John 18

Mien Bible (Thai Script) © Thailand Bible Society, 2007

1เยซู ฮนั้ง น้าย นอ เต๋า เก๋า ลิ์ว, นิ่น เหธา นิ่น เญย ไซ-ก๋อ เจี๋ย วั้ว หง่าน หฒิ ขิดโลน โด๊ะ. เยียม วั้ว ม่าย นอม หฮวีง. เยซู เหธา นิ่น เญย ไซ-ก๋อ ฯฒฯ เปียะ วั้ว นอม หฮวีง หมี่ อ๊ะ.

2อ๋อย หม่าย เยซู วั้ว เต้า ยูดาด หย่า ฮิ้ว ตุ๊ วั้ว นอม ต๋อง, เหว่ย หฒุ เยซู เหธา นิ่น เญย ไซ-ก๋อ หฒั่นๆ กั๊บ ฒุ้น วั้ว.

3ยูดาด ฯฒฯ ต้อ เต๋ย โลมา แปง เหธา ไซ เมี่ยน เปย๊ย เหธา ฟาลิสี เมี่ยน พ้าย ต้าย โก๋ว หฒั่ง ทิน-ฮู่ง เญย เปย๊า วั้ว เต๋ย แปง มี่ง วั้ว หฮวีง. น้าย เต๋ย แปง เหฮนง เจี๊ยน ตัง, นั้น เจี๊ยน โต์ว-ป๊า, ต้อ เจี๊ยน หวัวะ กิ่น มี่ง.

4เยซู ฮิ้ว ตุ๊ นิ่น กั้น อ๋อย หฒุ ปวั้ง เญย หญู่งๆ สี่ ฯฒฯ ธ้วด ต้าย หน่าย ก๋า นิ่น บัว, “เม่ย บัว ต้าย ล์อ หาย เต้า?”

5นิ่น บัว เตา, “เยีย บัว ล์อ นาซาเล้ด มู้ง เญย เยซู.”

6เยซู ก๊อง, “ต้ง เยีย อ๊ะ.” หม่าย เยซู วั้ว เต้า ยูดาด หย่า เหธา นิ่น บัว โซ้ว เจี๊ยน วั้ว. เยซู เยี้ยด ก๊อง, “ต้ง เยีย อ๊ะ,” ฯฒฯ แฮะ นิ่น บัว หลาด หฑาด บัม ฆะฮ้า แหมง มี่ง.

7เยซู แอ๋ง หน่าย หฑุ่น, “เม่ย บัว ต้าย ล์อ หาย เต้า?” นิ่น บัว เตา, “เยีย บัว ล์อ นาซาเล้ด มู้ง เญย เยซู.”

8เยซู แอ๋ง เตา, “เยีย ฒู้ง บั๋ว หฑุ่น เม่ย บัว, เซ ต้ง เยีย อ๊ะ. ฮนั้ง หน่าย, เม่ย บัว ล์อ เยีย นอ, อ๋อย หฒุ ปู๋ง กัน เยีย น้าย เต๋ย เมี่ยน มี่ง ฆอย.”

9เยซู ฮนั้ง น้าย นอ ก๊อง เหว่ย ปุน ฒิ่น ด่าง เหธา นิ่น เญย เตีย ก๊อง วั้ว เต๋ย หว่า ธ้วด ต้าย ต๋อย เหฑ่ง. วั้ว หฒั่น นิ่น ก๊อง, “อา เตีย อ้า! เม่ย ปุน เยีย น้าย เต๋ย เมี่ยน, เยีย ไม้ ปุน เหยียด เต้า ล่าย หฒิด.”

10ซีโมน ปีเต ปุ๋ย เจี๊ยน ฒูง หฑุ ฯฒฯ แปง ธ้วด ต้าย ฮงะ ต้ม ไซ เมี่ยน เญย โน่ว, ไพ หฒุ โน่ว เญย บย่าว ปูง มน่อม ดุ๊ด มี่ง. วั้ว เต้า โน่ว เญย บั๋ว เห่ว มันคัด.

11เยซู บั๋ว ปีเต, “เฒาะ หฑุ ด๊าว ทับ เจี๊ยน ไพ้ ม่าะ! เยีย ไม้ เฒ์ย อ๋อย หฒุ ฮบ เยีย เญย เตีย ปุน เยีย วั้ว นอม ฒ้าน ไฟ?”

12วั้ว เต๋ย โลมา แปง เหธา ต้ม แปง-เปย๊ย เหธา โก๋ว หฒั่ง ทิน-ฮู่ง เญย เปย๊า เญย แปง ฯฒฯ เฒาะ เยซู โด้ เจี๊ยน

13ต้อ นิ่น มี่ง เถา อันน้าด เญย หฑะเฮมียน ด่าง. อันน้าด โหฒว คายาฟ้าด เญย อง-ตา. วั้ว หฮญัง คายาฟ้าด โหฒว ต้ม ไซ เมี่ยน.

14ต้ง น้าย เต้า คายาฟ้าด ฒิ่น ด่าง ก๊อง บั๋ว โหฒว โฮล เญย ยิวไท เมี่ยน, “ปุน เหยียด เต้า ไต่ ตี๊ เหยียด ฝีง เมี่ยน เก้า หลง.”

15ซีโมน ปีเต เหธา กั้น เต้า ไซ-ก๋อ กัน เจี๊ยน เยซู มี่ง. น้าย เต้า ไซ-ก๋อ เซ ต้ม ไซ เมี่ยน หฒัวะ เญย, นิ่น หธีง ต้าย ตุ๊ เหธา เยซู เปียะ ต้ม ไซ เมี่ยน เญย เปย๊า เญย หลาด กะญั์ว.

16มป่า ปีเต โซ้ว กะเหญี่ย แหมง หลาด แก้ง. ต้ง ต้ม ไซ เมี่ยน หฒัวะ วั้ว เต้า ไซ-ก๋อ ฯฒฯ ธ้วด มี่ง เถง ฒั้ว หลาด แก้ง วั้ว เต้า มเซียะ โปว โท้ ปุน ปีเต เหธา เจี๊ยน เปียะ. วั้ว เต้า ไซ-ก๋อ ฯฒฯ ต้อ ปีเต เปียะ.

17ฒั้ว หลาด แก้ง วั้ว เต้า มเซียะ โปว ก๊อง บั๋ว ปีเต, “เม่ย โหฒว เต้า วั้ว เต้า เมี่ยน เญย ไซ-ก๋อ ไม้ เฒ์ย?” ปีเต เตา, “เยีย ไม้ เฒ์ย เหลาะ.”

18โปว บัว เหธา โก๋ว หฒั่ง ทิน-ฮู่ง เญย เปย๊า วั้ว เต๋ย แปง เฒาะ ถาน ปั๊ว โต์ว ต้าย โซ้ว เจี๊ยน วั้ว หฑาว โต์ว เหว่ย หฒุ จวั๊ง ไห่. ปีเต หย่า เหธา นิ่น บัว โซ้ว เจี๊ยน วั้ว หฑาว โต์ว.

19ต้ม ไซ เมี่ยน ฒ่า หน่าย เยซู เถา นิ่น เญย ไซ-ก๋อ เหธา นิ่น หฌาว เญย เล์ย.

20เยซู เตา, “เยีย หาย หฒั่น ก๊อง หว่า, เยีย ตอง เจี๊ยน หม่าน เมี่ยน ก๊อง. เยีย หาย หฒั่น หฌาว, เยีย หฒั่นๆ เยียม หวุ่ย ต้อง ไฟ หฒั่ง ทิน-ฮู่ง เญย เปย๊า, ต้ง ยิวไท เมี่ยน กั๊บ ฒุ้น เญย ต๋อง หฌาว. เยีย ไม้ ปี๋ง เจี๊ยน ก๊อง หาย หญู่ง.

21เม่ย เหว่ย หาย ติ่ว หน่าย เยีย? อ๋อย หฒุ หน่าย ไฮ์ เยีย ก๊อง เจี๋ย วั้ว เต๋ย เมี่ยน. เยีย ก๊อง หาย หญู่ง นิ่น บัว ฮิ้ว เญย.”

22เยซู ฮนั้ง น้าย นอ ก๊อง เซ้ด, ม่าย เต้า แปง โซ้ว กะเฮลน ฯฒฯ ไบ๋ นิ่น หย่า ก๊อง, “เม่ย ฮนั้ง หน่าย เตา ต้ม ไซ เมี่ยน?”

23เยซู เตา นิ่น, “สี ก๊อง เยีย ก๊อง ต่อง หาย หญู่ง, เม่ย กุ๊น บั๋ว เยียม น้าย เญย เมี่ยน เยีย ต่อง หาย หญู่ง. มป่า สี ก๊อง เยีย ก๊อง ตุ๊ หอบ นอ, เม่ย ไบ๋ เยีย โหฒว หาย หญู่ง?”

24อันน้าด แอ๋ง ฝูง นิ่น มี่ง คายาฟ้าด ต้ม ไซ เมี่ยน วั้ว. นิ่น บัว หธ่อ โด้ เจี๊ยน นิ่น.

25ซีโมน ปีเต หธ่อ โซ้ว เจี๊ยน วั้ว หฑาว โต์ว. เยียม วั้ว หฑาว โต์ว เญย เมี่ยน หน่าย นิ่น, “เม่ย หย่า โหฒว วั้ว ล่าน เมี่ยน เญย ไซ-ก๋อ ซ่าะ?” มป่า ปีเต ไม้ เหญี่ยม. นิ่น ก๊อง, “เยีย ไม้ เฒ์ย เหลาะ.”

26ม่าย ต้ม ไซ เมี่ยน เญย เหยียด เต้า โน่ว, ต้ง ปีเต ไพ หฒุ มน่อม ดุ๊ด วั้ว เต้า โน่ว เญย เธียน-เธะ, ฯฒฯ ก๊อง, “เยีย ปวัด เม่ย เหธา วั้ว ล่าน เมี่ยน เยียม วั้ว หฮวีง ไม้ เฒ์ย?”

27ปีเต แอ๋ง ก๊อง, “เยีย เก้ง! ไม้ เฒ์ย.” วั้ว หฒั่น ไจ ฯฒฯ หฆาย.

28ตะเหญ่ย ดอม เฑี้ยว เญย, โหฒว โฮล เญย ยิวไท เมี่ยน ต้อ เยซู ธ้วด คายาฟ้าด เญย เปย๊า แอ๋ง ฝูง มี่ง โลมา หฒูง เญย ติ่น. วั้ว เต๋ย ยิวไท เมี่ยน เหฑีย ไฮ่ ม่าย หวุย ฯฒฯ ไม้ เปียะ ติ่น กะญั์ว, เหว่ย ปุน นิ่น บัว ไฮ่ ตุ๊ หญั่น เสีย แหม่ง ฒิบ เญย หฮนาง.

29เหว่ย น้าย, ปีล้าด ธ้วด กะเหญี่ย ต้าย หน่าย นิ่น บัว, “เม่ย บัว ต้อ หาย หญู่ง สี่ ต้าย โก๋ น้าย ล่าน เมี่ยน?”

30นิ่น บัว เตา, “สี ก๊อง นิ่น ไม้ โหฒว หว่าย สี่, เยีย บัว ไม้ ต้อ นิ่น ต้าย น้าย จิว ปุน เม่ย.”

31ปีล้าด ก๊อง บั๋ว นิ่น บัว, “วั้ว หญู่ง, เม่ย บัว เอย เม่ย บัว กั้น เญย เล์ย ต้อ นิ่น มี่ง เซี้ยม ม่าะ!” นิ่น บัว เตา, “เยีย บัว ไม้ ม่าย ฮู่ง หลี่ง ตี่ง ไต๋ เมี่ยน.”

32น้าย เต๋ย สี่ ธ้วด เหว่ย ปุน ฒิ่น ด่าง เยซู ก๊อง นิ่น อ๋อย หฒุ ฮนั้ง หาย นอ ไต่ วั้ว เต๋ย หว่า ธ้วด ต้าย ต๋อย-ติ่ว.

33ปีล้าด ฯฒฯ เปียะ กะญั์ว ติ่น มี่ง หย่า เห่ว เยซู ต้าย ฯฒฯ หน่าย นิ่น, “เม่ย หฒะเก้ง โหฒว ยิวไท เมี่ยน เญย ฮู่ง ไฟ?”

34เยซู เตา, “เม่ย หน่าย เญย หว่า เซ เม่ย กั้น ฮนั้ม ธ้วด ต้าย ไฟ ม่าย เมี่ยน ก๊อง เยีย เญย เจ๊า-โหล่ว บั๋ว เม่ย?”

35ปีล้าด เตา, “เม่ย หล่าย เยีย โหฒว ยิวไท เมี่ยน? เซ ต้ง เม่ย กั้น วั้ว ฝีง เมี่ยน เหธา ไซ เมี่ยน เปย๊ย เฒาะ เม่ย จิว ปุน เยีย นีอา. วั้ว หญู่ง เม่ย โหฒว ต่อง หาย หญู่ง?”

36เยซู เตา, “เยีย กุ๊น เญย กั๊วะ ไม้ เกวย น้าย ป้าม เกน. สี ก๊อง เยีย เญย กั๊วะ เกวย น้าย ป้าม เกน, เยีย เญย เมี่ยน ฒู้ง อ๋อย เบ๊าะ จ๋า, ไม้ ปุน หฒุ จิว ปุน ยิวไท เมี่ยน. มป่า เยีย กุ๊น เญย กั๊วะ ไม้ เฒ์ย เยียม น้าย.”

37ปีล้าด ฯฒฯ หน่าย เยซู, “วั้ว หญู่ง, เม่ย หฒะเก้ง โหฒว ฮู่ง?” เยซู เตา, “เม่ย กั้น ก๊อง เยีย โหฒว ฮู่ง. เยีย ธ้วด เสย เยียม น้าย ป้าม เกน เซ เหว่ย เฒียน เล์ย โหฒว ฒอง-เหฒง. หาย เต้า เกวย เฒียน เล์ย ฯฒฯ หมวัง เยีย เญย หว่า.”

38ปีล้าด แอ๋ง หน่าย, “เฒียน เล์ย เซ หาย หญู่ง?” ปีล้าด ก๊อง ลิ์ว น้าย เต๋ย หว่า ฯฒฯ ธ้วด กะเหญี่ย บั๋ว โหฒว โฮล เญย ยิวไท เมี่ยน, “เยีย ฒ่า ไม้ ธ้วด นิ่น ม่าย หาย หญู่ง ฒุ์ย.

39มป่า เอย เม่ย บัว เญย เล์ย-ฝีง, เม่ย บัว เจี๋ย เสีย แหม่ง ฒิบ เญย เฒี่ยง โห่, เยีย อ๋อย หฒุ ปู๋ง เต้า หฒุ หววน โล่ เญย เมี่ยน ปุน เม่ย บัว. เม่ย บัว อ๋อย เยีย ปู๋ง ยิวไท เมี่ยน เญย ฮู่ง ไฟ?”

40หฒวัง เมี่ยน แอ๋ง เหน่าๆ เญย ก๊อง, “ไม้ ตู๋ง ปู๋ง น้าย เต้า. ปู๋ง บาลับบัด ฮนั้ง.” บาลับบัด เซ โหฒว หฒะ แปง.

← Chapter 17 Jump to: Chapter 19 →