Micah 6

Kamba (Mbivilia) 1956

← Chapter 5 Jump to: Chapter 7 →

1Ĩw’ai yu ũndũ Yeova ũnũkwasya: Ũkĩla, ũkatetee mbee wa iĩma, na tũlĩma nĩtwĩw’e wasya waku.

2Ĩw’ai, inyw’ĩ iĩma, ngananĩo ya Yeova, na inyw’ĩ myambĩlĩlyo ya nthĩ ĩla yĩkalaa; nũndũ Yeova e na ngananĩo na andũ make, na akatetan’ya na Isilaeli.

3We ũko wakwa, nĩkwĩkĩte ata? Na nĩkũnoetye ũndũnĩ wĩva? Ngũsĩĩa.

4Nũndũ nĩnakwambatisye kũkumya nthĩ ya Misili, na nakwovosya kuma nyũmbanĩ ya ũkombo; na natũma Mose, na Aluni, na Miliamu makũtongoesye.

5Ame andũ makwa, lilikanai yu ũndũ Mbalaki mũsumbĩ wa Moavi wasũanĩie, na ũndũ Mbalaamu mwana wa Mbeoli wamũsũngĩie; lilikanai ũndũ kweekĩkie kuma Sitimu kũvika Ngilikali, nĩ kana mũmanye meko malũngalu ma Yeova.

6Ngathengeea mbee wa Yeova na kyaũ, na kwĩkunamĩsya Ngai ũla wĩ ĩũlũ? Ngamũthengeea nĩ na nthembo sya kũvĩvw’a, na tũsaũ twa mwaka ũmwe?

7Yeova akendeew’a nĩ ngili sya ndũũme, kana nĩ ngili makũmi sya mbũsĩ sya mauta? Nganengane ĩkithathi yakwa nũndũ wa ĩvĩtyo yakwa, ũsyao wa mwĩĩ wakwa nũndũ wa naĩ ya ngoo yakwa?

8Nake nũkwonetye ũndũ ũseo, we mũndũ; na ũndũ ũla Yeova ũnũkũandũa kwaku nĩ mwaũ, ate o kwĩkaa ũlũngalu, na kwendaa ũseo, na kũendanasya na Ngai waku?

9Wasya wa Yeova nũkwanĩĩsya ndũa, na mũndũ wĩ ũĩ akoona syĩtwa yaku: mĩw’ei ndata, na ũla ũmĩnyuvĩte.

10Ve mothwii maie ma ũthũku o na yu nyũmbanĩ ya mũthũku, na kĩthimi kĩte kĩanĩu kĩla kĩthatasya?

11Ngeethĩwa nĩ mũtheu nĩ na ithimi ila nthũku, na nĩ na mũvuko wĩ mavia ala mathimaa ma ũkenganĩ?

12Nũndũ athwii mayo mausũĩtwe nĩ ũng’endu, na ala mamĩtwĩe nĩmaneenete movũngũ, na nĩmĩ syoo nĩ ngengani makanyw’anĩ moo.

13Kwondũ wa ũu nakwa nĩngũkũnĩte ĩkũna yĩ woo; nĩngũtw’ĩte ĩanzo kwondũ wa naĩ syaku.

14Ũkaya, ĩndĩ ndũkavũna; na kũnyivw’a kwaku ũkeethĩwa nakw’o: na ũkaia, ĩndĩ ndũkasũvĩĩkya; na kĩla wĩsũvĩa ngakĩnenga ũvyũ.

15Ũkavuĩa, ĩndĩ ndũkaketha; ũkakinyanga mathata, ĩndĩ ndũkevaka a mauta; na ngetha ya mĩsavivũ, ĩndĩ ndũkanyw’a ĩ mbinyu.

16Nũndũ myamũlo ya Omili nĩyakwatawa, na mawĩa onthe ma nyũmba ya Aavu, na nĩmũkinyaa motaonĩ moo; nĩ kana ngũtw’ĩkĩthye ĩanzo, na ala mavatwĩe ma kũtimbwa: na mũkakua kĩvũthya kya andũ makwa.

← Chapter 5 Jump to: Chapter 7 →