Micah 5

Kamba (Mbivilia) 1956

← Chapter 4 Jump to: Chapter 6 →

1Yu ũkeeyũmban’ya nguthu nguthu, we mwĩĩtu wa nguthu; nũtũthyũlũlũkĩte atũtw’ĩkanĩsye; makakũna mũsili wa Isilaeli na ndata ĩtau.

2Ĩndĩ we, Mbethi‐leemu ya Evilatha, ũla wĩ mũnini ũtatalwa katĩ wa ngili sya Yuta, kwaku kũkauma ũmwe ambũkĩe ũla wĩtw’ĩka mũsumbĩki kwa Isilaeli; ũla kumĩla kwake nĩ kuma ĩvinda ya tene, kuma tene tene.

3Kwondũ wa ũu akaekana namo, kũvika ĩvinda yĩla ũla ũnũkwaũnya wĩĩthĩwa asyaĩte: nĩvo ĩndĩ ũtialo wa ana‐a‐ĩthe make wĩsyoka kwa ana ma Isilaeli.

4Na akaũngama, na akaĩthya ĩĩthya yake vinyanĩ wa Yeova, ũnenenĩ wa syĩtwa ya Yeova Ngai wake: na makekala; nũndũ yu akeethĩwa e mũnene kũvika itulunĩ sya nthĩ.

5Na mũndũ ũsu akeethĩwa mũuo witũ. Yĩla Mũasuli wĩũka nthĩ yaitũ, na aikinyanga nthĩnĩ wa nyũmba sitũ nene mbanakavye, nĩvo twĩmũkĩlĩlya aĩthi mũonza, na andũ anene nyanya.

6Na makaananga nthĩ ya Asuli na ũvyũ, o na nthĩ ya Nimiloti molikĩlonĩ mayo: nake akatũtangĩĩa kuma kwa Mũasuli, yĩla wĩũka nthĩ yaitũ, na yĩla wĩkinyanga mũvakanĩ witũ.

7Na ũtialo wa Yakovo ũkeethĩwa katĩ wa ngo mbingĩ sya andũ o ta ĩmwe kuma kwa Yeova, ta mĩono ya mbua nyekinĩ, ila itekalaa nũndũ wa mũndũ, o na kweteela ana ma andũ.

8Na ũtialo wa Yakovo ũkeethĩwa katĩ wa i mbaĩ, o katĩ wa ngo mbingĩ sya andũ, ta mũnyambũ katĩ wa nyamũ sya mũtitũnĩ, ta mũnyambũ wa mũika katĩ wa ndĩthya sya malondu; ũla, ethĩwa wavĩtĩla vo, ũangĩaa nthĩ na kũtembũanga tũlungu, na kũti wa kũtangĩĩa.

9Kw’oko kwaku nĩkũkĩlw’e ĩũlũ wa nthũ syaku, na amaitha maku onthe nĩmavetwe.

10Na kũkeethĩwa mũthenya ũsu, ngaveta mbalasi syaku syume vala ũĩ, na ngaananga makasya maku ma kaũ, easya ũu Yeova:

11na ngaveta ndũa sya nthĩ yaku, na ngang’uthũlanga ngome syaku syonthe syĩ vinya.

12Na ngaveta mooi maume kw’okonĩ kwaku; na ndũkethĩwa na ala mathanaa maũndũ ĩngĩ:

13na ngaveta mĩvw’anano yaku myasũvye na ituĩ syaku kuma vala ũĩ; na ndũkathaitha ĩngĩ wĩa wa moko maku;

14na ngakũa Aselimu yaku yume vala ũĩ; na ngaananga ndũa syaku.

15Na ngaĩvanĩsya kwa mbaĩ ingĩ ila iteew’aa nĩ mũthatu na mũthilĩku.

← Chapter 4 Jump to: Chapter 6 →