2 Samuel 19 — Kamba (MBIVILIA ŨVOO MŨSEO)

1Yoavu nĩwataviw'e kana Mũsumbĩ Ndeviti aĩ na kyeva, na nĩwaĩaa nũndũ wa Avisalomu.

2Mũthenyanĩ ũsu asikalĩ ma Ndeviti nĩmaekie kwĩthĩwa me na ũtanu nũndũ wa ũsindi woo, nĩkwĩthĩwa nĩmamanyie kana mũsumbĩ aĩ na kyeva nũndũ wa mwana wake.

3Kwoou nĩmasyokie ndũanĩ mavindĩtye, ta asikalĩ me na nthoni makĩĩte kuma kaũnĩ.

4Mũsumbĩ nĩwavw'ĩkie ũthyũ wake na aĩa na wasya mũnene ayasya atĩĩ, “Mwana wakwa Avisalomu! Avisalomu, mwana wakwa, mwana wakwa!”

5Nĩvo ĩndĩ Yoavu waendie nyũmba kwa mũsumbĩ na amwĩa atĩĩ, “Ũmũnthĩ nũsonokisye asikalĩ maku. Asikalĩ asu nĩmo manakũtangĩĩie ndũkoawe, na matangĩĩa ana na eĩtu maku, iveti syaku na iveti syaku sya ndũsyo.

6Wendete ala makũmenaa, na ũkamena ala makwendete. Ũmũnthĩ nĩtwamanya nesa kana ndwĩ vata na anene ma asikalĩ, na asikalĩ moo. Nĩona kana wendeew'a kethĩwa ũmũnthĩ Avisalomu e thayũ, na ithyĩ ithyonthe tũyĩthĩwa twĩ akw'ũ.

7Kwoou yu ũkĩla umaale na ũithi ũkaneene na athũkũmi maku ũmakiakisye. Nĩngwĩvĩta ĩsyĩtwanĩ ya Mwĩai Ngai kana ethĩwa ndwĩthi, vai mũndũ eĩkalany'a naku ũmũnthĩ wĩoo. Ũndũ ũsu wĩĩthĩwa wĩ mũthũku kwaku mbee wa maũndũ onthe mathũku ala makũkwatĩte kuma wĩ mũnini kũvika ũmũnthĩ.”

8Nĩvo ĩndĩ mũsumbĩ wookĩlile na athi kwĩkala vakuvĩ na mũvĩa wa ndũa. Asikalĩ make nĩmamanyie kana ailyĩ vakuvĩ na mũvĩa, na onthe mathi moombana mamũthyũlũlũkĩte. Ĩvindanĩ yĩu andũ ma Ĩsilaeli maĩ manakĩa na kũsyoka mĩsyĩnĩ yoo.

9Andũ onthe ma mbaĩ sya Ĩsilaeli nĩmambĩĩie kũkananĩa mayasya atĩĩ, “Mũsumbĩ Ndeviti nĩwe watũtangĩĩie kuma kwa amaitha maitũ. O ta ũu nĩwe watũtangĩĩie kuma kwa Avilisiti. Ĩndĩ yu nũnakĩie auma nthĩ yaitũ nũndũ wa Avisalomu.

10Nĩtwanyuvie Avisalomu atw'ĩka mũsumbĩ waitũ, ĩndĩ nũnooaĩwe kaũnĩ. Kwoou kĩla kĩtuma tũtatũnga Mũsumbĩ Ndeviti ĩngĩ nĩ kyaũ?”

11Mũsumbĩ Ndeviti nĩwamanyie ndeto ila andũ onthe ma Ĩsilaeli maneenaa. Nĩwatũmie mũthembi Nzatoki na mũthembi Aviathali mathi kwa atongoi ma Yuta makamakũlye atĩĩ, “Nĩ kyaũ kĩũtuma mwĩthĩwa mwĩ andũ ala ma mũthya kũtũnga mũsumbĩ nyũmbanĩ ya kĩ-ũsumbĩ?

12Inyw'ĩ mwĩ ana-a-inyia makwa, na nĩtũileny'e ũndũ kĩ-nthakame. Kwoou nĩ kyaũ kĩũtuma mwĩthĩwa mwĩ ma mũthya kũtũnga mũsumbĩ?”

13O ta ũu Ndeviti nĩwamatũmie mathi makee Amasa atĩĩ, “Nĩtũileny'e ũndũ nĩ naku kĩ-nthakame. Kuma ũmũnthĩ nĩnakũnyuva ũtw'ĩke mũnene wa asikalĩ makwa vandũ va Yoavu. Mwĩai Ngai nĩambũae nalea kwĩka ũu!”

14Ndeto isu Ndeviti waneenie nĩsyatumie andũ onthe ma Yuta mamũĩkĩĩa. Kwoou nĩmatũmanie kũla waĩ mamwĩa nĩasyoke e vamwe na asikalĩ make onthe.

15Mũsumbĩ Ndeviti e nzĩanĩ asyokete, nĩwakomanĩie na andũ ma Yuta Ũsĩnĩ wa Yolotani. Andũ asu mookĩte Ngilikali kũmũthaũa na kũmũingya ũsĩ.

16Simei mwana wa Ngela wa mbaĩ ya Mbengyameni, kuma ndũanĩ ya Mbaulimu, nĩwatheeie mĩtũkĩ e na andũ ma Yuta oke kũthaũa Mũsumbĩ Ndeviti.

17Simei ookanĩtye vamwe na andũ ngili ĩmwe ma mbaĩ ya Mbengyameni. Nziva mũthũkũmi wa nyũmba wa Saũlo, e vamwe na ana make ĩkũmi na atano, na athũkũmi make mĩongo ĩlĩ, nĩmatheeie mĩtũkĩ Ũsĩnĩ ya Yolotani makathaũe mũsumbĩ.

18Nĩmaingie ũsĩ makuĩtwe nĩ ĩsiwa mathi kũka na mũsumbĩ, vamwe na andũ ma mũsyĩ wake. O ta ũu nĩmeekaa maũndũ onthe ala mũsumbĩ ũkwenda mekwe. Ĩvindanĩ yĩla mũsumbĩ weeyũmbanasya kũinga ũsĩ, Simei mwana wa Ngela nĩwakomie nthĩ na ĩvu mbee wake amũnenge ndaĩa,

19na amwĩa atĩĩ, “Mũnene, nĩkwĩsũva ũndekee ĩvĩtyo yĩla neekie ĩvinda yĩla waumĩte Yelũsalemu. Ndũkandalĩle kwĩthĩwa nĩ na ĩvĩtyo, kana kwia ũndũ ũsu ngoonĩ.

20Nyie mũthũkũmi waku nĩnĩsĩ kana nĩnĩvĩtĩtye, ĩndĩ ũmũnthĩ nĩnooka vaa ta mũndũ wa mbee kuma mũsyĩnĩ wa Yosevu w'onthe, nĩ kana ngũthaũe we mũnene wakwa mũsumbĩ.”

21Nĩvo ĩndĩ Avisai mwana wa Nzeluia waisye atĩĩ, “Simei aĩlĩte kũawa nũndũ wa ĩvĩtyo yĩu yake. Nĩwaumie mwĩtĩkĩw'a mauta wa Mwĩai Ngai.”

22Ĩndĩ Ndeviti nĩwakũlilye Avisai na mwana-a-inyia Yoavu atĩĩ, “Ũla wamũkũlya mũnengane woni wenyu nũũ? Mwĩenda kũnenga thĩna? Ninyie mũsumbĩ wa Ĩsilaeli yu, na vai Mũĩsilaeli waĩlĩte kũawa ũmũnthĩ.”

23Mũsumbĩ nĩweevĩtie kũla kwĩ Simei amwĩa atĩĩ, “Ndwĩũawa.”

24Mevivosethi mwana wa Saũlo o nake nĩwatheeie nĩ kana athaũe mũsumbĩ. Mevivosethi ndaĩ aathamba maũũ kana akenza kĩng'ew'a kyake, kana akavũa ngũa syake kuma mũthenyanĩ ũla mũsumbĩ waumie Yelũsalemu, kũvika yĩla wasyokie amina kũsinda.

25Yĩla Mevivosethi wavikie kuma Yelũsalemu athaũĩte mũsumbĩ, mũsumbĩ nĩwamũkũlilye atĩĩ, “Mevivosethi, waleile kũendany'a nakwa nĩkĩ?”

26Nake amũsũngĩa amwĩa atĩĩ, “Mũnene, o tondũ wĩsĩ, nyie nĩ maũũ mathũku. Neeie Nziva mũthũkũmi wakwa ailĩĩle matandĩko ĩng'oinĩ yakwa nĩ kana yĩngue nĩendany'e naku, ĩndĩ nĩwangengie.

27Nĩwakũtavisye maũndũ ma ũvũngũ ĩũlũ wakwa we mũnene, ĩndĩ we wĩ ũndũ ũmwe na mũlaĩka wa Ngai. Kwoou ĩka ũndũ ũla ũkwona wĩ mũseo.

28Mũnene, waĩlĩte kwĩthĩwa wooaie nzyawa sya ĩthe wakwa syonthe, ĩndĩ nĩwanengie mwanya wa kũĩsanĩa naku. Mũnene, nyie ndi na mwanya wa kũendeea ũkũkũlya ũmbĩke nesa.”

29Nĩvo ĩndĩ mũsumbĩ wamwĩie atĩĩ, “Vai vata waku wa kũneena ũndũ ũngĩ, nĩnĩvangĩte kana we na Nziva nĩmũkũaana ng'ũndũ ya Saũlo.”

30Mevivosethi nĩweeie mũsumbĩ atĩĩ, “Nziva nĩamesye ng'ũndũ ya Saũlo yonthe, nũndũ yu we mũnene wakwa nĩwasyoka mũsyĩ kwaku wĩ ũsũvĩonĩ.”

31Mbalisilai ũla watũaa Ngileati o nake nĩwatheeie kuma Lokelimu, ooka kumaasya mũsumbĩ ainge Ũsĩ wa Yolotani.

32Mbalisilai aĩ mũtumĩa mũkũũ mũno; aĩ na ũkũũ wa myaka mĩongo nyanya. O ta ũu aĩ mũndũ mũthwii mũno. Nĩwe watwaĩaa mũsumbĩ lĩu Maanaimu ĩvindanĩ yĩla mũsumbĩ wekalaa kw'o.

33Mũsumbĩ nĩwamwĩie atĩĩ, “Inganĩsya wũke tũendany'e Yelũsalemu, nĩngũthi ũkũsũvĩa.”

34Ĩndĩ Mbalisilai amũsũngĩa amwĩa atĩĩ, “Ve vata mwaũ wa kũendany'a Yelũsalemu na mũsumbĩ, na ndi na ĩvinda ĩasa ya kwĩkala thayũ?

35Yu nĩ na ũkũũ wa myaka mĩongo nyanya, na vai kĩndũ kĩtonya kũndanĩthya. O ta ũu nyie mũthũkũmi waku nditonya kũmanya mũsamo wa lĩu, kana wa syĩndũ sya kũnyw'a, na nditonya kwĩw'a wasya wa andũ mekwina. Nĩĩthĩwa natw'ĩka mũio kwaku we mũsumbĩ.

36Nyie ndyaĩlĩte kũnengwa ĩtuvi yĩana ũu, kwoou nĩendany'a naku vandũ va mũendo mũnini mũingo wa Ũsĩ wa Yolotani.

37Mũnene, eka nzyoke mũsyĩ ngakw'ĩĩe vakuvĩ na vala asyai makwa mathikĩtwe. Nĩnakũnenga Kĩmiamu mwana wakwa atw'ĩke mũthũkũmi waku. Mwose mũendany'e, na ũimwĩka ũndũ ũkwona wĩ ũseo.”

38Nake mũsumbĩ amwĩa atĩĩ, “Nĩngũendany'a na Kĩmiamu, na kũmwĩka maũndũ onthe ala makwendeeasya. Ngakwĩkaa maũndũ onthe ala ũkwenda.”

39Nĩvo ĩndĩ mũsumbĩ waingie Ũsĩ wa Yolotani e vamwe na andũ ala angĩ onthe. Nĩwakethisye Mbalisilai na ngethi ya wendo na amũathima, nake Mbalisilai enũka.

40Mũsumbĩ Ndeviti nĩwaingie Ũsĩ wa Yolotani athi Ngilikali e vamwe na Kimiamu. O ta ũu mũsumbĩ nĩwaumaaĩtw'e nĩ andũ onthe ma Yuta, na nyusu ya andũ ma Ĩsilaeli.

41Nĩvo ĩndĩ andũ onthe ma Ĩsilaeli maendie vala ve mũsumbĩ na mamũkũlya atĩĩ, “Nĩkĩ ana-a-ĩthe maitũ andũ ma Yuta manasũanĩie kana manaĩ na mwanya wa ũkumaasya vamwe na andũ ma mũsyĩ waku, na asikalĩ maku mwainga Ũsĩ wa Yolotani?”

42Namo andũ ma Yuta masũngĩa masya atĩĩ, “Tũneekie ũu nũndũ mũsumbĩ nĩ waitũ kĩ-mũsyĩ na nũileny'e ũndũ naitũ. Ũndũ ũsu ũmũthatisye nĩkĩ? Mũsumbĩ ndaneetũthooea lĩu, o na ndaneetũnenga mũthĩnzĩo o na ũmwe.”

43Andũ ma Ĩsilaeli masũngĩa masya, “O na ethĩwa Mũsumbĩ Ndeviti nĩ ũmwe wenyu, ithyĩ twĩ na kĩtumi kya kwĩthĩwa nake ta mũsumbĩ waitũ kũndũ ĩkũmi, mbee wa ũndũ mũtonya kwĩthĩwa na kĩtumi. Mwĩtũvũthya nĩkĩ? Mũikolwe kana nĩ ithyĩ twaĩ ma mbee kũneena ĩũlũ wa kũtũnga mũsumbĩ mũsyĩ!” Ĩndĩ ndeto ila andũ ma Yuta maneenie nĩsyo syaĩ na vinya mbee wa ila andũ ma Ĩsilaeli maneenie.