John 2

Mien Bible (Thai Script) © Thailand Bible Society, 2007

← Chapter 1 Jump to: Chapter 3 →

1ตะฟาม ฮนอย เยียม กาลิลี เต่ย-ปูง, คานา ล์าง, ม่าย นอม ธีง-จา-ยิ่น. เยซู เญย มา หย่า เยียม วั้ว เญย.

2เมี่ยน หย่า ธี้ง เยซู เหธา นิ่น เญย ไซ-ก๋อ บัว มี่ง วั้ว นอม ยิ่น.

3โหฒว เกา, อะหงุ่น ติ๊ว เหฑ่ง หมี่ อ๊ะ. เยซู เญย มา ก๊อง บั๋ว เยซู, “นิ่น บัว เญย อะหงุ่น ติ๊ว เหฑ่ง หมี่ อ๊ะ.”

4เยซู เตา, “อา มา อ้า! เหว่ย หาย ติ่ว ปุน น้าย เต๋ย เจ๊า ผาน เถา เยีย? เยีย เญย เฒี่ยง โห่ ไม้ แก้ง เถา.”

5เยซู เญย มา ก๊อง บั๋ว วั้ว เต๋ย โปว, “นิ่น บั๋ว เม่ย บัว โหฒว หาย หญู่ง, อ๋อย หฒุ เอย เจี๊ยน โหฒว โอ่.”

6ยิวไท เมี่ยน เอย เจี๊ยน เล์ย หฑาว ปั์ว-เหฒา เญย หวุย. เหว่ย น้าย, เยียม วั้ว นอม ยิ่น ม่าย จุ๊ นอม หละเปย๊ย-อ๋ง, เหยียด นอม ตั๊บ ตุ๊ ปยา จุ๊ ท้ง ววม.

7เยซู บั๋ว วั้ว เต๋ย โปว, “ดั๊ม ววม ตั๊บ ปวั๊ง วั้ว เต๋ย อ๋ง ม่าะ!” นิ่น บัว ฯฒฯ ดั๊ม ววม ตั๊บ ปวั๊ง เถา แป้ง อ๋ง-ฑุ่ย.

8เยซู แอ๋ง บั๋ว นิ่น บัว, “อี้ หฒั่น ดั๊ม เต๋ย น้าย อ๋ง เญย ววม ต้อ มี่ง ปุน ธีง-ซุ้ย โอ่.” นิ่น บัว ฯฒฯ ดั๊ม ต้อ มี่ง.

9ธีง-ซุ้ย เสย น้าย เต๋ย ววม เป๋น ต้าย เญย อะหงุ่น ติ๊ว. นิ่น ไม้ ฮิ้ว ตุ๊ น้าย เต๋ย ติ๊ว เยียม หาย ต้าย, (มป่า ดั๊ม ววม วั้ว เต๋ย โปว ฮิ้ว เญย.) นิ่น ฯฒฯ เห่ว เซียง-ล่าง ต้าย

10ก๊อง บั๋ว นิ่น, “เหยียด เกา เมี่ยน ธี้ง แคะ นิ่น บัว ปุน ติ๊ว-คู้ ฮบ ด่าง. ฒั้ว เมี่ยน ฮบ ธั้ม หธีง ปุน ไม้ คู้ เญย ติ๊ว. มป่า เม่ย เลี่ยว คู้ วั้ว หญู่ง เถา อี้ หฒั่น.”

11เยซู โหฒว ธ้วด น้าย ต้าว หฑุ่น บัวะ ฮ่อง เญย จั๋ง-โห่, เยียม กาลิลี แซ้ง, คานา ล์าง โหฒว. นิ่น ฮนั้ง น้าย โหฒว ปิ๋ว เม่ง นิ่น เญย ฌัง-หล่าง. นิ่น เญย ไซ-ก๋อ บัว หย่า เสียน เขา นิ่น.

12ฆะฮ้า เยซู เหธา นิ่น เญย มา, นิ่น เญย โย์ว บัว, เหธา นิ่น เญย ไซ-ก๋อ บัว มี่ง คาเปนาอุม มู้ง เยียม อี เหฒีย ฮนอย วั้ว.

13วั้ว หฒั่น อ๊า ลั่ม เถา เสีย แหม่ง ฒิบ. เยซู ฯฒฯ มี่ง เยลูซาเลม ฒี่ง.

14เยียม หฒั่ง ทิน-ฮู่ง เญย เปย๊า นิ่น ปวัด เมี่ยน หม่าย ง่ง, หม่าย ยู่ง, หม่าย แปะ ก๊บ, หย่า ม่าย เมี่ยน เฒว์ย เจี๊ยน ทิ้ว ญ่าน.

15เยซู ฯฒฯ หล่ง ฮลาง กิ๊ด ติ้ว ฮลาง-ปิน ต้าย หฒุ่น เหยียด ฒู้ง, เลี่ยม ง่ง, เลี่ยม ยู่ง, ธ้วด หฒั่ง ทิน-ฮู่ง เญย เปย๊า หย่า ปู๋ง คีง ทิ้ว ญ่าน เญย เตี้ย, โต๋ กวั่ง เหฑ่ง นิ่น บัว เญย ญ่าน.

16นิ่น หย่า บั๋ว หม่าย แปะ ก๊บ วั้ว เต๋ย เมี่ยน, “เปี้ยน เม่ย บัว เญย เหนาะ ธ้วด มี่ง ม่าะ! ไม้ ตู๋ง หล่ง เยีย เญย เตีย เญย เปย๊า โหฒว เฮย.”

17ไซ-ก๋อ บัว ฯฒฯ จั๋ง หฒุ กีง-โซว เฟี้ย เจี๊ยน ก๊อง, “โอ ทิน-ฮู่ง อ้า! เยีย เหว่ย เม่ย เญย เปย๊า จอม เฮญี้ยว, ฮนั้ง โต์ว เหฒียะ เจี๊ยน เยีย นอ.”

18โหฒว โฮล เญย ยิวไท เมี่ยน หน่าย นิ่น, “เม่ย อ๋อย โหฒว หาย หญู่ง จั๋ง-โห่ ปุน เยีย บัว หมั่ง, ปุน ธีง เม่ย ม่าย เล์ย ฮนั้ง น้าย นอ โหฒว?”

19เยซู เตา, “แธะ น้าย นอม หฒั่ง ทิน-ฮู่ง เญย เปย๊า ม่าะ! ปัว ฮนอย กะญั์ว เยีย แอ๋ง เหธย เจี์ย ต้าย.”

20นิ่น บัว หน่าย, “ปัว ฮนอย เม่ย ไฮ่ โหฒว ตุ๊ เหฒียง เญย? น้าย นอม หฒั่ง ทิน-ฮู่ง เญย เปย๊า โหฒว เฝย เหฒียบ หลัวะ หฮญัง หธีง ต้าย เหฒียง.”

21เยซู ก๊อง หฒั่ง ทิน-ฮู่ง เญย เปย๊า มป่า หฒะเก้ง ก๊อง เป๊ย นิ่น กั้น เญย ซิน.

22ฆะฮ้า เยซู ไต่ มี่ง แอ๋ง นั่ง ต้าย, นิ่น เญย ไซ-ก๋อ บัว จั๋ง หฒุ นิ่น ก๊อง น้าย โจ๋ว หว่า ฯฒฯ เสียน กีง-โซว หย่า เสียน เยซู ก๊อง เญย หว่า.

23เยซู เยียม เยลูซาเลม ฒี่ง เจี๋ย เสีย แหม่ง ฒิบ. ม่าย เมี่ยน ธั้ม เญย เสียน เขา นิ่น เหว่ย หฒุ นิ่น บัว ปวัด นิ่น โหฒว บัวะ ฮ่อง เญย จั๋ง-โห่.

24มป่า เยซู ไม้ ปู๋ง เฮญี้ยว นิ่น บัว เหว่ย หฒุ นิ่น ฮิ้ว ตุ๊ หม่าน เมี่ยน.

25เยซู ไม้ เฉียม หฒุ หาย เต้า บั๋ว นิ่น ป้าม เมี่ยน ฮนั้ง หาย นอ, เหว่ย หฒุ นิ่น กั้น ฮิ้ว ตุ๊ เมี่ยน เญย เฮญี้ยว.

← Chapter 1 Jump to: Chapter 3 →