Mark 9 — Kabyle Maybe is 2001

1Sidna Ɛisa yenna daɣen: -- S tideț a wen-d-iniɣ, kra seg wid yellan dagi, ur țmețțaten ara alamma walan tagelda n Ṛebbi tusa-d s tmanegt tameqqrant.

2Mi ɛeddan sețța wussan, Sidna Ɛisa yewwi yid-es Buṭrus, Yeɛqub d Yuḥenna, ulin ɣer yiwen wedrar ɛlayen. Mi llan dinna weḥḥed-sen, tenbeddal ṣṣifa-s zdat-sen,

3llebsa-s tuɣal ț-țamellalt tețfeǧǧiǧ, ula d yiwen di ddunit ur izmir a ten yessimlul akken.

4?ehṛen-asen-d nnbi Ilyas akk-d Sidna Musa, țmeslayen d Sidna Ɛisa.

5Yenṭeq Buṭrus yenna i Sidna Ɛisa: A Sidi, yelha imi nella dagi. A nesbedd tlata iqiḍunen; yiwen i kečč, wayeḍ i Sidna Musa wayeḍ i Sidna Ilyas.

6Ur yeẓri d acu i d-yeqqaṛ axaṭer tekcem-iten lxelɛa ț-țameqqrant.

7Taswiɛt kan ters-ed yiwet n tagut tɣumm-iten, si tagut-nni tenṭeq-ed yiwet n taɣect tenna-d: Wagi d Mmi ameɛzuz, smeḥsiset as!

8Imiren kan, inelmaden muqlen ɣer mkul tama, ur walan ula d yiwen, anagar Sidna Ɛisa yellan yid-sen.

9Mi d-ṣubben seg udrar, Sidna Ɛisa iweṣṣa-ten: Ur ḥekkut i yiwen ayen teẓram, alamma yeḥya-d Mmi-s n bunadem si ger lmegtin.

10Uɣen-as awal, d acu kan țemsteqsayen, qqaṛen: Acu i d lmeɛna n ḥeggu si ger lmegtin?

11Inelmaden steqsan-t nnan-as: Acuɣer lɛulama n ccariɛa qqaṛen-d: ilaq a d-yas uqbel Sidna Ilyas?

12Yerra-yasen:?-țideț, a d-yas uqbel Ilyas, iwakken ad iseggem kullec. lameɛna acuɣer yețwakteb ɣef Mmi-s n bunadem belli ilaq ad yenɛețțab aṭas yerna ad yețwaqehheṛ?

13Aql-i nniɣ-awen: Ilyas yusa-d, xedmen deg-s akken bɣan, am akken yețwakteb fell-as di tira iqedsen.

14Mi d-ṣubben seg udrar, ufan-d lɣaci akk-d lɛulama n ccariɛa zzin i inelmaden nniḍen, țmeslayen yid-sen.

15Mi d-walan Sidna Ɛisa, dehcen, uzzlen ad selmen fell-as.

16Sidna Ɛisa yesteqsa-ten:?ef wacu i tețmeslayem akka yid-sen?

17Yiwen wergaz si lɣaci-nni yerra-yas-d: A Sidi, wwiɣ-ak-d mmi axaṭer yesgugem-it uṛuḥani.

18Kra wanda ara t-yeṭṭef, yesseɣlay-it ɣer lqaɛa; aqcic yessufuɣ-ed tikufta, yețqeṛṛic tuɣmas, yețțuɣal d asemmaḍ.?elleleɣ inelmaden-ik a t-ssufɣen seg-s meɛna ur zmiren ara.

19Sidna Ɛisa yenna-yasen: A lǧil i gxuṣṣ liman! Ar melmi ara yiliɣ yid-wen? Ar melmi ara wen-ṣebṛeɣ? Awit-ed aqcic-agi! Wwin-as-t-id;

20akken kan iwala Sidna Ɛisa, aṛuḥani-nni yebda yețhuccu aqcic-nni, yesseɣli-t ɣer lqaɛa yessemṛareɣ-it armi i s-d yessufeɣ tikufta.

21Sidna Ɛisa yesteqsa baba-s n weqcic-nni yenna-yas: Si melmi i d-ideṛṛu yid-es wayagi? Yerra-yas-d: Seg wasmi yella d amecṭuḥ.

22Acḥal d abrid i t-idemmer uṛuḥani-agi ɣer tmes d waman iwakken a t-ineɣ. Tura, ma yella wayen iwumi tzemreḍ, ḥunn fell-aɣ, ɛiwen-aɣ!

23Sidna Ɛisa yerra-yas: Teqqaṛeḍ: ma tzemreḍ...? Win yețțamnen yezmer i kullec!

24Imiren kan, baba-s n weqcic-nni yenna: Umneɣ! Meɛna sseǧhed-iyi axaṭer xuṣṣeɣ di liman.

25Sidna Ɛisa mi gwala lɣaci uzzlen-d ɣuṛ-sen, yumeṛ i uṛuḥani-nni, yenna-yas: Ay aṛuḥani! yesgugumen yesɛuẓẓugen, effeɣ seg weqcic-agi ur țɛawad ara aț-țkecmeḍ deg-s!

26Imiren iɛeggeḍ, ihucc-it nezzeh, dɣa yeffeɣ seg-s. Aqcic-nni yuɣal am lmegget, daymi aṭas i s-yeqqaṛen: « yemmut. »

27Meɛna Sidna Ɛisa yeṭṭef-as afus, isekker-it-id, ibedd.

28Mi kecmen ɣer wexxam, inelmaden-is steqsan-t: Acuɣer ur nezmir ara nukni a nessufeɣ aṛuḥani-nni?

29Yenna-yasen: Iwakken aț-țessufɣem iṛuḥaniyen am wigi, ilaq aț-țețțuẓumem yerna aț-țețẓallam.

30Ṛuḥen syenna, zegren tamurt n Jlili. Sidna Ɛisa ur yebɣi ara ad ẓren lɣaci anda i gella,

31axaṭer yesselmad inelmaden-is, yenna-yasen: Mmi-s n bunadem ad ițțusellem ger ifassen n yemdanen, a t-nɣen, meɛna tlata wussan mbeɛd lmut-is a d-iḥyu.

32Inelmaden-is ur fhimen ara lmeɛna n wawal-agi, yerna kukran a t-steqsin.

33Mi ewwḍen ɣer temdint n Kafernaḥum. llan deg wexxam, Sidna Ɛisa yesteqsa-ten:?ef wacu i tețmeslayem deg webrid?

34Lameɛna ssusmen akken ma llan, axaṭer deg webrid țmesteqsayen anwa i d ameqqran gar-asen.

35Sidna Ɛisa yeqqim, yessawel i tnac-nni inelmaden-is, yenna-yasen: Win yebɣan ad yili d amezwaru, ilaq ad yeqqim d aneggaru, ad yuɣal d aqeddac i mkul yiwen.

36Yeddem-ed yiwen weqcic amecṭuḥ, yesbedd-it zdat-sen dɣa yerfed-it ger ifassen-is, yenna-yasen:

37Win iqeblen aqcic amecṭuḥ am wagi ɣef ddemma n yisem-iw, d nekk i geqbel, win i yi-qeblen mačči d nekk i geqbel lameɛna yeqbel Win i yi-d iceggɛen.

38Yuḥenna yenna i Sidna Ɛisa: A Sidi, nwala yiwen wergaz yessufuɣ leǧnun s yisem-ik; nugi-yas imi ur iteddu ara yid-nneɣ.

39Sidna Ɛisa yerra-yas: Aneft-as, imi ulac win izemren ad ixdem lbeṛhan s yisem-iw, imiren ad yehdeṛ ayen n diri fell-i.

40Win ur nelli ara d aɛdaw-nneɣ, yid-nneɣ i gella.

41Kra win ara wen-d-yefken lkas n waman imi d inelmaden n Lmasiḥ i tellam, a wen-iniɣ s tideț, lxiṛ-is ur s-yețwankaṛ ara.

42Win ara yilin d sebba n tuccḍa i yiwen seg imecṭuḥen-agi yumnen yis-i, axiṛ-as a s-ɛelqen ɣer temgeṛṭ aɣaṛef n tsirt, a t-ḍeggṛen ɣer lebḥeṛ.

43Ma yella d afus-ik i d sebba n tuccḍa, gzem-it; axiṛ-ak aț-țkecmeḍ ɣer tudert n dayem s yiwen ufus wala aț-țkecmeḍ s sin ifassen ɣer ǧahennama, aț-țețwaḍeggreḍ ɣer tmes ur nxețți.

44[Dinna awekkiw itețțen lǧețțat ur yețmețțat ara, times ur txețți ara maḍi.]

45Ma yella d aḍaṛ-ik i d sebba n tuccḍa, gzem-it;axiṛ-ak aț-țkecmeḍ ɣer tudert n dayem s yiwen uḍar wala aț-țkecmeḍ s sin iḍaṛṛen ɣer ǧahennama, aț-țețwaḍeggreḍ ɣer tmes ur nxețți.

46[Dinna awekkiw itețțen lǧețțat ur yețmețțat ara, times ur txețți ara maḍi.]

47Daɣen ma yella ț-țiṭ-ik i gellan d sebba n tuccḍa, qleɛ-iț-id; axiṛ-ak aț-țkecmeḍ ɣer tgelda n Sidi Ṛebbi s yiwet n tiṭ, wala aț-țwaḍeggṛeḍ s snat wallen ɣer ǧahennama.

48Dinna awekkiw itețțen lǧețțat ur yețmețțat ara, times ur txețți ara maḍi.

49Axaṭer mkul amdan ilaq ad yețwamelleḥ s tmes.

50Lmelḥ, d ayen yelhan; meɛna ma tṛuḥ-as lbenna-s, s wacu ara t-tmellḥem?

51Sɛut lmelḥ deg yiman-nwen, tɛicem wway gar-awen di lehna.