Daniel 1

Kamba (MBIVILIA ŨVOO MŨSEO)

Jump to: Chapter 2 →

1Mwakanĩ wa katatũ wa kũsumbĩka kwa Yeoiakimu mũsumbĩ wa Yuta, Nevukatinesa mũsumbĩ wa Mbavilonĩ nĩwaendie e na asikalĩ make na meelingĩla ndũa ya Yelũsalemu.

2Mwĩai nĩwatumie Mũsumbĩ Nevukatinesa asinda Yeoiakimu, na o ta ũu oosa ĩmwe ya mĩio ĩla yaĩ Ĩkalũnĩ ya Ngai. Nevukatinesa nĩwakuie mĩio ĩsu na amĩtwaa Sinali vala vaĩ ĩkalũ ya ngai yake, na amia nyũmbanĩ sya ĩkalũ yĩu sya kwia syĩndũ.

3Ĩtina wa ũu Mũsumbĩ Nevukatinesa nĩweeaĩie Asivenasi, ũla waĩ mũnene wa athũkũmi make, anyuve amwe ma andũ ma Ĩsilaeli ala maumĩte mũsyĩnĩ wa kĩ-ũsumbĩ na mĩsyĩnĩ ya athwii.

4Amwĩaĩĩte anyuve imwana ite na kĩema, mbũmbe nesa, syĩ na ũĩ wa kũseũvya syĩndũ, syĩ na ũmanyi, itonya kũmanyĩw'a, na o ta ũu itonya kũthũkũma nyũmbanĩ ya mũsumbĩ. O na ĩngĩ Asivenasi nĩweeaĩiwe aimanyĩsye kũsoma na kũandĩka kĩthyomo kya andũ ma Mbavilonĩ.

5Mũsumbĩ nĩweeaie imwana isu inengawe lĩu kuma lĩunĩ ũla waĩsaa na iinengwa ndivai kuma ndivainĩ ĩla wanyusaa. Imwana isu syaaĩlĩte kũmanyĩw'a vandũ va myaka ĩtatũ na ĩtina wa ũu iitwawa wĩanĩ kwa mũsumbĩ.

6Katĩ wa imwana ila syanyuviwe vaĩ Ndanieli, Aanania, Misaeli na Asalia ala maĩ ma mbaĩ ya Yuta.

7Mũnene wa athũkũmi ma mũsumbĩ nĩwatw'ĩĩie imwana isu masyĩtwa angĩ: Eetie Ndanieli Mbelitesasa, eeta Aanania Satalaki, Misaeli amwĩta Mesaki na Asalia amwĩta Avetineko.

8Ndanieli nĩweetw'ĩĩie ngoonĩ yake kana ndakaaĩvukya kwa kũya lĩu na kũnyw'a ndivai kuma kwa mũsumbĩ. Kwoou nĩwakũlilye Asivenasi amwĩtĩkĩlye ndakaye syĩndũ isu nĩ kana ndakevukye.

9Ngai nĩwatumie Ndanieli ekwa nesa na kwĩw'ĩwa tei nĩ Asivenasi.

10Asivenasi nĩwaneenie na Ndanieli amwĩa atĩĩ, “Nĩngũkĩa mũnene wakwa mũsumbĩ ũla waĩtye kana nĩmwaĩlĩte kũya na kũnyw'a ũu ndakese kwona mwĩ amosu mbee wa imwana sya ĩika yenyu. Kwoou nũtonya kũtuma mũsumbĩ ambũaa.”

11Nĩvo ĩndĩ Ndanieli waendie vala ve mũndũ ũla Asivenasi wanyuvĩte aũngamĩe Ndanieli, Aanania, Misaeli na Asalia na amwĩa atĩĩ,

12“Mũnene, tũsyaĩĩsye vandũ va mĩthenya ĩkũmi, tũnenge mboka sya nyũnyi tũye na kĩw'ũ tũnyw'e.

13Ĩtina wa ũu, tũsyaanĩsye na imwana ila iũya lĩu mũseo wa kwa mũsumbĩ, na ũyumya ũtw'ĩo kumana na ũndũ twĩĩthĩwa tũilyĩ.”

14Mũthũkũmi ũsu nĩweetĩkĩlile ũndũ ũsu na amasyaĩĩsya vandũ va mĩthenya ĩkũmi.

15Ĩtina wa mĩthenya ĩkũmi imwana isu nĩsyoonekie syĩ nzeo kwa kũsiw'a, na syĩ nou mbee wa imwana ila syaĩsaa lĩu kuma kwa mũsumbĩ.

16Kwoou kuma mũthenya ũsu mũthũkũmi ũsu nĩwaekie imwana isu inya syaendeea kũya mboka sya nyũnyi na alea kũmanenga lĩu na ndivai kuma kwa mũsumbĩ.

17Ngai nĩwanengie imwana isu syĩ inya ũĩ na ũmanyi wa ũvoo o na wĩva mũandĩke kana wa kwĩmanyĩsya, na o ta ũu Ndanieli eethĩwa na ũmanyi wa kũalyũla mawoni na ndoto sya kĩla mũthemba.

18Ĩtina wa matukũ ala mũsumbĩ weeaĩte mathela, Asivenasi nĩwatwaie imwana syonthe vala ve Mũsumbĩ Nevukatinesa.

19Mũsumbĩ nĩwaneenie nasyo. Katĩ wa imwana isu syonthe vai kĩmwe kyaamwendeesya mbee wa Ndanieli, Aanania, Misaeli na Asalia. Kwoou nĩmambĩĩie kũthũkũma kwa mũsumbĩ.

20Yĩla mũsumbĩ waneenie namo ĩũlũ wa maũndũ ma ũĩ na ũmanyi, nĩweethĩie me aseo mavinda ĩkũmi mbee wa eki ma syama na awe ala maĩ ũsumbĩnĩ wake w'onthe.

21Ndanieli aendeeie kwĩkala kwa mũsumbĩ nginya mwakanĩ wa mbee wa kũsumbĩka kwa Kulusu.

Jump to: Chapter 2 →