John 15

Mien Bible (Thai Script) © Thailand Bible Society, 2007

← Chapter 14 Jump to: Chapter 16 →

1“เยีย เซ เฒียน อะหงุ่น เฮมย. เยีย เญย เตีย โหฒว โก๋ว หฮวีง วั้ว เต้า.

2หาย ติ้ว ฆว่า เฒี่ยง เจี๊ยน เยีย หย่า ไม้ เฒี่ยง เปี๊ยว นอ, นิ่น พิด กวั่ง. หาย ติ้ว ฆว่า เฒี่ยง เปี๊ยว, นิ่น แอ๋ง ต๊า ฆอย เตว๊ย ปุน เฒี่ยง เปี๊ยว เก้า กิ๊ด.

3เยีย หฌาว เญย หว่า เซ ฮนั้ง ต๊า เฮมย-ฆว่า เตว๊ย นอ, หลิ่ว เล์ย เม่ย บัว เญย เฮญี้ยว.

4เม่ย บัว อ๋อย หฒุ เฒี่ยง เจี๊ยน เยีย, เยีย ฯฒฯ เฒี่ยง เจี๊ยน เม่ย บัว. เฮมย-ฆว่า ไม้ เฒี่ยง เฮมย-หม่า, ฆว่า ไม้ ไฮ่ เฒี่ยง เปี๊ยว. เม่ย บัว หย่า ฟี่ ฮนั้ง เญย. สี ก๊อง ไม้ เฒี่ยง เจี๊ยน เยีย นอ, เม่ย บัว ไม้ ไฮ่ เฒี่ยง เปี๊ยว.

5“เยีย เซ อะหงุ่น เฮมย. เม่ย บัว เซ อะหงุ่น ฆว่า. หาย เต้า เฒี่ยง เจี๊ยน เยีย, เยีย หย่า เฒี่ยง เจี๊ยน นิ่น, วั้ว เต้า ฯฒฯ เฒี่ยง เปี๊ยว กิ๊ด อ๊ะ. เม่ย บัว เล่ย ฆอย เยีย นอ, เม่ย บัว ไม้ ไฮ่ โหฒว หาย หญู่ง.

6หาย เต้า ไม้ เฒี่ยง เจี๊ยน เยีย, ฯฒฯ ฮนั้ง ติ้ว เฮมย-ฆว่า หฒุ พิด กวั่ง, ฆาย มี่ง หย่า หฒุ เฑ์า ต้าย ตั๊บ โต์ว-เหฑ่า ปั๊ว กวั่ง มี่ง.

7สี ก๊อง เม่ย บัว เฒี่ยง เจี๊ยน เยีย, เยีย เญย หว่า หย่า เฒี่ยง เจี๊ยน เม่ย บัว, เม่ย บัว โท้ หาย หญู่ง เม่ย บัว ฯฒฯ ตุ๊ วั้ว หญู่ง อ๊ะ.

8สี ก๊อง เม่ย บัว เฒี่ยง เปี๊ยว กิ๊ด, เม่ย บัว ฯฒฯ ปุน เมี่ยน ท่าย เยีย เญย เตีย. ฮนั้ง หน่าย เม่ย บัว ฯฒฯ เป๋น เยีย เญย ไซ-ก๋อ.

9“หฒั่ง เตี๋ย ฮนั้ง หาย นอ ฮนั้ม เยีย, เยีย หย่า ฮนั้ง วั้ว นอ ฮนั้ม เม่ย บัว. เม่ย บัว อ๋อย หฒุ เขา ว้วน เยีย ฮนั้ม เมี่ยน เญย เฮญี้ยว.

10สี ก๊อง เม่ย บัว เอย เจี๊ยน เยีย เญย หลี่ง โหฒว, เยีย ฯฒฯ หฒั่นๆ ฮนั้ม เม่ย บัว, ฮนั้ง เยีย เอย เจี๊ยน เยีย เญย เตีย เญย หลี่ง โหฒว, นิ่น ฯฒฯ หฒั่นๆ ฮนั้ม เยีย.

11“น้าย เต๋ย หว่า เยีย บั๋ว เม่ย บัว, ปุน เม่ย บัว ไฮ่ ตุ๊ เยีย เญย เฌียน-โย่ว, หย่า เฌียน-โย่ว เถา ต้าว.

12เยีย เญย หลี่ง เซ ฮนั้ง น้าย, ล่าน อ๋อย หฒุ ฮนั้ม ล่าน ฮนั้ง เยีย ฮนั้ม เม่ย บัว วั้ว นอ.

13ไม้ ม่าย หาย เต้า ไฮ่ ฮนั้ม นิ่น เญย ก๋อ-โย์ว เก้า ธั้ม เจี๋ย น้าย. เซ เมี่ยน เหว่ย นิ่น เญย ก๋อ-โย์ว เซี้ย แหม่ง ไต่.

14สี ก๊อง เม่ย บัว เอย เจี๊ยน เยีย บั๋ว เญย หว่า โหฒว, เม่ย บัว ฯฒฯ โหฒว เยีย เญย ก๋อ-โย์ว อ๊ะ.

15ยั่ง น้าย เจี๋ย, เยีย ไม้ เห่ว เม่ย บัว โหฒว โปว, เหว่ย หฒุ โปว ไม้ ฮิ้ว ตุ๊ นิ่น เญย เฒี้ยว โหฒว หาย หญู่ง. อี้ หฒั่น เยีย เห่ว เม่ย บัว โหฒว เยีย เญย ก๋อ-โย์ว เหว่ย หฒุ เยีย เญย เตีย บั๋ว หาย หญู่ง เยีย, เยีย บั๋ว เหฑ่ง เม่ย บัว หมี่ อ๊ะ.

16ไม้ เฒ์ย เม่ย บัว กิ๊น เยีย, เซ เยีย กิ๊น เม่ย บัว. เยีย พ้าย เม่ย บัว ธ้วด มี่ง เฒี่ยง เปี๊ยว ธั้ม, ต้ง เหยียด ลิ์ว ไม้ ไฮ่ หว่าย เญย เปี๊ยว. ฮนั้ง หน่าย เม่ย บัว เต๊ง เยีย เญย บั๋ว เถง หฒั่ง เตี๋ย โท้ หาย หญู่ง, นิ่น ฯฒฯ เหธย วั้ว หญู่ง ปุน เม่ย บัว.

17น้าย เซ เยีย เญย หลี่ง, ล่าน อ๋อย หฒุ ฮนั้ม ล่าน.

18“สี ก๊อง ป้าม เมี่ยน ฑอง เม่ย บัว, เม่ย บัว อ๋อย หฒุ จั๋ง เจี๊ยน นิ่น บัว ฑอง เยีย ด่าง.

19สี ก๊อง เม่ย บัว เกวย ป้าม เกน, ป้าม เมี่ยน อ๋อย ฮนั้ม เม่ย บัว ฮนั้ง ฮนั้ม เหธา นิ่น บัว เกวย ป้าม เกน วั้ว เต๋ย. มป่า เม่ย บัว ไม้ เกวย ป้าม เกน. เยีย กิ๊น เม่ย บัว ธ้วด ต้าย. เหว่ย น้าย ป้าม เมี่ยน ฑอง เม่ย บัว.

20เม่ย บัว อ๋อย หฒุ จั๋ง เจี๊ยน เยีย บั๋ว เจี๋ย เม่ย บัว น้าย เต๋ย หว่า, ‘โปว ไม้ เก้า โฮล เฒี้ยว.’ สี ก๊อง เมี่ยน โหฒว โตะ ปุน เยีย, นิ่น บัว หย่า อ๋อย โหฒว โตะ ปุน เม่ย บัว. สี ก๊อง นิ่น บัว เอย เจี๊ยน เยีย เญย หว่า, นิ่น บัว ฯฒฯ เอย เจี๊ยน เม่ย บัว เญย หว่า.

21เหว่ย เม่ย บัว โหฒว เยีย เญย เมี่ยน, นิ่น บัว อ๋อย โหฒว น้าย เต๋ย เหยียด ฒู้ง สี่ ปุน เม่ย บัว, หลาย นิ่น บัว ไม้ ฮิ้ว ตุ๊ พ้าย เยีย ต้าย วั้ว เต้า.

22“สี ก๊อง เยีย ไม้ ต้าย หฌาว เจี๋ย นิ่น บัว, นิ่น บัว ไม้ ม่าย ฒุ์ย. มป่า อี้ หฒั่น, นิ่น บัว ไม้ ม่าย ต๋อง ไจ๊ ฒุ์ย อ๊ะ.

23หาย เต้า ฑอง เยีย, หย่า ฑอง เยีย เญย เตีย.

24สี ก๊อง เยีย ไม้ ต้าย เยียม นิ่น บัว บุด๋ง โหฒว เมี่ยน ไม้ แก้ง โหฒว เจี๋ย เญย สี่ นอ, นิ่น บัว ฯฒฯ ไม้ ม่าย ฒุ์ย. มป่า อี้ หฒั่น นิ่น บัว ตุ๊ ปวัด ลิ์ว เยีย โหฒว เญย สี่, นิ่น บัว หธ่อ ฑอง เยีย, หย่า ฑอง เยีย เญย เตีย.

25น้าย เต๋ย สี่ ธ้วด ต้าย เหว่ย ปุน ต๋อย เหฑ่ง เฟี้ย เจี๊ยน นิ่น บัว เญย เล์ย-หลัด น้าย เต๋ย หว่า, ‘นิ่น บัว ฑอง เยีย หย่า ไม้ ม่าย กอน-แป๋ง.’

26“เยีย อ๋อย พ้าย เถง เมี่ยน วั้ว เต้า ต้าย ล์อ เม่ย บัว. นิ่น เยียม หฒั่ง เตี๋ย วั้ว ต้าย, ต้ง นิ่น ปุน เมี่ยน ฮิ้ว ตุ๊ เฒียน เล์ย วั้ว เต้า สีง ลี่ง. นิ่น ต้าย ฯฒฯ เถง เยีย โหฒว ฒอง-เหฒง.

27เม่ย บัว หย่า อ๋อย หฒุ เถง เยีย โหฒว ฒอง-เหฒง เหว่ย หฒุ เยียม กอน เถา อี้ หฒั่น เม่ย บัว เหธา เยีย เยียม.

← Chapter 14 Jump to: Chapter 16 →