bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (MBIVILIA ŨVOO MŨSEO)
/
2 Samuel 7
2 Samuel 7
Kamba (MBIVILIA ŨVOO MŨSEO)
← Chapter 6
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 8 →
1
Mũsumbĩ Ndeviti amina kwĩkala nyũmbanĩ yake ya kĩ-ũsumbĩ, na Mwĩai Ngai amũsũvĩa kuma amaithanĩ make onthe ala mamwĩlingĩlĩte,
2
nĩweeie mwathani Nathani atĩĩ, “Nyie nĩkalaa nyũmbanĩ yakĩtwe na mĩtĩ ya mĩkũũ, ĩndĩ Ĩsandũkũ ya Ũtianĩo ya Ngai yiĩtwe ĩeemanĩ!”
3
Nathani amũsũngĩa amwĩa atĩĩ, “Ĩka ũndũ ũũsũanĩa, nũndũ Mwĩai Ngai e vamwe naku.”
4
Ĩndĩ ũtukũ ũsu Mwĩai Ngai nĩwaneenie na Nathani amwĩa atĩĩ,
5
“Enda ũkee mũthũkũmi wakwa Ndeviti nĩmwĩa, ‘We ti ue ũũmbakĩa Ĩkalũ nĩkalae vo.
6
Kuma mũthenyanĩ ũla naumisye andũ ma Ĩsilaeli nthĩ ya Misili kũvika ũmũnthĩ ndyaaĩkala ĩkalũnĩ. Nĩendaa kuma vandũ vamwe kũthi vandũ vangĩ nĩ Ĩeemanĩ ta w'o wĩkalo wakwa.
7
Kũndũ kw'onthe kũla naendaa nĩ vamwe na andũ ma Ĩsilaeli, ndyaaneena na ũmwe wa atongoi moo ũla nĩaĩe atongoesye andũ makwa ma Ĩsilaeli, ngamũkũlya aleete kũmbakĩa ĩkalũ aitũmĩa mĩtĩ ya mĩkũũ nĩkĩ.’
8
“Kwoou tavya mũthũkũmi wakwa Ndeviti ũmwĩe nyie Mwĩai Ngai Mwene Ũtonyi W'onthe nĩmwĩa atĩĩ, ‘Nakumisye wĩanĩ wa kũĩthya malondu isesinĩ, na nakũtw'ĩkĩthya mũsumbĩ wa andũ makwa Ĩsilaeli.
9
Nĩnĩthĩĩtwe vamwe naku kũndũ kw'onthe kũla ũendaa, na nĩnĩsindĩte amaitha maku onthe makauma mbee waku. Yu nĩngũtuma wĩthĩwa na nguma, ta andũ ala angĩ me nguma ĩũlũ wa nthĩ.
10
Nĩngũnyuvĩa andũ makwa ma Ĩsilaeli vandũ, matũe vo, navo vayĩthĩwa ve voo, na mayĩthĩwa matekũthĩnw'a ĩngĩ. Andũ athũku maikamathĩny'a ĩngĩ ũndũ meekaa mbeenĩ,
11
na ũndũ meekaa kuma ĩvindanĩ yĩla nanyuvie asili mamatongoesye. O ta ũu ngakũnenga mũuo kuma amaithanĩ maku onthe. Mwĩai Ngai ekwĩa kana nũkũtuma mũsyĩ waku wĩthĩwa wĩ mũlũmu.
12
Yĩla wĩkw'a na ũithikwa vala aaũmae maku mathikĩtwe, ngatw'ĩkĩthya ũmwe wa ana maku mũsumbĩ, na kũtuma ũsumbĩ wake wĩthĩwa wĩ mũlũmu.
13
Ũsu nĩwe wĩmbakĩa Ĩkalũ, nakwa ngatuma ũsumbĩ wake wĩkala kũvika tene na tene.
14
Ngeethĩwa ĩthe wake, nake akeethĩwa mwana wakwa. Yĩla wavĩtya, ngamũkanasya o tondũ mũsyai ũkanasya mwana wake.
15
Ĩndĩ ndikaeka kũmwenda na wendo wakwa ũtaolekaa, ũndũ naekie kũmwenda Saũlo, ũla navetangie nĩ kana ũtw'ĩke mũsumbĩ.
16
Kĩla ĩvinda ũkeethĩawa na nzyawa, na ngatuma ũsumbĩ waku wĩkala tene na tene. Ũsumbĩ waku ndũkathela o na ĩndĩĩ.’ ”
17
Nathani nĩwatavisye Ndeviti maũndũ onthe ala Ngai wamũvuanĩisye.
18
Nĩvo ĩndĩ Mũsumbĩ Ndeviti waendie Ĩeemanĩ ĩtheu ya kũkomanĩa na Mwĩai Ngai, ekala nthĩ na avoya ayasya atĩĩ, “Ame Mwĩai Ngai Mũsumbĩ, nyie ndyaĩlĩtwe nĩ maũndũ ala ũmbĩkĩte, o na andũ ma mũsyĩ wakwa mayaĩlĩtwe.
19
Ũu wĩ o vo we Mwĩai Ngai Mũsumbĩ, nũvangĩte kwĩka maũndũ angĩ maingĩ; nĩwathĩte kwĩka nzyawa syakwa maũndũ maingĩ ĩvindanĩ yĩla yũkĩte. Naku we Mwĩai Ngai Mũsumbĩ nũndekete none maũndũ asu!
20
Nyie mũthũkũmi waku ndonya ũkũtavya ũndũ ũngĩ mwaũ na nũmbĩsĩ?
21
Wĩkĩte ũndũ ũsu mũnene, na ũkatuma nyie mũthũkũmi waku nĩmanya ũndũ ũsu, kwondũ wa ũseo wa ũtianĩo waku, na kwĩanana na kwenda kwaku.
22
Kwoou we Mwĩai Ngai Mũsumbĩ wĩ mũnene, na vai ũngĩ ũilyĩ taku; vai Ngai ũngĩ ate o we, kwĩanana na ũndũ ithyĩ ene twĩw'ĩte.
23
Vai andũ ma mbaĩ ĩngĩ ĩũlũ wa nthĩ mailyĩ ta andũ ma Ĩsilaeli, ala we Ngai waumisye ũkombonĩ ũmatw'ĩkĩthye andũ maku mwene, nĩ kana wĩthĩwe na nguma. Nĩweekie maũndũ manene na ma kũseng'ya kwa kũlũngya andũ ma mbaĩ ingĩ vamwe na ngai syoo, maume mbee wa andũ maku ala woovoisye kuma Misili?
24
Nũtw'ĩkĩthĩtye andũ ma Ĩsilaeli methĩwe maku tene na tene, naku we Mwĩai Ngai nũtw'ĩkĩte Ngai woo.
25
“Yu Mwĩai Ngai, ĩanĩsya ĩvindanĩ yonthe yĩla yũkĩte ndeto ila ũneenete ĩũlũ wakwa nyie mũthũkũmi waku, na andũ ma mũsyĩ wakwa. Ĩka kwĩanana na ũndũ ũneenete.
26
Nguma yaku ĩkeethĩwa yĩ nene, na andũ maku makaneenaa ĩvindanĩ yonthe yĩla yũkĩte na kwasya atĩĩ, ‘Mwĩai Ngai Mwene Ũtonyi W'onthe nĩwe Ngai wa Ĩsilaeli!’ Ũkatuma Mũsyĩ wakwa nyie mũthũkũmi waku wĩthĩwa wĩ mũlũmu.
27
We Mwĩai Ngai Mwene Ũtonyi W'onthe, Ngai wa Ĩsilaeli, nĩ na ũkũmbaũ wa kũvoya mboya ĩno kũla ũĩ, nũndũ nũmbuanĩsye maũndũ aa onthe nyie mũthũkũmi waku, na nũndavĩtye kana ũkatuma mũsyĩ wakwa wĩthĩwa wĩ mũlũmu.
28
“Ame Mwĩai Ngai Mũsumbĩ, we nue Ngai na ndeto syaku nĩ sya kũĩkĩĩwa, na nũmbathĩte nyie mũthũkũmi waku maũndũ aa maseo.
29
Nĩũkũlya ũathime nzyawa syakwa nĩ kana iendeeae kũtanĩa ũseo waku. We Mwĩai Ngai Mũsumbĩ nũmbathĩte kwĩka ũu, na nzyawa syakwa ikaendeea kwĩthĩwa syĩ ngathime ĩvindanĩ yonthe yĩla yũkĩte.”
← Chapter 6
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 8 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24