John 13

Mien Bible (Thai Script) © Thailand Bible Society, 2007

← Chapter 12 Jump to: Chapter 14 →

1เสีย แหม่ง ฒิบ ฒิ่น ด่าง วั้ว ฮนอย, เยซู ฮิ้ว ตุ๊ นิ่น อ๋อย หฒุ เล่ย ป้าม เกน หฑวน หฒั่ง เตี๋ย วั้ว เญย เฒี่ยง โห่ เถา อ๊ะ. เยซู ฮนั้ม เยียม ป้าม เกน เสียน นิ่น วั้ว เต๋ย เมี่ยน, หย่า ปุน นิ่น บัว ฮิ้ว ตุ๊ นิ่น ฮนั้ม เถา ต้าว เถา เมว์ย.

2เยซู เหธา นิ่น เญย ไซ-ก๋อ บัว หญั่น ลู่ง หฮมวัง วั้ว หฒั่น, ซาตาน ฒู้ง ดั๊ว ลิ์ว ซีโมน อิสะคาลิโอด เญย ตอน, ยูดาด, ปุน นิ่น ฮนั้ม ธ้วด อ๋อย หม่าย เยซู.

3เยซู ฮิ้ว ตุ๊ หฒั่ง เตี๋ย เฒาะ หม่าน หมวด จิว ปุน เยียม นิ่น เญย ปั์ว-เดี๊ย, หย่า ฮิ้ว ตุ๊ นิ่น เยียม ทิน-ฮู่ง ต้าย แอ๋ง อ๋อย หฑวน เถา ทิน-ฮู่ง วั้ว.

4นิ่น ฯฒฯ เยียม วั้ว เตี้ย เจี์ย ซิน ต้าย ไจ๊ กะเหญี่ย วั้ว เหยี่ยม ลุย, เฒาะ สิ จ๊าว ไซ เจี๊ยน จ๊าย,

5หย่า เฒาะ ววม โต๋ เจี๊ยน ปุ้น, เหฌี่ย ปั์ว เถง ไซ-ก๋อ บัว หฑาว เหฒา. หฑาว ลิ์ว, นิ่น หล่ง ไซ เจี๊ยน วั้ว คว้าย สิ จ๊าว ซ้อด ฆาย.

6หฑาว เถา ซีโมน ปีเต, ปีเต ก๊อง บั๋ว นิ่น, “เฒี้ยว อ้า! เม่ย อ๋อย หฑาว เยีย เญย เหฒา?”

7เยซู เตา, “เยีย อี้ หฒั่น ฮนั้ง น้าย นอ โหฒว เม่ย ไม้ เม่ง แปะ, มป่า ม่าย ฮนอย เม่ย ฯฒฯ ฮิ้ว ตุ๊ อ๊ะ.”

8ปีเต ก๊อง, “เยีย เหยียด ลิ์ว ไม้ ปุน เม่ย หฑาว เยีย เญย เหฒา.” เยซู เตา, “สี ก๊อง เยีย ไม้ หฑาว เม่ย เญย เหฒา นอ, ยั่ง น้าย เจี๋ย เม่ย เหธา เยีย ไม้ ม่าย เม่ย เญย ป่วน อ๊ะ.”

9ซีโมน ปีเต เตา, “เฒี้ยว อ้า! วั้ว หญู่ง ไม้ ตาน หฑาว เยีย เญย เหฒา ฮนั้ง. เลี่ยม เยีย เญย ปั์ว เหธา มฆ้อง หฑาว ม่าะ!”

10เยซู ก๊อง, “หาย เต้า หฑาว ลิ์ว ซิน, เฒี่ยง ซิน ฯฒฯ ธีง-เหฑ่ง อ๊ะ, ขูง อ๋อย หฒุ หฑาว เหฒา ฮนั้ง. เม่ย บัว เซ ธีง-เหฑ่ง เญย, มป่า ไม้ เฒ์ย เม่ย บัว เต้าๆ.”

11เยซู ฮิ้ว ตุ๊ หาย เต้า อ๋อย หม่าย นิ่น หธีง ต้าย ก๊อง, “เม่ย บัว ม่าย เต้า ไม้ ธีง-เหฑ่ง.”

12เยซู หฑาว ลิ์ว ไซ-ก๋อ บัว เญย เหฒา, นิ่น แอ๋ง เฒาะ นิ่น เญย ลุย ฒุ เจี๊ยน มี่ง เฒว์ย นิ่น เญย ต๋อง. นิ่น หน่าย ไซ-ก๋อ บัว, “เยีย ฮนั้ง น้าย นอ โหฒว ปุน เม่ย บัว, เม่ย บัว เม่ง แปะ เญย ไฟ?

13เม่ย บัว เห่ว เยีย โหฒว ไซ-เตี๋ย หย่า โหฒว เฒี้ยว. เม่ย บัว ก๊อง ตุ๊ หอบ เญย เหว่ย หฒุ เยีย หฒะเก้ง เฒ์ย อ๊ะ.

14เยีย โหฒว เม่ย บัว เญย เฒี้ยว หย่า โหฒว เม่ย บัว เญย ไซ-เตี๋ย เถง เม่ย บัว หฑาว ลิ์ว เหฒา. ฮนั้ง หน่าย เม่ย บัว อ๋อย หฒุ ล่าน เถง ล่าน หฑาว เหฒา.

15เยีย โหฒว หญู่ง เฒ้ย ปุน เม่ย บัว หฒวด. เยีย ฮนั้ง หาย นอ เถง เม่ย บัว โหฒว ลิ์ว, เม่ย บัว หย่า อ๋อย หฒุ ฮนั้ง วั้ว นอ โหฒว.

16เยีย ก๊อง เฒียน บั๋ว เม่ย บัว, โปว ไม้ เก้า โฮล เฒี้ยว. พ้าย มี่ง เญย เมี่ยน ไม้ เก้า โฮล พ้าย นิ่น มี่ง วั้ว เต้า.

17อี้ หฒั่น เม่ย บัว ฮิ้ว ตุ๊ น้าย เต๋ย เจ๊า. สี ก๊อง เม่ย บัว เอย เจี๊ยน โหฒว ฯฒฯ ม่าย เฌียน-โย่ว อ๊ะ.

18“เยีย ไม้ เฒ์ย ก๊อง เถา เม่ย บัว เหยียด ฒู้ง. เยีย กิ๊น ต้าย วั้ว เต๋ย เยีย ฮิ้ว เญย, มป่า สี่ อ๋อย ธ้วด ต้าย ต๋อย น้าย เต๋ย กีง-โซว เญย หว่า. กีง-โซว ก๊อง, ‘เหธา เยีย จวั่ง หฮนาง หญั่น เญย เมี่ยน เบี๊ยน เฮญี้ยว ปุน เยีย.’

19สี่ ไม้ แก้ง ธ้วด เยีย จา-ด่าง บั๋ว เม่ย บัว. สี่ ธ้วด วั้ว หฒั่น เม่ย บัว ฯฒฯ เสียน เยีย เซ เหยียด ลิ์ว เฒี่ยง เจี๊ยน วั้ว เต้า.

20เยีย บั๋ว เฒียน เม่ย บัว, หาย เต้า ฒิบ เยีย พ้าย มี่ง วั้ว เต้า, นิ่น หย่า ฒิบ เยีย. หาย เต้า ฒิบ เยีย, นิ่น หย่า ฒิบ พ้าย เยีย ต้าย วั้ว เต้า อ๊ะ.”

21เยซู ก๊อง ลิ์ว น้าย เต๋ย หว่า นิ่น ไฮ์ เฮญี้ยว มุน ไห่, เฑ่า ไห่, ฯฒฯ ก๊อง, “เยีย บั๋ว เฒียน เม่ย บัว, เม่ย บัว ม่าย เต้า อ๋อย หม่าย เยีย.”

22ไซ-ก๋อ บัว, เม่ย หมั่ง เยีย, เยีย หมั่ง เม่ย, ฮนั้ม ไม้ ฮิ้ว เยซู ก๊อง หฒุ หาย เต้า.

23ม่าย เต้า ไซ-ก๋อ, ต้ง เยซู ฮนั้ม วั้ว เต้า, เฒว์ย นิด เยซู.

24ซีโมน ปีเต ฯฒฯ ฮนะ มฆ้อง บั๋ว วั้ว เต้า ไซ-ก๋อ, “หน่าย ก๋า, นิ่น ก๊อง หาย เต้า?”

25วั้ว เต้า ไซ-ก๋อ ฯฒฯ เดง มี่ง เก้า ฟัด เต๋ย หน่าย เยซู, “เฒี้ยว อ้า! เม่ย ก๊อง หาย เต้า?”

26เยซู เตา, “เยีย กั๊วะ อ๋า ฌั้ว ปุน หาย เต้า, เซ ต้ง วั้ว เต้า อ๊ะ.” เยซู ฯฒฯ กั๊วะ อ๋า ฌั้ว ปุน ซีโมน อิสะคาลิโอด เญย ตอน, ยูดาด.

27ยูดาด หญั่น ลิ์ว วั้ว อ๋า ฌั้ว, ซาตาน ฯฒฯ เปียะ นิ่น เญย เฮญี้ยว หมี่ อ๊ะ. เยซู ก๊อง บั๋ว ยูดาด, “เม่ย อ๋อย โหฒว หาย หญู่ง, ก๊าน มี่ง โหฒว อ๊ะ.”

28จวั่ง เตี้ย เญย เมี่ยน ไม้ ม่าย หาย เต้า เม่ง แปะ เยซู เหว่ย หาย ติ่ว ฮนั้ง น้าย นอ ก๊อง.

29เหว่ย หฒุ ยูดาด โก๋ว ญ่าน บัวะ, ม่าย เต๋ย หล่าย เยซู เห่ว นิ่น มี่ง ม์าย เจี๋ย ฒิบ เฉียม หล่ง เญย กะน้าย, ไฟ ต้อ ญ่าน มี่ง ปุน เมี่ยน จ่ม เมี่ยน.

30ยูดาด หญั่น ลิ์ว น้าย อ๋า ฌั้ว ฯฒฯ มี่ง หมี่ อ๊ะ. วั้ว หฒั่น หย่า หฮมวัง อ๊ะ.

31ยูดาด ธ้วด มี่ง, เยซู ก๊อง, “อี้ หฒั่น เยีย, ป้าม เมี่ยน เญย ตอน, ตุ๊ ฌัง-หล่าง. ทิน-ฮู่ง หย่า เหว่ย เยีย, ป้าม เมี่ยน เญย ตอน, ตุ๊ ฌัง-หล่าง.

32สี ก๊อง ทิน-ฮู่ง เหว่ย เยีย ตุ๊ ฌัง-หล่าง, ทิน-ฮู่ง หย่า อ๋อย ปุน เยีย ตุ๊ ฌัง-หล่าง หย่า เลี่ยม เฒ่ย ตุ๊.

33“เยีย เญย ฝุเจว๊ย อ่า, เยีย แอ๋ง เหธา เม่ย บัว เยียม เต๋ย ตั้ง ฮนั้ง. เม่ย บัว อ๋อย ล์อ เยีย มป่า ฮนั้ง เยีย บั๋ว เจี๋ย วั้ว เต๋ย โหฒว โฮล เญย ยิวไท เมี่ยน นอ, อี้ หฒั่น เยีย แอ๋ง ก๊อง บั๋ว เม่ย บัว, ‘เยีย มี่ง เญย ต๋อง เม่ย บัว ไม้ ไฮ่ มี่ง.’

34อี้ หฒั่น เยีย ปุน ติ้ว เซียง-หลี่ง เม่ย บัว, บั๋ว เม่ย บัว ล่าน อ๋อย หฒุ ฮนั้ม ล่าน. เยีย ฮนั้ง หาย นอ ฮนั้ม เม่ย บัว, เม่ย บัว อ๋อย หฒุ ฮนั้ง วั้ว นอ ล่าน ฮนั้ม ล่าน.

35สี ก๊อง เม่ย บัว ล่าน ฮนั้ม ล่าน, หฒวัง เมี่ยน ฯฒฯ ฮิ้ว ตุ๊ เม่ย บัว โหฒว เยีย เญย ไซ-ก๋อ.”

36ซีโมน ปีเต หน่าย เยซู, “เฒี้ยว อ้า! เม่ย อ๋อย มี่ง หาย?” เยซู เตา, “เยีย มี่ง เญย ต๋อง, อี้ หฒั่น เม่ย กัน เยีย มี่ง ไม้ ตุ๊. มป่า ฆะฮ้า เม่ย อ๋อย กัน เยีย มี่ง.”

37ปีเต หน่าย, “เฒี้ยว อ้า! เยีย เหว่ย หาย ติ่ว อี้ หฒั่น ไม้ ไฮ่ กัน เม่ย มี่ง? เยีย หญุ่น เหว่ย เม่ย เซี้ย แหม่ง ไต่.”

38เยซู เตา, “เม่ย หฒะเก้ง หญุ่น เหว่ย เยีย เซี้ย แหม่ง ไต่ ไฟ? เยีย ก๊อง หฒะ บั๋ว เม่ย, ไจ ฒู้ง ไม้ แก้ง หฆาย, เม่ย ไม้ เหญี่ยม เยีย ปัว หฑุ่น.”

← Chapter 12 Jump to: Chapter 14 →

Recommended Reading

Commentary John Commentaries → Devotional John Devotional Guide → Get This Bible Mien Bible (Thai Script) © Thailand Bible Society, Study Bible →