2 Samuel 24

Kamba (MBIVILIA ŨVOO MŨSEO)

← Chapter 23 Jump to:

1Mwĩai Ngai nĩwathatiw'e ĩngĩ nĩ andũ ma Ĩsilaeli, na kwoou atuma Ndeviti amathokoa. Nĩweeie Ndeviti atĩĩ, “Enda ũkatale andũ ma Ĩsilaeli na ma Yuta.”

2Kwoou Ndeviti nĩweeaĩie Yoavu na anene ala angĩ ma asikalĩ waĩ namo amea atĩĩ, “Endai kĩla vandũ mbaĩnĩ sya Ĩsilaeli, kuma Ndani ngalĩko ya ĩũlũ, kũthi kũvika Mbeeli-sieva ngalĩko ya ĩtheo na mũitala andũ. Nĩenda kũmanya ũtalo woo.”

3Ĩndĩ Yoavu nĩwasũngĩie mũsumbĩ amwĩa atĩĩ, “Mwĩai Ngai, Ngai waku nĩatume andũ ma Ĩsilaeli maingĩva kũndũ ĩana mbee wa ũndũ meana, naku we mũnene wakwa mũsumbĩ ũyĩkala thayũ nginya wĩona Ngai eeka ũu. Ĩndĩ we mũnene wakwa mũsumbĩ wĩenda kwĩka ũu nĩkĩ?”

4Ĩndĩ ndeto sya mũsumbĩ nĩsyeethĩiwe syĩ na vinya mbee wa sya Yoavu, na sya anene ala angĩ ma asikalĩ. Kwoou nĩmaumie vala mũsumbĩ waĩ na mathi kũtala andũ ma Ĩsilaeli.

5Nĩmaingie Ũsĩ wa Yolotani, na mambĩla maeema ngalĩko ya ĩtheo ya Aloeli, ndũanĩ yĩ katĩ wa mwanda kĩsionĩ kya nthĩ ya Ngandi. Kuma vau nĩmaendie ngalĩko ya ĩũlũ nginya Yaseli.

6Nĩvo ĩndĩ maendie mavika Ngileati, na o ta ũu mathi ndũanĩ ya Katesi ĩla yĩ kĩsionĩ kya nthĩ ya Aititi. Nĩmaendie nthĩ ya Ndani, na kuma vau mathi Sitoni ngalĩko ya ũthũĩlonĩ wa syũa.

7O ta ũu nĩmaendie ngalĩko ya ĩtheo ndũanĩ mbiĩĩe ya Tile, na mathi ndũanĩ sya Aivi na Akanaani, na maminĩa ndũanĩ ya Mbeeli-sieva ĩla yĩ Nengevu, ngalĩko ya ĩtheo ya Yuta.

8Nĩmasyokie Yelũsalemu ĩtina wa myei kenda na mĩthenya mĩongo ĩlĩ, mamina kũthi kĩla vandũ nthĩ ĩsu yonthe.

9Yoavu nĩwanengie mũsumbĩ ũtalo wa andũ onthe. Vaĩ andũ matonya kũthi kũkita ngili maana nyanya ma Ĩsilaeli, na andũ ngili maana atano ma Yuta.

10Ndeviti amina kũtala andũ, nĩwambĩĩie kũthĩnĩka mũno thayũnĩ, na aneena na Mwĩai Ngai amwĩa atĩĩ, “Nĩnĩvĩtĩtye mũno kwa kwĩka ũndũ ũũ! Ĩndĩ yu ame Mwĩai Ngai, nĩngũkwĩsũva ũndekee naĩ yakwa nyie mũthũkũmi waku, nũndũ nĩkie ta mũndũ mũtumanu.”

11Ũnĩ ũsu ũngĩ kwakya Ndeviti atanamba kũamũka, Mwĩai Ngai nĩwaĩ aneenie na Ngati ũla waĩ mwathani wa Ndeviti akamwĩa atĩĩ,

12“Enda ũkaneene na Ndeviti ũmwĩe, ‘Ũũ nĩw'o Mwĩai Ngai ũkwasya: Nĩngũũnenga maũndũ atatũ. Nyuva ũmwe katĩ wamo ũla ngũũkany'a naw'o.’ ”

13Kwoou Ngati nĩwaendie kũla kwĩ Ndeviti na amũkũlya atĩĩ, “Nũkwenda kwĩthĩwe na myaka ĩtatũ ya yũa nthĩ yaku? Kana myei ĩtatũ ya kũkĩa amaitha maku makũatĩĩe? Kana mĩthenya ĩtatũ ya ũwau mũthũku nthĩ yaku? Yu ĩndĩ sũanĩa, na kũndavya nĩthi kwĩa ũla ũndũmie ata”

14Ndeviti nĩwasũngĩie Ngati amwĩa atĩĩ, “Nĩna thĩna mũnene mũno! Ĩndĩ ndikwenda kũkanw'a nĩ andũ. Eka Mwĩai Ngai atũkany'e nowe, nĩkwĩthĩwa e tei.”

15Kwoou Mwĩai Ngai nĩwaetie ũwau mũthũku nthĩ ya Ĩsilaeli kuma kwakya mũthenya ũsu nginya ĩvinda yĩla wanyuvĩte; kuma Ndani ngalĩko ya ĩũlũ kũthi kũvika Mbeeli-sieva ngalĩko ya ĩtheo, andũ ma Ĩsilaeli ngili mĩongo mũonza nĩmakwie.

16Mũlaĩka wa Mwĩai Ngai akilĩlye kwananga Yelũsalemu, Mwĩai Ngai nĩwavĩndũie mosũanĩo make, na eea mũlaĩka ũla wamoaa atĩĩ, “Eka nũu!” Mũlaĩka ũsu aĩ vakuvĩ na kĩvũĩo kya Mũyevusi weetawa Alaũna.

17Yĩla Ndeviti woonie mũlaĩka ũla wooaa andũ, nĩweeie Mwĩai Ngai atĩĩ, “Ninyie nĩvĩtĩtye na ngeka naĩ. Andũ aa angĩ mai na ĩvĩtyo. Nĩngũkwĩsũva, ngany'e ne inyie na andũ ma mũsyĩ wa ĩthe wakwa.”

18Mũthenyanĩ o ũsu Ngati nĩwaendie kũla kwĩ Ndeviti na amwĩa atĩĩ, “Ambata kĩvũĩonĩ kya Alaũna ũkakĩe Mwĩai Ngai kĩthembeo.”

19Ndeviti nĩweewie ũndũ Mwĩai Ngai wamwĩaĩe na athi o tondũ Ngati wamwĩie.

20Yĩla Alaũna woonie mũsumbĩ na anini make mokĩte kũla ũĩ, nĩwaendie na akumana mbee wa mũsumbĩ atina nthĩ na ũthyũ amũnenge ndaĩa.

21Nĩwaisye atĩĩ, “Mũnene, wooka vaa nĩkĩ?” Ndeviti amũsũngĩa, “Nooka kũthooa kĩvũĩo kyaku nakĩe Mwĩai Ngai kĩthembeo, nĩ kana ũwau ũũ mũthũku ũthele.”

22Alaũna nĩweeie Ndeviti atĩĩ, “Mũnene, osa ũmesye, na kũmũthembea Mwĩai Ngai kĩla ũkwenda. Nĩnakũnenga nzaũ syĩthĩwe nthembo ya kũvĩvw'a, masyoki masyo na ivũi sya ngetha ũtũmĩe ta ngũ.”

23Alaũna nĩwanengie mũsumbĩ syĩndũ isu na amwĩa atĩĩ, “Mwĩai Ngai, Ngai waku nĩetĩkĩle nthembo yaku.”

24Ĩndĩ mũsumbĩ nĩweeie Alaũna atĩĩ, “Aiee, no nginya ngũĩve syĩndũ isu. Ndithembea Mwĩai Ngai, Ngai wakwa nthembo ya kũvĩvw'a ndathooete.” Kwoou mũsumbĩ nĩwathooie kĩvũĩo kĩu na nzaũ isu thooa wa mbesa sya silĩva mĩongo ĩtano.

25Kwoou Ndeviti nĩwaakĩie Mwĩai Ngai kĩthembeo vau, na athemba nthembo sya kũvĩvw'a na sya ngwatanĩo. Mwĩai Ngai nĩweewie mboya syake, na aveta ũwau ũla waĩ nthĩ ya Ĩsilaeli.

← Chapter 23 Jump to: