Micah 3

Kamba (Mbivilia) 1956

← Chapter 2 Jump to: Chapter 4 →

1Na nasya, Ĩw’ai, nĩngũmwĩsũva, inyw’ĩ atongoi ma kwa Yakovo na asumbĩki ma nyũmba ya Isilaeli: ti ũndũ wenyu kũmanya ũsili wa katĩ?

2Inyw’ĩ ala mũmenaa ũseo, na kwenda ũthũku; ala mũthĩnzaa kĩkonde kyoo, na nyama syoo kũsyumya mavĩndĩnĩ moo;

3o na ĩngĩ ala mũĩsaa nyama sya mĩĩ ya andũ makwa, na kũmathĩnza kĩkonde kyoo, na kũtũlanga mavĩndĩ moo, na kũmatilanga tũlungu, ta tũkwĩkĩwa mbisũnĩ, na ta nyama kĩtevenĩ.

4Nĩvo memwĩkaĩla Yeova, ĩndĩ ndakamasũngĩa; ĩĩ, akamavitha ũthyũ wake ĩvinda yĩu, kwĩanana na ũndũ meekie ũthũku mekonĩ moo.

5Ũũ nĩw’o Yeova ũnũkwasya ũndũ wa athani ala mavĩtĩthasya andũ makwa; ala maũmaa na maeo moo, na kwaasya, Mũuo; na o ũla ũtekwĩkĩa kĩndũ makanyw’anĩ moo, no makwatasya kaũ nake:

6Kwondũ wa ũu kũkeethĩwa ũtukũ kwenyu, nĩ kana mũtikethĩwe na woni; na kũkeethĩwa kĩvindu kwenyu, nĩ kana mũtikaaũsye; na syũa yĩkamathũĩa athani, na mũthenya ũkeethĩwa mwiũ kwoo.

7Na oni makasonokw’a, na ala maaũasya makathokoana; ĩĩ, onthe makeevw’ĩka ilomo; nũndũ vati ũsũngĩo wa Ngai.

8Ĩndĩ ngalĩ ĩ yakwa, kwondũ wa Veva wa Yeova, nĩnusũĩtw’e nĩ vinya, na ũsili, na ũtonyi, non’ye Yakovo ĩvĩtyo yake, na Isilaeli naĩ yake.

9Ĩw’ai ũũ, nĩngũmwĩsũva, inyw’ĩ atongoi ma nyũmba ya Yakovo, na asumbĩki ma nyũmba ya Isilaeli, ala mũthĩthaa ũsili wa katĩ, na kwelelũkasya ũlũngalu w’onthe.

10Meaka Saioni na nthakame, na Yelusaleme na ũthũku.

11Atongoi mayo masilaa nũndũ wa mĩthĩnzĩo, na athembi mayo mamanyĩasya nũndũ wa kũtuvwa, na athani mayo maaũasya nũndũ wa mbesa: o na kau meĩkwatya Yeova, na kwasya, Yeova nde katĩ waitũ? Vati ũthũku ũkatũvikĩa.

12Kwondũ wa ũu Saioni ĩkenzwa ta mũũnda kwondũ wenyu, na Yelusaleme ĩkatw’ĩka ivumbu, na kĩĩma kya ĩ nyũmba ta kũndũ kũtũlu kwa mũtitũ.

← Chapter 2 Jump to: Chapter 4 →