bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (MBIVILIA ŨVOO MŨSEO)
/
2 Samuel 15
2 Samuel 15
Kamba (MBIVILIA ŨVOO MŨSEO)
← Chapter 14
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 16 →
1
Ĩtina wa maũndũ asu, Avisalomu nĩwamanthie ĩkasya na mbalasi syake, na aũme mĩongo ĩtano makũmũtongoeasya.
2
Nĩwaamũkaa kwakya tene akaũngama ũtee wa nzĩa ĩla ĩendete mũvĩanĩ wa ndũa. Ĩvinda yonthe yĩla mũndũ wooka e na ĩkoani yaĩlĩte kũtwawa kwa mũsumbĩ aumye ũtw'ĩo, Avisalomu nĩweetaa mũndũ ũsu na kũmũkũlya atĩĩ, “Wumĩte ndũanĩ yĩva?” Mũndũ ũsu asũngĩa asya aumĩte mbaĩnĩ ĩmwe ya Ĩsilaeli,
3
nĩvo ĩndĩ Avisalomu wamwĩaa, “Kĩla ũũkũlya nĩ kya w'o na nĩkyaĩlĩte, ĩndĩ vai mũndũ ũnyuvĩtwe nĩ mũsumbĩ wa ũkwĩthukĩĩsya.”
4
O ta ũu nĩwamwĩaa atĩĩ, “Kethĩwa nĩnĩnyuvĩtwe ngatw'ĩka mũsili nthĩ ya Ĩsilaeli, nĩvo ĩndĩ mũndũ o na wĩva ũla wĩ na ĩkoani kana ũndũ o na wĩva, ooka vala nĩĩ nĩthĩwa ngĩsisya nĩ kana mũndũ ũsu akwate ũsili wa katĩ.”
5
Ũu wĩ o vo, yĩla mũndũ wooka kũla kwĩ Avisalomu, na ayenda kũkumana nĩ kana amũnenge ndaĩa, nĩwamũkwataa na kũmũkethya na ngethi ya wendo.
6
Ũu nĩw'o Avisalomu weekaa andũ onthe ma Ĩsilaeli ala mookaa kũla kwĩ mũsumbĩ nĩ kana amanenge ũsili wa katĩ. Kwoou nĩwatumie mambĩĩa kũmwenda mbee wa ũndũ mendete Ndeviti.
7
Ĩtina wa myaka ĩna Avisalomu nĩweeie Mũsumbĩ Ndeviti atĩĩ, “Mũnene, eka nĩthi Eviloni na kwĩanĩsya ũndũ neevĩtie kũla kwĩ Mwĩai Ngai.
8
Yĩla natwĩe Ngesuli nthĩ ya Silia, nĩneevĩtie kũla kwĩ Mwĩai Ngai kana ethĩwa akandũnga Yelũsalemu, ngamũthaitha.”
9
Mũsumbĩ amwĩa, “Enda na mũuo.” Kwoou Avisalomu nĩwaendie Eviloni.
10
Nĩvo ĩndĩ Avisalomu watũmie andũ mbaĩnĩ syonthe sya Ĩsilaeli kwa kĩmbithĩ mathi makatavye andũ atĩĩ, “Mweew'a wasya wa soo, neenai na wasya mũnene mwasye, ‘Avisalomu nĩwatw'ĩka mũsumbĩ wa Eviloni!’ ”
11
Avisalomu nĩwaendanĩtye na aũme maana elĩ kuma Yelũsalemu. Nĩwamathoketye ta aeni, na maendete me na ngoo ntheu na mayeesĩ kĩndũ ĩũlũ wa ũndũ Avisalomu wavangĩte.
12
Yĩla Avisalomu wathembaa nthembo sya kũvĩvwa, nĩwatũmanie Aithoveli ũla watũaa ndũanĩ ya Ngilo, na waĩ mũtai wa Ndeviti oke kuma ndũanĩ ĩsu yake ya mũsyĩ. Kwoou mũvango wa Avisalomu nĩwaendeeie kwĩthĩwa wĩ mũlũmu, na aatĩĩi make maendeea kwingĩva.
13
Mũndũ ũmwe nĩwaendie na atavya Ndeviti amwĩa atĩĩ, “Andũ ma Ĩsilaeli onthe maatĩĩe Avisalomu.”
14
Nĩvo ĩndĩ Ndeviti weeie anini make onthe ala maĩ vamwe nake Yelũsalemu atĩĩ, “No nginya tũthi tũtekweteela ethĩwa nĩtũkwenda kũkĩa Avisalomu! Ĩkalaatei! Ethĩwa ti ũu nũkũka atw'ĩthĩe vaa, na kũtũkita atũsinde na kũaa andũ onthe ala me ndũanĩ ĩno!”
15
Anini make nĩmamũsũngĩie mamwĩa atĩĩ, “Ĩĩ nĩw'o mũnene, nĩtwĩyũmbanĩtye kwĩka maũndũ onthe ala ũũtũtavya.”
16
Mũsumbĩ nĩwaumaalile athi e vamwe na andũ onthe ma mũsyĩ wake. Ĩndĩ nĩwatiie iveti syake sya ndũsyo ĩkũmi isũvĩae nyũmba yake ya kĩ-ũsumbĩ.
17
Yĩla mũsumbĩ waumĩte ndũanĩ e vamwe na andũ ala angĩ, nĩmaũngamie vala ve nyũmba ĩla yĩ mũthya wa ndũa ĩsu.
18
Aũme onthe ala Ndeviti waĩ namo nĩmookie mamũvĩtũka, me vamwe na andũ meetawa Akelethi na Avelethi, ala nĩmo maĩ asikalĩ ma kũsunga mũsumbĩ, na andũ maana thanthatũ ala mookanĩtye vamwe nake kuma ndũanĩ ya Ngathi.
19
Mũsumbĩ nĩwakũlilye Itai mũtongoi wa andũ asu maumĩte Ngathi atĩĩ, “Ũendanĩtye naitũ nĩkĩ? Syoka ũkekalany'e na Mũsumbĩ Avisalomu. Wĩ mũeni, na wũkĩte kwĩvitha kuma nthĩ ĩla yaku mwene.
20
No ĩndĩ ũnookie kũũ, kwoou ndyaĩlĩte kũtuma wanganga kũũ wĩ vamwe nakwa. O nakwa ndyĩsĩ kũla nĩendete. Syoka wĩ vamwe na andũ ma nthĩ yaku, na Mwĩai Ngai nĩakwĩke nesa na kwĩthĩwa e mũĩkĩĩku kũla ũĩ.”
21
Ĩndĩ Itai asũngĩa mũsumbĩ amwĩa atĩĩ, “Nĩngwĩvĩta ĩsyĩtwanĩ ya Mwĩai Ngai ũla wĩ thayũ, na kwĩvĩta na thayũ waku kana ngaendanasya naku kĩla ĩvinda kũndũ kw'onthe kũla wĩthi, o na ethĩwa nĩ kũvikĩa kũkw'a.”
22
Nĩvo ĩndĩ Ndeviti weeie Itai atĩĩ, “Enda ũvĩtũke.” Kwoou Itai, nĩwavĩtũkie e vamwe na aũme make onthe, na andũ ma mĩsyĩ yoo ala maĩ vamwe nake.
23
Andũ onthe ma nthĩ ĩsu nĩmaĩie na wasya mũnene yĩla andũ asu maendete. Mũsumbĩ nĩwaingie kalũsĩ ka Kĩtilonĩ aatĩĩwe nĩ aũme make, na me vamwe mathi ngalĩko ya weũ.
24
Mũthembi Aviathali nĩwambatie ooka, na o ta ũu mũthembi Nzatoki o nake ooka, e vamwe na Alivai onthe makuĩte Ĩsandũkũ ya Ũtianĩo ya Ngai. Nĩmaiie Ĩsandũkũ yĩu nthĩ nginya andũ onthe mavĩtũka mauma ndũanĩ.
25
Nĩvo ĩndĩ mũsumbĩ weeie Nzatoki atĩĩ, “Kua Ĩsandũkũ ya Ũtianĩo ya Ngai ũtũnge ndũanĩ. Ethĩwa Mwĩai Ngai nũkwendeew'a ninyie, ĩvinda yũkĩte akandeka nĩsyoke nĩ kana nĩyone, na ndyona ĩngĩ Ĩeema ĩtheu ya kũkomanĩa na Ngai.
26
Ĩndĩ alea kwendeew'a ninyie, nĩembĩka ũndũ ũkwenda.”
27
Mũsumbĩ nĩwakũlilye mũthembi Nzatoki atĩĩ, “We ndwĩ mũndũ ũla wĩthĩawa na woni wa maũndũ? Syoka ndũanĩ na mũuo wĩ vamwe na mwana waku Aimaasi, na Aviathali e na mwana wake Yonathani.
28
Nĩngũthi kweteela nĩ weũnĩ vala ũsĩ ũingĩlawa, nginya mũtũmane nũke kũtavw'a ũndũ maũndũ mailyĩ.”
29
Kwoou Nzatoki na Aviathali nĩmatũngie Ĩsandũkũ ya Ũtianĩo Yelũsalemu na mekala kw'o.
30
Ndeviti nĩwambatie Kĩĩmanĩ kya Mĩthata aĩĩte; ndaĩ na iatũ na nĩwavw'ĩkĩte mũtwe onany'e kana aĩ na kyeva. Andũ onthe ala mamũatĩĩe o namo nĩmeevw'ĩkĩte mũtwe na nĩmaĩĩte.
31
Yĩla Ndeviti wataviw'e kana Aithoveli e na ngwatanĩo na Avisalomu ya kũmũlea, nĩwavoyie asya atĩĩ, “Ame Mwĩai Ngai, alyũla ũtao wa Aithoveli ũtw'ĩke wa mana!”
32
Yĩla Ndeviti wavikie kĩĩmanĩ mũthya, vala andũ mathaithĩaa Ngai, Usiai ũla waĩ Mũaliki nĩwamũthaũie. Nĩwatembũangĩte ngũa yake ndaasa, na akeyũmba kĩtoo mũtwe.
33
Ndeviti nĩwamwĩie atĩĩ, “Twaendany'a vamwe wĩĩthĩwa wandw'ĩkĩa mũio.
34
Ĩndĩ ũtonya kũndetheesya ethĩwa nũũsyoka ndũanĩ na kũtavya Avisalomu kana yu ũkamũthũkũmaa wĩ mũĩkĩĩku o tondũ wathũkũmaa ĩthe wake. O ta ũu ũkeekaa ũndũ ũtonya wanange ũtao wa Aithoveli.
35
Nzatoki na Aviathali ala nĩ athembi makeethĩawa vau; matavasye maũndũ onthe ala weew'a nyũmbanĩ ya mũsumbĩ.
36
Me vamwe na ana moo Aimaasi na Yonathani, na nũtonya kũmatũma makoka kũndavya maũndũ onthe ala wĩw'ĩte.”
37
Kwoou Usiai mũnyanyae wa Ndeviti nĩwavikie Yelũsalemu ĩvindanĩ yĩla Avisalomu walikaa ndũanĩ ĩsu.
← Chapter 14
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 16 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24