Micah 4

Kamba (Mbivilia) 1956

← Chapter 3 Jump to: Chapter 5 →

1Ĩndĩ mĩthenya ya mũminũkĩlyo kũkeethĩwa, kĩĩma kĩ nyũmba ya Yeova kĩkekalaa kĩ kĩtũlu kwĩ ila ingĩ, na kũkĩla ĩũlũ wa tũlĩma; na ngo sya andũ ikaendaa vo.

2Na mbaĩ mbingĩ ikathi ikyasya, Ũkai, twambate kĩĩmanĩ kya Yeova, na nyũmbanĩ ya Ngai wa Yakovo; na akatũmanyĩasya mĩendele yake, na tũkaendaa nzĩanĩ syake. Nũndũ mĩao ĩkaumaa Saioni, na ndeto ya Yeova ĩkaumaa Yelusaleme;

3na akasilanasya ngo mbingĩ sya andũ, na akatusĩaa mbaĩ syĩ vinya sya kũasa maũndũ: na makatusya mbyũ syoo itw’ĩke mĩthya ya maembe ma ng’ombe, na matumo moo tũvyũ twĩ ngoto twa ũsea; mbaĩ ndĩkokĩlĩlya mbaĩ ĩngĩ ũvyũ, o na itikemanyĩsya kaũ ĩngĩ.

4Ĩndĩ makekalaa kĩla mũndũ ĩtina wa mũsavivũ wake na ĩtina wa mũkũyũ wake; na vati ũmwe ũkatuma makĩa: nũndũ kanyw’a wa Yeova wa nguthu nũneenete ũu.

5Nũndũ ngo syonthe sya andũ iendaa kĩla ũmwe syĩtwanĩ ya ngai yake: na ithyĩ tũkaendaa syĩtwanĩ ya Yeova Ngai waitũ tene na tene.

6Mũthenya ũsu, ngatũnga ũla ũthuaa, na ngatũnga ũla ũlũngĩtw’e, na ũla nĩthĩnĩtye, easya ũu Yeova;

7na ngatw’a ũla wathuaa ũtialo, na ũla wekĩtw’e kũasa mbaĩ yĩ vinya: na Yeova akamasumbĩka kĩĩmanĩ kya Saioni kuma yu o na kũvika tene na tene.

8Naku, we mwako mũtũlu wa mũnyoolo wa ndĩthya ya mbũi na malondu, kalĩma ka mwĩĩtu wa Saioni, kwaku ũkooka, ĩĩ, ũsumbĩko wa mbee ũkooka, ũsumbĩ wa mwĩĩtu wa Yelusaleme.

9Na yu nĩkĩ ũkũkaya na wasya mũnene? No kwĩ mũsumbĩ nthĩnĩ waku, mũtai waku nĩwaĩte, ũndũ woo ũkũkwatĩte ta mũndũ mũka ũnũkwaũnya?

10Ĩthĩwa na woo, na ũithĩna ũsyae, we mwĩĩtu wa Saioni, o ta mũndũ mũka ũnũkwaũnya; nũndũ yu ũkauma ndũanĩ, na ũkatũa weũnĩ, na ũkathi o kũvika Mbaviloni: nĩkw’o wĩtangĩĩĩwa; nĩkw’o Yeova wĩkwovoesya kuma kw’okonĩ kwa amaitha maku.

11Na yu mbaĩ mbingĩ nikũmbanĩe, ila syaasya, Navukw’e, na metho maitũ nĩmone ũndũ tũkwenda ĩũlũ wa Saioni.

12Ĩndĩ matyĩsĩ mosũanĩo ma Yeova, o na matiũmanya nzama yake; nũndũ nũmombanĩtye ta syove sya ngetha kĩvũĩonĩ.

13Ũkĩla, we mwĩĩtu wa Saioni, ũvũe; nũndũ ngatw’ĩkĩthya ũvya waku kĩaa, na ngatw’ĩkĩthya mavũngũ maku ũthuku; na ũkakũna ngo mbingĩ sya andũ itw’ĩke tũlungu: na ngavathĩa Yeova ũtandĩthyo woo, na syĩndũ syoo Mwĩaĩi wa nthĩ yonthe.

← Chapter 3 Jump to: Chapter 5 →