Mark 3

Kabyle Maybe is 2001

← Chapter 2 Jump to: Chapter 4 →

1Sidna Ɛisa yuɣal ɣer lǧameɛ. Yella dinna yiwen wergaz iwumi yekref ufus.

2Wid yellan dinna țɛassan deg-s ad walin m' ad isseḥlu deg wass n westeɛfu, iwakken ad ccetkin fell-as.

3Sidna Ɛisa yenna i wergaz-nni iwumi yekref ufus: Ekker tbeddeḍ dagi di tlemmast.

4Imiren yenna i wid yețmuqulen: D acu i d-teqqaṛ ccariɛa-nneɣ ɣef wayen yeɛnan ass n westeɛfu? A nexdem lxiṛ neɣ a nexdem cceṛ? A nsellek taṛwiḥt n wemdan neɣ a t-neǧǧ ad immet? Lameɛna nutni ssusmen meṛṛa, ur zmiren ara a d-rren awal.

5Sidna Ɛisa imuqel-iten s wurrif, yerna yeḥzen aṭas fell-asen imi qquṛen wulawen nsen. Yenna i wergaz-nni:?leq-ed (eẓẓel-ed) afus-ik! Iḍleq-it dɣa yeḥla ufus-is.

6Imiren ifariziyen ffɣen, ṛuḥen ad mcawaṛen nutni d ihiṛudiyen amek ara t-nɣen.

7Sidna Ɛisa ijbed iman-is nețța d inelmaden-is ɣer rrif n lebḥeṛ n tmurt n Jlili. Aṭas n lɣaci i t-id-itebɛen. Usan-d si mkul tama n tmurt n Jlili, si tmurt n Yahuda,

8si temdint n Lquds, si tmurt n Idum, si tmurt akkin i wasif n Urdun, si leǧwahi n temdinin n?ur akk-d Sidun. Mi slan s wayen ixeddem, aṭas n lɣaci i d-yețțasen ɣuṛ-es.

9Sidna Ɛisa iweṣṣa inelmaden-is a s-heggin taflukt, akken ur t-iḥeṛṛes ara lɣaci.

10Ladɣa imi yețdawi aṭas n imuḍan, wid akk yuḍnen ẓeddmen fell-as iwakken a t-nnalen.

11Iṛuḥaniyen m'ara t-walin, ɣellin zdat-es qqaṛen-as: « Kečč d Mmi-s n Ṛebbi!»

12Meɛna nețța yețgalla deg-sen iwakken ur d-qqaṛen ara anwa-t.

13Sidna Ɛisa yuli ɣer yiwet n tiɣilt, yessawel i wid yebɣa dɣa usan-d ɣuṛ-es.

14Yextaṛ tnac deg-sen ad ilin d ṛṛusul ad țeddun daymen yid-es, iwakken a ten-iceggeɛ ad beccṛen lexbaṛ n lxiṛ,

15a sen-yefk tazmert akken ad ssuffuɣen leǧnun.

16A ten-ah tnac-nni yextaṛ: Semɛun iwumi isemma Buṭrus,

17Yeɛqub akk-d gma-s Yuḥenna yellan d arraw n Zabadi iwumi isemma Buneṛǧes (yeɛni arraw n ṛṛɛud).

18Andriyus, Filbas, Bartelmay, Matta, Tuma, Yeɛqub mmi-s n?alfi, Taddi, Semɛun akenɛani (awaṭani)

19akk-d Yudas n Qeṛyut, win akken ixedɛen Sidna Ɛisa.

20Imiren, Sidna Ɛisa yuɣal ɣer wexxam. Nnejmaɛen-d daɣen ɣuṛ-es lɣaci ḥeṛsen-t nețța d inelmaden-is armi ur zmiren ara ad ččen.

21Mi gewweḍ lexbaṛ ɣer imawlan is, ṛuḥen-d a t-awin axaṭer ɣilen yedderwec!

22Imusnawen n ccariɛa i d-yusan si temdint n Lquds qqaṛen: D Balzabul iḥekkmen ɣef leǧnun i t-izedɣen, s tezmert-is i gessufuɣ leǧnun!

23Sidna Ɛisa yessawel-asen, ihdeṛ asen s lemtul, yenna-yasen: Amek yezmer Cciṭan ad issufeɣ Cciṭan?

24Ma yella țnaɣen imezdaɣ n tmurt wway gar-asen, tamurt-nni ur tețdum ara.

25Ma yella yekker ccwal ger wat wexxam, axxam-nni ad yeɣli ur yețbeddad ara.

26Ihi ma yella Cciṭan yețnaɣ d yiman-is tebḍa tgeldit-is, tazmert-is aț-țeɣli dɣa aț-țefnu.

27Yiwen ur izmir ad ikcem ɣer wexxam n wergaz iǧehden iwakken a d-yaker ayla-s, m'ur t-yuriz ara uqbel! M'ara t-yarez, imiren yezmer ad yaker axxam-is meṛṛa!

28A wen-d-iniɣ tideț: a sen țwasemmḥen i yemdanen meṛṛa ddnubat-nsen d rregmat-nsen,

29ma d win ireggmen Ṛṛuḥ iqedsen, d lmuḥal ad yețțusemmeḥ; ddnub-is ad yeqqim ɣef yir-is i dayem.

30Yenna-d annect-agi axaṭer qqaṛen-as: Izdeɣ-it Cciṭan.

31Wwḍen-d watmaten n Sidna Ɛisa akk-d yemma-s. Qqimen di beṛṛa, ceggɛen ɣuṛ-es a d-yas.

32Nețța yella zdaxel n wexxam yezzi-yas aṭas lɣaci; nnan-as: A Sidi, yemma-k d wayetma-k akk-d yessetma-k, atnan di beṛṛa țnadin fell-ak.

33Sidna Ɛisa yerra-yasen: Anta i d yemma, anwi i d aytma?

34Dɣa imuqel meṛṛa wid i s-d yezzin yenna: Ațah yemma, atnah wayetma.

35Axaṭer win ixeddmen lebɣi n Sidi Ṛebbi, d win i d gma, i d weltma, i d yemma!

← Chapter 2 Jump to: Chapter 4 →