2 Samuel 9

Kamba (MBIVILIA ŨVOO MŨSEO)

← Chapter 8 Jump to: Chapter 10 →

1Mũthenya ũmwe Ndeviti nĩwakũlilye atĩĩ, “Ve mũndũ ũtialĩte wa mũsyĩ wa Saũlo? Ethĩwa nĩvo ũĩ, nĩenda kũmwĩka nesa nũndũ wa Yonathani.”

2Vaĩ mũthũkũmi wa mũsyĩ wa Saũlo weetawa Nziva. Nĩweeiwe nĩathi kũla kwĩ Ndeviti. Athi, Mũsumbĩ Ndeviti nĩwamũkũlilye atĩĩ, “Nue wĩtawa Nziva?” Nake amũsũngĩa, “Ĩĩ ninyie, mũthũkũmi waku.”

3Mũsumbĩ amũkũlya atĩĩ, “Ve mũndũ ũtialĩte wa mũsyĩ wa Saũlo nĩ kana nĩmwĩke nesa ũndũ nathie Ngai kana ngeeka?” Nziva nĩwasũngĩie mũsumbĩ amwĩa atĩĩ, “Ve mwana wa Yonathani ũtialĩte, na maũũ make nĩ monzu.”

4Mũsumbĩ amũkũlya atĩĩ, “Aĩva?” Nziva amũsũngĩa atĩĩ, “E Londevali nyũmba kwa Makili mwana wa Amieli.”

5Nĩvo ĩndĩ Mũsumbĩ Ndeviti watũmanie mwana ũsu wa Yonathani akaetwe.

6Yĩla Mevivosethi mwana wa Yonathani, mwĩsũkũũe wa Saũlo wookie, nĩwakumanie mbee wa Ndeviti amũnenge ndaĩa. Ndeviti nĩwamwĩtie, “Mevivosethi,” Nake asũngĩa, “Ninyioo, mũthũkũmi waku.”

7Ndeviti amwĩa atĩĩ, “Ndũkakĩe, nĩngũkwĩka nesa nũndũ wa ĩthe waku Yonathani. Nĩngũũtũngĩa nthĩ yonthe ĩla yaĩ ya ũmae waku Saũlo, na ũkaĩsanĩaa nakwa kĩla ĩvinda.”

8Mevivosethi nĩwakumanie ĩngĩ anenge Ndeviti ndaĩa na asya atĩĩ, “Mũnene, nyie ndi mũseo mbee wa ngitĩ ngw'ũ! Ũtonya kũmbĩka nesa mũno wĩana ũu ata?”

9Nĩvo ĩndĩ mũsumbĩ weetie Nziva mũthũkũmi wa Saũlo na amwĩa atĩĩ, “Nĩnanenga mwĩsũkũũe wa mũnene waku syĩndũ syonthe ila syaĩ sya Saũlo, na sya andũ ma mũsyĩ wake.

10We, ana maku, na athũkũmi maku mũkaĩmaa mũũnda wa andũ ma mũsyĩ wa Saũlo na kũete ngetha nĩ kana methĩawe na lĩu wa kũya. Ĩndĩ ĩvinda yonthe Mevivosethi akaĩsanĩaa nakwa.” Nziva aĩ na ana ĩkũmi na atano na athũkũmi mĩongo ĩlĩ.

11Nziva nĩweeie mũsumbĩ atĩĩ, “Nyie mũthũkũmi waku nĩngwĩka maũndũ onthe ala we mũnene wakwa mũsumbĩ wambĩaĩa nĩke.” Kwoou Mevivosethi nĩwaĩsanĩaa na Ndeviti, o ta ũmwe wa ana ma mũsumbĩ.

12Mevivosethi aĩ na kamwana keetawa Mika. Andũ onthe ma mũsyĩ wa Nziva maĩ athũkũmi ma Mevivosethi.

13Kwoou Mevivosethi ũla waĩ na maũũ mathũku nĩwekalaa Yelũsalemu, na kĩla ĩvinda aĩsaa e vamwe na mũsumbĩ.

← Chapter 8 Jump to: Chapter 10 →