Daniel 11 — Kamba (MBIVILIA ŨVOO MŨSEO)

1“Mwakanĩ wa mbee wa kũsumbĩka kwa Ndalio ũla waĩ Mũmetia, nĩneeyumisye nĩmũtetheesye na kũmũsũvĩa.”

2Nĩwaendeeie kũneena asya atĩĩ, “Yu nĩngũũvuanĩsya ũla ũw'o; asumbĩ angĩ atatũ makasumbĩka Velisia, na wa kana akeethĩwa e mũthwii mbee wa ala angĩ onthe. Amina kwĩthĩwa na ũtonyi nũndũ wa ũthwii wake, akaingĩanĩsya andũ onthe mokite na ũsumbĩ wa Ũkiliki.

3“Nĩvo ĩndĩ mũsumbĩ wĩ vinya wĩumĩla, ũla ũkasumbĩka na ũkũmũ mwingĩ, na ayĩka ũndũ ũkwenda.

4Amina kwĩthĩwa na vinya, ũsumbĩ wake ũkatilĩkanga ũaanĩke ilungu inya. Ũsumbĩ ũsu ndũkasumbĩkwa nĩ nzyawa syake, na ndũkasumbĩkwa na ũtonyi ũla wasumbĩkaa naw'o.

5“Mũsumbĩ wa ngalĩko ya ĩtheo akeethĩwa na ũtonyi, ĩndĩ ũmwe wa atongoi make ma asikalĩ akeethĩwa na ũtonyi mwingĩ kwĩ we, na akasumbĩka ũsumbĩ wake mwene na ũtonyi mwingĩ.

6Ĩtina wa myaka yĩana ũndũ mũna makaseũvya wĩw'ano. Kwa nzĩa ya kũlũlũmĩĩlya wĩw'ano ũsu, mwĩĩtu wa mũsumbĩ wa ngalĩko ya ĩtheo akatwawa nĩ mũsumbĩ wa ngalĩko ya ĩũlũ. Mwĩĩtu ũsu ndakaendeea kwĩthĩwa na ũtonyi wa kũkwatany'a mosumbĩ asu; akooawa vamwe na ala maendanisye nake, mwana wake na mũũme wake.

7Ĩtina wa ĩvinda ĩnini, ũmwe wa andũ ma mũsyĩ wa mwĩĩtu ũsu akasumbĩka ũsumbĩnĩ wa ngalĩko ya ĩtheo. Akavithũkĩa asikalĩ ma mũsumbĩ wa ngalĩko ya ĩũlũ, alike kũndũnĩ kwoo kwa kwĩvitha na kũmasinda.

8Akatũnga mĩvw'anano yoo Misili na syĩndũ sya thaavu na silĩva ila syavathĩwe ngai isu. Vandũ va myaka yĩana ũndũ mũna, mũsumbĩ wa ngalĩko ya ĩtheo ndakavithũkĩa mũsumbĩ wa ngalĩko ya ĩũlũ.

9Ĩndĩ ĩtina wa ũu, mũsumbĩ ũsu wa ngalĩko ya ĩũlũ akavithũkĩa mũsumbĩ wa ngalĩko ya ĩtheo, na akaeka kũkita nake na aisyoka nthĩ yake.

10“Ana ma mũsumbĩ ũsu wa ngalĩko ya ĩũlũ makeeyũmbanĩsya kaũ na kũmbany'a asikalĩ aingĩ. Asikalĩ asu makathi kũvithũkĩa nthĩ ĩsu yake maendete ta kĩw'ũ kingĩ. Makamyũkita nginya makavithũkĩe wĩvitho wake mũlũmu.

11Nĩvo ĩndĩ mũsumbĩ wa ngalĩko ya ĩtheo wĩumaala e na ũthatu mwingĩ akokite mũsumbĩ wa ngalĩko ya ĩũlũ ũla wĩũmbany'a asikalĩ aingĩ, ĩndĩ maisindwa.

12Asikalĩ asu mamina kũkwatwa, mũsumbĩ wa ngalĩko ya ĩtheo akausũwa nĩ ngathĩĩo, na kũaa andũ aingĩ, ĩndĩ ndakaendeea kũsinda.

13“Mũsumbĩ wa ngalĩko ya ĩũlũ akasyoka na kũmbany'a asikalĩ angĩ aingĩ mbee wa ala waĩ namo mbeenĩ. Ĩtina wa myaka yĩana ũndũ mũna, akasyoka e na asikalĩ aingĩ me na mĩio mingĩ ya kaũ.

14Ĩvindanĩ yĩu andũ aingĩ makang'endea mũsumbĩ wa ngalĩko ya ĩtheo. Amwe ma andũ ang'endu ma nthĩ yaku we Ndanieli, makaleana nake nũndũ wa woni monete, ĩndĩ makasindwa.

15Nĩvo ĩndĩ mũsumbĩ wa ngalĩko ya ĩũlũ wĩĩlingĩla ndũa ĩmwe mbiĩĩe na kũmĩkwata. Asikalĩ ma ngalĩko ya ĩtheo makaendeea kũkita, nginya o na asikalĩ ala moo aseo vyũ methĩwe mate na vinya.

16Amaitha moo ma ngalĩko ya ĩũlũ makeeka ũndũ mekwenda; vai mũndũ ũkethĩwa atonya kũmasiĩĩa. Makeelũlũmĩĩlya me ĩla Nthĩ Nzeo Mũno, na mayĩthĩwa na ũtonyi wa kũmyananga.

17“Mũsumbĩ wa ngalĩko ya ĩũlũ akaseũvya mũvango wa kũmavithũkĩa e na asikalĩ make onthe. Akaseũvya wĩw'ano na ũsumbĩ wa mũmaitha wake, na aimũnenga mwĩĩtu wake nĩ kana anange ũsumbĩ wake. Ĩndĩ mũvango ũsu wake ndũkatonyeka.

18Ĩtina wa ũu akavithũkĩa nthĩ ila syĩ ũtee wa ũkanga na aisinda mbingĩ syasyo. Ĩndĩ mũnene wa asikalĩ ma nthĩ ĩngĩ akamũsinda na kũtuma aeka kwĩkathĩĩa. Kwa w'o mũnene ũsu akatuma mũsumbĩ wa ngalĩko ya ĩũlũ akwata ĩtuvi ya ngathĩĩo syake.

19Ĩtina wa ũu mũsumbĩ wa ngalĩko ya ĩũlũ akasyoka nthĩ yake ndũanĩ mbiĩĩe, ĩndĩ akasindwa, na ũsu ũyĩthĩwa nĩw'o mũminũkĩlyo wake.

20“Mũsumbĩ ũla wĩsumbĩka ĩtina wake akatũma mumĩthya wa koti, nĩ kana ũsumbĩ wake ũendee kwĩthĩwa na ũkumyo. Ĩndĩ ĩtina wa ĩvinda ĩkuvĩ mũsumbĩ ũsu akooawa. Ndakoawa nĩ andũ me na woo, kana oaĩwe kaũnĩ.”

21Mũlaĩka nĩwaendeeie kũneena asya atĩĩ, “Mũsumbĩ ũla ũngĩ wa ngalĩko ya ĩũlũ wĩsumbĩka akeethĩwa e mũndũ mũthũku ũtaĩlĩte kũtw'ĩka mũsumbĩ. Ĩndĩ akooka andũ matataĩĩe, na aitw'ĩka mũsumbĩ aitũmĩa ũseleke.

22Mũndũ o na wĩva ũla wĩmũsiĩĩa, o na ethĩwa nĩ Mũthembi Mũnene wa Ngai akavetangwa na kũawa.

23Mũsumbĩ ũsu akakenga nthĩ ingĩ kwa nzĩa ya kũseũvya wĩw'ano, na akaendeea kwĩthĩwa e na vinya, o na kau akeethĩwa asumbĩkĩte nthĩ nini.

24Akalika kũla kwĩ ũthwii kĩsionĩ kĩu andũ matesĩ, na kwĩka maũndũ ala o na ũmwe wa aaũmae make ũtaaĩka. Nĩvo ĩndĩ ũkaanĩsya andũ make syĩndũ na mũtavo ũla ũkethĩwa atavĩte kaũnĩ. Akaseũvya mũvango wa kũvithũkĩa ndũa mbiĩĩe, ĩndĩ ĩvinda yake yĩkathela na mĩtũkĩ.

25“Akakwata vinya na ũkũmbaũ kwa kũmbany'a asikalĩ aingĩ ma kũkita mũsumbĩ wa ngalĩko ya ĩtheo. Mũsumbĩ wa ngalĩko ya ĩtheo akathi kũkita e na asikalĩ aingĩ me na vinya, ĩndĩ ndakethĩwa atonya kũsinda nũndũ wa mĩvango ĩla ũkethĩwa aseũvĩw'e.

26Atai make makamwasya, na aingĩ ma asikalĩ make makooaĩwa kaũnĩ.

27Asumbĩ asu elĩ makaya me mesanĩ ĩmwe ĩndĩ makeethĩwa maisũanĩa maũndũ mathũku, na kĩla ũmwe akakenga ũla ũngĩ. Ĩndĩ ũu wĩ o vo maikeanĩsya kwenda kwoo, nũndũ ĩvinda yĩla yĩtw'ĩtwe yĩikethĩwa yĩ ĩviku.

28Mũsumbĩ wa ngalĩko ya ĩũlũ akenũka e na mũtavo mwingĩ, na akeethĩwa aseũvĩtye mũvango wa kwananga ũthaithi ũla ũmwaĩlĩte Ngai. Akeeka ũndũ ũkwenda na ĩndĩ aisyoka nthĩ yake.

29“Ĩvinda yĩla yĩtw'ĩtwe yavika, mũsumbĩ ũsu akavithũkĩa ũsumbĩ wa ngalĩko ya ĩtheo ĩngĩ, ĩndĩ ĩvinda yĩĩ maũndũ makeethĩwa me kĩvathũkany'o.

30Meli kuma Saivulasi ikooka na kũmũsiĩĩa, na akakw'a ngoo. “Nĩvo ĩndĩ wĩsyoka e na ũthatu na kũtata kwananga ũthaithi ũla ũmwaĩlĩte Ngai. Akaatĩĩa ũtao wa andũ ala maekanie na ũthaithi ũsu.

31Asikalĩ make makookĩla na kũvukya Ĩkalũ, na o ta ũu maiũngamya nthembo ila syumaw'a kĩla mũthenya. Nĩvo ĩndĩ meũngamya kĩla kĩndũ kya kũvukya kĩetae wanangĩko.

32Akakenga andũ ala maleanile na ũtianĩo, ĩndĩ ala mesĩ Ngai woo makaũngama na ũlũmu na kũmũsiĩĩa.

33“Andũ ala oĩ makamanyĩsya aingĩ, o na kau kwa ĩvinda ĩna makooaĩwa kaũnĩ, kana mavĩvw'e makw'e, kana makwatwe, kana matavwe.

34Andũ ma Ngai maendee kũawa makakwata ũtethyo mũnini, o na kau aingĩ ala meĩkwatany'a namo makeeka ũu kwa ũseleke.

35Amwe ma andũ asu oĩ makooawa nĩ kana ĩko yoo yĩvetangwe, mathew'e na kweũvw'a nginya ĩvinda ya mũminũkĩlyo yĩvike, ĩvinda yĩla yĩtw'ĩtwe.

36“Mũsumbĩ wa ngalĩko ya ĩũlũ akeeka ũndũ ũkwenda; akeekathĩĩa na kwĩnenevya mbee wa ngai syonthe, na akaneenea Ngai ũla wĩ ĩũlũ wa ngai ila ingĩ ndeto nthũku. Akaendeea nesa nginya ĩvinda ya ũthatu yĩanĩĩw'e, nĩkwĩthĩwa maũndũ ala mavangĩtwe vate ndĩi makeekĩka.

37Mũsumbĩ ũsu ndakatala ta kĩndũ ngai sya aaũmae make, kana ngai ĩla yendetwe nĩ iveti. Ndakatala ta kĩndũ ngai o na yĩva nũndũ akeenenevya mbee wa ngai syonthe.

38Vandũ va ngai isu akanenga ndaĩa ngai ĩla ĩsũvĩaa ndũa mbiĩĩe. Akanenga ngai ĩsu ĩtesĩkĩe nĩ aaũmae make thaavu, silĩva, mavia me thooa mũnene na mĩthĩnzĩo ĩngĩ ya thooa mũnene.

39Akavithũkĩa ndũa mbiĩĩe aitetheew'a nĩ ngai ngeni, na akanenga ndaĩa ala mamwĩtĩkĩlĩte ta mũsumbĩ. Akamatw'ĩkĩthya atongoi ma andũ aingĩ, na kũmaanĩsya itheka syĩthĩwe mũthĩnzĩo.

40“Ĩvindanĩ ya mũminũkĩlyo mũsumbĩ wa ngalĩko ya ĩtheo akamũvithũkĩa, nake mũsumbĩ wa ngalĩko ya ĩũlũ akathi ta kĩlingi akokite nake e na makasya ma kaũ, mbalasi, na meli mbingĩ. Mũsumbĩ ũsu wa ngalĩko ya ĩũlũ akavithũkĩa nthĩ mbingĩ na mĩtũkĩ ũndũ kĩw'ũ kingĩ kyũkaa.

41O ta ũu akavithũkĩa ĩla Nthĩ Nzeo Mũno na kũaa andũ aingĩ. Ĩndĩ nthĩ sya Etomu, Moavi, na kĩsio kĩnene kya Aamimoni, ikatangĩĩwa kuma ũtonyinĩ wake.

42Akasumbĩka nthĩ mbingĩ, o na nthĩ ya Misili ndĩkavonoka.

43Akoosa ũthwii wa Misili wa thaavu na silĩva na ũthwii w'onthe wayo. Nthĩ sya Limbya na Ethiovia ikeethĩwa ungu wa ũsumbĩ wake.

44Ĩndĩ akatelemw'a nĩ ndeto ila ũkew'a kuma ngalĩko ya wumĩlonĩ wa syũa na ya ĩũlũ, na nũndũ wa ũu akokita e na ũthatu mwingĩ na kũaa andũ aingĩ.

45Akamba maeema make ma kĩ-ũsumbĩ katĩ wa ũkanga na kĩĩma kĩla Ĩkalũ yakĩtwe. Ĩndĩ akakw'a vate mũndũ vakuvĩ wa kũmũtetheesya.”