Micah 1

Kamba (Mbivilia) 1956

Jump to: Chapter 2 →

1Ndeto ya Yeova ĩla yamũkĩe Mika Mũmolasiti mĩthenya ya Yothamu, na Aasu, na Esekia, asumbĩ ma Yuta, ĩla wonie ũndũ wa Samalia na Yelusaleme.

2Ĩw’ai, inyw’ĩ ngo sya andũ, inyw’onthe; ĩthukĩĩsye, we nthĩ, na syonthe ila syĩ vo: na Mwĩaĩi Yeova namũkũsĩĩe, Mwĩaĩi e ĩkalũnĩ yake ĩtheu.

3Nũndũ, sisya, Yeova, nũkumĩla aumĩte vandũ vake, na akatheea, na kũkinyanga kũndũ kũtũlu kwa nthĩ.

4Na iĩma ikatweka ungu wake, na myanda ĩkaatũka, ta ĩseso vala ve mwaki, ta manzĩ mavaũũkĩle kĩvaũũkonĩ.

5Nũndũ ũũ w’onthe nĩ ũndũ wa ĩvĩtyo ya Yakovo, na ũndũ wa naĩ sya nyũmba ya Isilaeli. Ĩvĩtyo ya Yakovo nĩ yĩva? Ti Samalia? Na kũndũ kũtũlu kwa Yuta nĩ kwĩkũ? Ti Yelusaleme?

6Kwondũ wa ũu ngatw’ĩkĩthya Samalia ta kĩvumbu kĩ mũũndanĩ, na ta kũndũ kwa kũvanda mĩsavivũ; na ngekya mavia mayo kyandanĩ, na ngavukũa myambĩlĩlyo yayo.

7Na mĩvw’anano yayo yonthe myasũvye ĩkakũnwa ĩtilĩkange tũlungu, na matuvi mayo onthe makavĩvw’a na mwaki, na mĩvw’anano yayo yonthe ngamyananga; nũndũ nĩyamyũmbanĩtye na ĩtuvi ya ũmalwaya, na ĩkatũngĩthw’a ĩtuvinĩ ya ũmalwaya.

8Kwondũ wa ũu ngaĩa na kũkaya; ngathi nĩvuĩte na nĩ mũthei; ngaamba o ta mbĩwa, na kũĩa kĩĩo kĩilyĩ kya nyaa.

9Nũndũ mawũkite make mativoeka; nũndũ nĩwũkĩte o na kũvika Yuta; nũvikĩte mbingĩlonĩ ya andũ makwa, o Yelusaleme.

10Mũtikotavan’ye Ngathi, mũtikaĩe nongi: ku Mbethi‐le‐avila nĩnĩyalalĩtye kĩtoonĩ.

11Vĩta, we ũla ũtwĩe Savili, wĩ mũthei na wĩ na nthoni: ũla ũtwĩe Nzaanani ndanamba kumĩla; kũkaya kwa Mbethi‐eseli kũkamũvena inyw’ĩ wĩkwatyo wavo.

12Nũndũ ũla ũtwĩe Malothi eteele ũseo e na kĩũũyũ, nĩkwĩthĩwa ũthũku nĩ mũku kuma kwa Yeova kũvika mbingĩlonĩ ya Yelusaleme.

13Ova mbalasi yĩ maũũ ĩkasyanĩ ya kaũ, we ũla ũtwĩe Lakisi: nĩyo mwambĩlĩlya wa naĩ kwa mwĩĩtu wa Saioni; nũndũ mavĩtyo ma Isilaeli nĩmoonekie nthĩnĩ waku.

14Kwondũ wa ũu ũkanenga Molesethingathi mũthĩnzĩo wa kũtaanĩsya: nyũmba sya Akisivu ikeethĩwa kĩndũ kya ũkengana kwa asumbĩ ma Isilaeli.

15We ũla ũtwĩe Malesa, ngesa ũkũetee ũla ũkakũsumbĩka: ũtaĩo wa Isilaeli ũkavika o na Atulamu.

16Ĩyenze ũvaa, noitilanga nzw’ĩĩ syaku nũndũ wa syana ila ikũtanasya: nenevangya ũvaa waku ta ndiũ; nũndũ nĩ nendu syĩ ndave kuma kwaku.

Jump to: Chapter 2 →