Mark 8

Kabyle Maybe is 2001

← Chapter 7 Jump to: Chapter 9 →

1Deg wussan-nni, innejmaɛ-ed daɣen waṭas n lɣaci, ur sɛin ara ayen ara ččen. Sidna Ɛisa yessawel i inelmaden-is, yenna-yasen:

2Tejreḥ tasa-w ɣef lɣaci-agi, tlata wussan aya i qqimen yid-i, yerna ulac ayen ara ččen.

3Ma yella rriɣ-ten ansi i d-kkan i laẓ, ad nezfen deg webrid axaṭer kra deg-sen usan-d si lebɛid.

4Inelmaden-is rran-as-d: Ansi ara ɣ-d-yekk weɣṛum ara ten-yesseṛwun deg wemkan-agi yexlan?

5Sidna Ɛisa yesteqsa-ten: Acḥal n teḥbulin n weɣṛum i tesɛam? Rran-as-ed:?uṛ-nneɣ sebɛa teḥbulin!

6Yenna i lɣaci ad qqimen ɣer lqaɛa. Dɣa yeddem-ed sebɛa teḥbulin-nni n weɣṛum, yeḥmed Sidi Ṛebbi, yebḍa-tent, yefka-tent i inelmaden-is feṛqen-tent i lɣaci.

7Sɛan daɣen kra iselman (iḥewtiwen) imecṭaḥ. Yeḥmed daɣen Sidi Ṛebbi, yenna-yasen a ten-feṛqen i lɣaci.

8?čan armi ṛwan. Rnan sagren-d azal n sebɛa iqecwalen.

9Llan deg wazal n ṛebɛa alaf n yemdanen. Mi fukken lmakla, iserreḥ-asen ad uɣalen ɣer ixxamen-nsen.

10Imiren kan yuli ɣer teflukt nețța d inelmaden-is, ṛuḥen ɣer leǧwahi n Dalmanuta.

11Ṛuḥen-d ifariziyen, bdan țmeslayen d Sidna Ɛisa iwakken a t-jeṛṛben, ssutren-as ad ixdem lbeṛhan ara d-iṣubben seg igenni.

12Sidna Ɛisa yerra-d nnehta, yenna: Acuɣer i yi-d-ssuturen lbeṛhan yemdanen n lǧil-agi? S tideț aql-i nniɣ-awen: d lmuḥal a s-d-ițunefk lbeṛhan i lǧil-agi!

13Dɣa yeǧǧa-ten, yerkeb daɣen di teflukt iwakken ad izger agummaḍ.

14Inelmaden țțun ur wwin ara aɣṛum anagar yiwet n teḥbult i gellan ɣuṛ-sen di teflukt.

15Sidna Ɛisa iweṣṣa-ten, yenna-yasen:?adret iman-nwen ɣef temtunt (iɣes) n ifariziyen akk-d win n Hiṛudus.

16Inelmaden qqaṛen wway gar asen: «Yenna-yaɣ-d ayagi imi ur d newwi ara aɣṛum.»

17Mi geẓra ayen țxemmimen, yenna-yasen: Acuɣer tețxemimem ɣef weɣṛum? Urɛad tfaqem? Mazal ur tefhimem ara?

18Eɛni qquṛen wulawen-nwen? Tesɛam allen ur tețwalim ara, tesɛam imeẓẓuɣen ur tsellem ara?

19Ur tecfim ara mi bḍiɣ xemsa teḥbulin-nni n weɣṛum i xemsa alaf n yergazen, acḥal n iḍellaɛen n tsigar i tjemɛem? Rran-as: Tnac iḍellaɛen.

20I wasmi bḍiɣ sebɛa teḥbulin n weɣṛum i ṛebɛa alaf n yemdanen, acḥal n tqecwalin yeččuṛen ț-țisigar i d-tjemɛem? Nnan-as: Sebɛa n tqecwalin.

21Dɣa yenna-yasen: Werɛad tefhimem ihi?

22Ewwḍen ɣer temdint n Bitsayda. Wwin-as-d yiwen uderɣal, ḥellelen-t iwakken a t-yennal.

23Sidna Ɛisa yeṭṭef afus i uderɣal-nni, yewwi-t beṛṛa n taddart. Yessers imetman ɣef wallen n uderɣal-nni, yessers ifassen is fell-as yesteqsa-t: Yella kra tețwaliḍ?

24Yerfed allen-is yenna:?waliɣ imdanen am akken d ttjuṛ i gleḥḥun.

25Sidna Ɛisa iɛawed issers-as ifassen ɣef wallen, mi gemmuqel uderɣal-nni, yuɣal-it-id yeẓri, ițwali akken ilaq.

26Dɣa Sidna Ɛisa iceggeɛ-it ɣer wexxam-is, yenna-yas: Ur keččem ara ɣer taddart.

27Sidna Ɛisa akk-d inelmaden-is ṛuḥen ɣer tudrin n Qiṣarya n Filibus. Deg webrid, yesteqsa-ten yenna yasen: D acu-yi ɣer lɣaci?

28Rran-as-d: Kra deg-sen qqaṛen d Yeḥya aɣeṭṭas i telliḍ, wiyaḍ qqaṛen d Sidna Ilyas, ma d wiyaḍ ḥesben-k d yiwen si lenbiya.

29Yerna yesteqsa-ten: I kunwi, d acu-iyi ɣuṛ-wen? Buṭrus yerra-yas: Keččini d Lmasiḥ. (yeɛni win yextaṛ Ṛebbi)

30Yumeṛ-iten iwakken ur țɛawaden i yiwen ayagi.

31Sidna Ɛisa yebda yesselmad-iten yeqqaṛ: Mmi-s n bunadem ilaq ad yenɛețțab aṭas; a t-nekkṛen lecyux d lmuqedmin imeqqranen akk-d lɛulama n ccariɛa. A t-nɣen, m'ara ɛeddin tlata wussan, a d-iḥyu si ger lmegtin.

32Yenna-yasen-d ayagi ɛinani. Buṭrus ijbed-it weḥd-es, ilumm fell-as.

33Sidna Ɛisa yezzi, imuqel inelmaden-is, yenna i Buṭrus: Wexxeṛ akkin fell-i a Cciṭan! Ixemmimen-ik mačči n Ṛebbi, meɛna n yemdanen!

34Sidna Ɛisa yessawel i lɣaci akk-d inelmaden-is, yenna-yasen: Ma yella win yebɣan ad iddu yid-i, ur ilaq ara ad ixemmem ɣef yiman-is, meɛna ilaq ad iqbel leɛtab ɣef ddemma n yisem-iw, ad ibbib amidag-is, a yi-d-itbeɛ.

35Axaṭer win yebɣan ad isellek taṛwiḥt-is, a s-tṛuḥ; ma d win ara yesṛuḥen tarwiḥt-is ɣef ddemma-w akk-d lexbaṛ n lxiṛ, a ț-isellek.

36Ma yella irbeḥ-ed wemdan ddunit meṛṛa, acu n lfayda i gesɛa ma yesṛuḥ tudert-is?

37D acu ara yefk wemdan iwakken ad icafeɛ taṛwiḥt-is?

38Ma yella win yessetḥan yis-i akk-d imeslayen-iw ger lǧil-agi amednub, ifesden, ula d Mmi-s n bunadem ad issetḥi yis m'ara d-yas akk-d lmalayekkat iqedsen di lɛaḍima n baba-s.

← Chapter 7 Jump to: Chapter 9 →