เล์ย เซี้ย เยีย เญย แหม่ง หย่า ม่าย เล์ย แอ๋ง ตุ๊ เยีย เญย แหม่ง หฑวน. เยีย เญย เตีย พ้าย เยีย ฮนั้ง น้าย นอ โหฒว.”

19หลาย น้าย เต๋ย หว่า ยิวไท เมี่ยน แอ๋ง ปุน ฆอย หมี่ อ๊ะ.

20ม่าย ธั้ม เญย ก๊อง, “นิ่น หฒุ เมี้ยน มัวะ. นิ่น ปุ๊ด ดิน หมี่ อ๊ะ. หมวัง นิ่น เญย หว่า โหฒว หาย หญู่ง แล่!”

21มป่า ม่าย เต๋ย ก๊อง, “หาย เต้า หฒุ เมี้ยน มัวะ ไม้ ไฮ่ ก๊อง น้าย หญู่ง หว่า เหลาะ. เมี้ยน ไฮ่ ปุน มฒีง แม่ง เญย เมี่ยน หมั่ง ตุ๊ ปวัด เญย?”

22วั้ว หฒั่น เยียม เยลูซาเลม ฒี่ง เจี๋ย โห่ว หฒั่ง ทิน-ฮู่ง เญย เปย๊า เญย ฒิบ เซ ตง-เกน ฮนอย.

23เยซู เยียม หฒั่ง ทิน-ฮู่ง เญย เปย๊า, ซาโลมอน เญย ปี๋ง ล่าง ต๋อง, เจี๋ย มี่ง เจี๋ย ต้าย เญย.

24ยิวไท เมี่ยน ต้าย กั๊บ ฒุ้น นิ่น วั้ว หย่า หน่าย, “เม่ย อ๋อย ปุน เยีย บัว เฮญี้ยว หลุ่น เถา หาย หฒั่น? สี ก๊อง เม่ย หฒะเก้ง กีตู่, บั๋ว หฒะ เยีย บัว ม่าะ!”

25เยซู เตา, “เยีย บั๋ว เจี๋ย เม่ย บัว, เม่ย บัว หย่า ไม้ เสียน นี! เยีย เต๊ง เยีย เญย เตีย เญย บั๋ว โหฒว บัวะ ฮ่อง เญย สี่. วั้ว เต๋ย สี่ เถง เยีย โหฒว ฒอง-เหฒง.

26มป่า เม่ย บัว ไม้ เสียน เหว่ย หฒุ เม่ย บัว ไม้ เฒ์ย เยีย เญย ปะกี ยู่ง.

27เยีย เญย ปะกี ยู่ง หมวัง เยีย เญย เฉีย. เยีย หย่า ฮิ้ว ตุ๊ นิ่น บัว, นิ่น บัว หย่า กัน เจี๊ยน เยีย มี่ง.

28เยีย ปุน นิ่น บัว ม่าย เหยียด ลิ์ว เญย แหม่ง, เหยียด ลิ์ว ไม้ หฒุ ไต่. นิ่น บัว เยียม เยีย เญย ปั์ว, ไม้ ม่าย หาย เต้า ไฮ่ ธ้าง ตุ๊ ธ้วด.

29เยีย เญย เตีย เฒาะ นิ่น บัว จิว ปุน เยีย. เตีย หย่า เก้า โฮล เจี๋ย หม่าน หมวด. นิ่น บัว เยียม เยีย เญย เตีย เญย ปั์ว, ไม้ ม่าย หาย เต้า ไฮ่ ธ้าง ตุ๊ ธ้วด.

30เยีย เหธา เยีย เญย เตีย เป๋น เหยียด เต้า ฮนั้ง.”

31ยิวไท เมี่ยน แอ๋ง เฒาะ หละเปย๊ย อ๋อย ฒง เยซู ไห่ อ๊ะ.

32เยซู บั๋ว นิ่น บัว, “เยีย เอย เยีย เญย เตีย พ้าย เยีย โหฒว คู้ สี่ ธั้ม เญย ปุน เม่ย บัว ปวัด. หลาย หาย หฑุ่น คู้ สี่ เม่ย บัว เฒาะ หละเปย๊ย อ๋อย ฒง เยีย ไต่?”

33นิ่น บัว เตา, “เยีย บัว ไม้ เฒ์ย หลาย เม่ย โหฒว เญย คู้ สี่ อ๋อย ฒง เม่ย, เซ หลาย เม่ย คี ทิน-ฮู่ง. เม่ย เซ ป้าม เมี่ยน ฮนั้ง มป่า เธง เม่ย กั้น โหฒว ทิน-ฮู่ง.”

34เยซู เตา, “เม่ย บัว กั้น เญย เล์ย-หลัด เฟี้ย เจี๊ยน ก๊อง น้าย โจ๋ว หว่า ไม้ เฒ์ย? ‘เยีย ก๊อง, เม่ย บัว เซ เฒี่ยน.’

35บัว ฮิ้ว ตุ๊ กีง-โซว เญย หว่า เหยียด ลิ์ว ไม้ ไฮ่ ก๊อย เหยี่ยน. สี ก๊อง ฒิบ ทิน-ฮู่ง เญย หว่า วั้ว เต๋ย เมี่ยน ทิน-ฮู่ง เห่ว เฒี่ยน นอ,

36วั้ว หญู่ง, หฒั่ง เตี๋ย กิ๊น ต้าย พ้าย เหฌี่ย ป้าม เกน วั้ว เต้า นี? เยีย ก๊อง เยีย โหฒว ทิน-ฮู่ง เญย ตอน, เม่ย บัว เหว่ย หาย ติ่ว ก๊อง เยีย คี ทิน-ฮู่ง?

37สี ก๊อง เยีย ไม้ เอย เยีย เญย เตีย เญย หฒะเอ๋ย โหฒว นอ, ไม้ ตู๋ง เสียน เยีย.

38มป่า สี ก๊อง เยีย เอย เจี๊ยน โหฒว, ไม้ กุ๊น เม่ย บัว ไม้ เสียน เยีย, เม่ย บัว หธ่อ อ๋อย หฒุ เสียน เยีย โหฒว เญย สี่. เม่ย บัว ฯฒฯ ไฮ่ ฮิ้ว ตุ๊ หฒั่ง เตี๋ย เยียม เยีย กะญั์ว. เยีย หย่า เยียม หฒั่ง เตี๋ย กะญั์ว.”

39วั้ว เต๋ย เมี่ยน แอ๋ง อ๋อย เฒาะ เยซู, มป่า เยซู เยียม นิ่น บัว เญย ปั์ว-เดี๊ย เปย๋า ธ้วด หมี่ อ๊ะ.

40เยซู แอ๋ง หฑวน วั้ว หง่าน หฒิ จอแดน ด้าย, ต้ง ฒิ่น ด่าง โยฮัน เถง เมี่ยน เจี๋ย ววม เญย เล์ย วั้ว นอม ต๋อง, เยียม หธาม วั้ว.

41ม่าย เมี่ยน ธั้ม เญย ต้าย ล์อ นิ่น. นิ่น บัว ก๊อง, “โยฮัน ไม้ โหฒว เจี๋ย หาย หญู่ง บัวะ ฮ่อง เญย จั๋ง-โห่. มป่า โยฮัน ก๊อง หาย หญู่ง เถา น้าย ล่าน เมี่ยน เหยียด ฒู้ง เซ เฒียน เญย.”

42เยียม วั้ว ม่าย เมี่ยน ธั้ม เญย ฯฒฯ เสียน เยซู.

← Chapter 9 Jump to: Chapter 11 →