Micah 2

Kamba (Mbivilia) 1956

← Chapter 1 Jump to: Chapter 3 →

1Woo nĩ wa ala masũanĩaa ũthũku na kwĩkĩa ũthũku mokomonĩ moo! Na kĩoko kũikya maiwĩka, nũndũ wĩ ũtonyinĩ wa kw’oko kwoo.

2Na nĩmew’ĩaa mĩũnda ĩtomo, na kũmyosa; o na nyũmba, na maivenana: na nĩmathĩnasya mũndũ na nyũmba yake, o na mũndũ na ũtiĩwa wake.

3Kwondũ wa ũu Yeova easya atĩĩ: Sisyai, mũvĩa ũũ nĩngũsũanĩĩa ũthũku, ũla mũtakeyumya ngingo syenyu vo, o na mũikathi na wĩng’athĩlĩlyo; nũndũ nĩ ĩvinda ĩthũku.

4Mũthenya ũsu makamũtila ngelekan’yo, na kũĩa kĩĩo kĩ woo, na kwasya, Nĩtwanangĩtwe vyũ: nũnũkũalyũla kĩanda kya andũ makwa: a! Ũndũ ũnũkũkĩveta kwakwa! Nũnũkũaĩa ala ang’endu mĩũnda yaitũ.

5Kwondũ wa ũu ĩkomanonĩ ya Yeova ndũkethĩwa na ũmwe ũla ũkekya ũlii wa kũthima na nzĩa ya kula.

6Mũikathane, na mathanĩĩa. Matikamathanĩe: ivũthya itikathela.

7Kũkaw’a, we nyũmba ya Yakovo, Veva wa Yeova nĩ mũoleku? Meko aa nĩ make? Ndeto syakwa itimwĩkaa nesa ũla ũendaa na mĩendele myaĩlu?

8Ĩndĩ o ĩoo yĩthei andũ makwa manookĩlile ta mũmaitha: nĩmumasya na vinya ngũa ya ĩũlũ kuma ngũanĩ ya ala mavĩtaa meyelele ta andũ matekwenda kaũ.

9Aka ma andũ makwa nĩmũmaumasya nyũmbanĩ syoo sya kwendeesya; syana syoo nini nĩmwivenaa ndaĩa yakwa tene na tene.

10Ũkĩlai, na mũkĩthi; nũndũ vaa ti vandũ venyu va kũthũmũa; nũndũ wa ũvuku ũla wanangaa, ĩĩ, o na wanango mũnene mũno.

11Ethĩwa mũndũ aendete nthĩnĩ wa veva wa ũvũngũ nũnũkengana, akyasya, Ngakwathanĩa ũndũ wa mbinyu na kĩla kĩtoonasya; o nake kaeethĩwa mwathani wa andũ aa.

12Nditĩa kũmban’ya onthe a maku, we Yakovo; nditĩa kũmban’ya ũtialo wa Isilaeli; ngamomban’ya vamwe ta malondu ma Mbosila, ta ndĩthya ya mbũi na malondu katĩ wa kĩsesi kyayo; makookĩlya kĩuumo kĩnene nũndũ wa andũ kwingĩva.

13Ũla mũvevenzi ambata mbee wamo; meevũthũĩa na mavĩta kũvika mbingĩlonĩ, na kumaalĩla vo; na mũsumbĩ woo atongosya mbee woo, na Yeova vu mbee.

← Chapter 1 Jump to: Chapter 3 →