Daniel 9

Kamba (MBIVILIA ŨVOO MŨSEO)

← Chapter 8 Jump to: Chapter 10 →

1“Mwakanĩ wa mbee wa kũsumbĩka kwa Ndalio mwana wa Aasuelo ũla waĩ Mũmetia, na watw'ĩkie mũsumbĩ wa Mbavilonĩ,

2nyie Ndanieli nĩnamanyie kuma maandĩkonĩ kana kwĩanana na ũndũ Mwĩai Ngai waneenete na mwathani Yelemia akamũtavya, Yelũsalemu ĩkekala yĩ mbanange vandũ va ĩvinda ya myaka mĩongo mũonza.

3Kwoou nĩnavoyie Mwĩai Ngai na kĩthetheesyo namwĩsũva; nĩnatĩĩie kũya, neekĩa ngũa ngaamu sya makunia, na nekala mũunĩ.

4Nĩnavoyie Mwĩai Ngai, Ngai wakwa na naumbũla naĩ syakwa ndyasya atĩĩ, “Ame Mwĩai, Ngai mũnene na wa kũkĩwa, ũla wĩanĩasya ũtianĩo, na wĩ wendo ũtaolekaa kwa ala mamwendaa na kwĩanĩsya mĩao yake,

5nĩtũvĩtĩtye na tũkeka maũndũ mathũku. Twĩthĩĩtwe twĩ athũku, na twĩ ang'endu. Nĩtũleete kwĩanĩsya mĩao yaku na myamũlo yaku.

6Nĩtwaleile kwĩthukĩĩsya athũkũmi maku athani, ala maneenie ĩsyĩtwanĩ yaku na asumbĩ maitũ, anene maitũ, aaũmae maitũ na andũ onthe ma nthĩ yaitũ.

7We Mwĩai Ngai wĩ mũlũngalu, ĩndĩ ũmũnthĩ ithyĩ twĩ andũ ma Yuta twĩna nthoni, vamwe na ala matwĩe Yelũsalemu na ma Ĩsilaeli onthe, ala matwĩe vakuvĩ na ala matwĩe vaasa, nthĩ syonthe kũla ũtũnyaĩĩkĩsye nũndũ wa kwĩthĩwa tũte aĩkĩĩku kũla ũĩ.

8Ame Mwĩai Ngai, ithyĩ, asumbĩ maitũ, anene maitũ, na aaũmae maitũ tusũĩtwe nĩ nthoni nũndũ nĩtũkũvĩtĩsye.

9We Mwĩai Ngai waitũ wĩ tei na nũekeaa, o na kau nĩtũkũng'endeete;

10nĩtwaleile ũkwĩw'a we Mwĩai Ngai, Ngai waitũ, kwa kũlea kwĩanĩsya mĩao ĩla ũnenganĩte kwĩsĩla kwa athũkũmi maku athani ĩtũtongoeasye.

11Andũ onthe ma Ĩsilaeli nĩmaleete kwĩanĩsya mĩao yaku, na makathi ũtee, makalea ũkwĩw'a. Kwoou nĩtũkwatĩtwe nĩ iumo, na mosilĩlo ala mathanĩtwe mĩaonĩ ya Mwose mũthũkũmi waku, nũndũ nĩtwĩkĩte naĩ.

12Nĩwĩkĩte ũndũ waisye ũkatwĩka twĩ na atongoi maitũ. Nũkanĩtye Yelũsalemu mũno mbee wa ndũa ĩngĩ o na yĩva ĩũlũ wa nthĩ.

13Ũthũku ũũ nũtũkwatĩte o ũndũ kũandĩkĩtwe mĩaonĩ ya Mwose. Ĩndĩ ũu wĩ o vo, tũyaakũkũlya we Mwĩai Ngai, Ngai waitũ ũtwĩw'ĩe tei, kwa kũeka kwĩka naĩ na kũatĩĩa ũw'o waku.

14Kwoou we Mwĩai Ngai nĩwatũeteie ũthũku, nĩkwĩthĩwa we Mwĩai Ngai, Ngai waitũ wĩ mũlũngalu maũndũnĩ onthe ala wĩkaa. Ũu wĩ o vo tũyaakwĩw'a.

15“Yu ame Mwĩai Ngai, Ngai waitũ ũla kwa ũtonyi waku waumisye andũ maku nthĩ ya Misili, na kwoou wamesya nguma o na kũvika ũmũnthĩ, ithyĩ nĩtwĩkĩte naĩ, nĩtũvĩtĩtye.

16Ame Mwĩai Ngai, nũndũ maũndũ onthe ala wĩkaa nĩ malũngalu, ũthatu na ũkany'o waku ndũkakwate ndũa ya Yelũsalemu, kĩĩma kyaku kĩtheu. Naĩ sitũ na mothũku ala aaũmae maitũ meekie nitumĩte atũi maitũ mavũthya Yelũsalemu na andũ maku.

17Kwoou we Ngai waitũ, ĩthukĩĩsye mboya na kwĩsũvana kwa mũthũkũmi waku. Ĩw'ĩa tei Ĩkalũ yaku yĩla yĩtiĩtwe yĩ ĩthei nĩ kana ũnengwe ndaĩa.

18Ame Ngai wakwa, tea kũtũ kwaku wĩthukĩĩsye. Salukya wone thĩna witũ, na ũyona ndũa ĩla yĩtanĩaw'a na ĩsyĩtwa yaku. Tũikũvoyaa nũndũ twĩ alũngalu ĩndĩ nũndũ wĩ tei mwingĩ.

19Ame Mwĩai Ngai, ĩthukĩĩsye! Ame Mwĩai Ngai ekea! Ame Mwĩai Ngai ĩthukĩĩsye na ũisũngĩa, nĩ kana wĩyĩetee ndaĩa. Ame Ngai wakwa, ndũkekalange, nũndũ ndũa ĩno na andũ aa nĩ maku.

20“Nĩendee kũneena na kũvoya, ndyumbũla naĩ syakwa na sya andũ makwa Ĩsilaeli, na kũnengane mavata makwa kũla kwĩ Mwĩai Ngai, Ngai wakwa nũndũ wa kĩĩma kyake kĩtheu;

21nĩendee kũneena mboyete, Kavilieli ũla noonete woninĩ mbee, nĩwookie vala nĩĩ aũlũkĩte mĩtũkĩ. Kwaĩ saa ila nthembo ya ĩa mawĩoo yathembawa.

22Nĩwaneenie nakwa ambĩa atĩĩ, ‘Ndanieli, yu nooka ũkũnenga ũĩ na ũmanyi.

23Mwambĩlĩĩlyonĩ wa mboya yaku, Ngai nũkũsũngĩie. Nũkwendete mũno, na kwoou nooka ũkũnenga ũsũngĩo. Yu ĩthukĩĩsye ũmanye ũalyũlo wa woni ũũ.

24“ ‘Ngai anenganĩte ĩvinda ya myaka mĩongo mũonza kũndũ mũonza nĩ kana andũ ma mbaĩ yaku maeke kwĩka naĩ, ndũa ya Yelũsalemu ĩthele mothũku, ũng'endu ũthele, naĩ ĩminwe, na ũthũku ũithew'a, kwĩthĩwe na ũlũngalu wa tene na tene, woni na wathani wĩanĩe na Ĩkalũ yĩivathwa ĩngĩ.

25Kwoou manya kana kuma ĩvinda yĩla mwĩao wanenganiwe waĩtye: Syokai mũkake Yelũsalemu ĩngĩ, kũvika yĩla mũsumbĩ, mwĩtĩkĩw'a mauta wĩũka, nĩ ĩvinda ya syumwa mũonza. Kwa ĩvinda ya syumwa mĩongo thanthatũ na ilĩ, ndũa ya Yelũsalemu ĩkaakwa ĩngĩ, yĩ na malelũ manene, na ũkũta mũlũmu wa kũsiĩĩa amaitha kũmĩvithũkĩa. Ĩndĩ yĩu yĩkeethĩwa ĩvinda ya mathĩna.

26Ĩtina wa syumwa isu mĩongo thanthatũ na ilĩ, mwĩtĩkĩw'a mauta akavetangwa na ndakethĩwa na kĩndũ. Andũ ma mũsumbĩ ũla wĩũka makaananga ĩla ndũa na Ĩkalũ. Mũminũkĩlyo ũkooka ta kĩw'ũ kingĩ, na kũkeethĩwa kaũ na wanangĩko mwingĩ o tondũ Ngai ũvangĩte.

27Mũsumbĩ ũsu akaseũvya ũtianĩo mũlũmu na andũ aingĩ vandũ va kyumwa kĩmwe. Kyumwanĩ kĩu katĩ, akatuma nthembo ieka kumw'a. Akeekĩa kĩndũ kya kũvukya vandũnĩ vala vatũlu Ĩkalũnĩ, na kĩkekala vau nginya ũla waiie kĩndũ kĩu vau anangwe o tondũ Ngai wavangĩte.’ ”

← Chapter 8 Jump to: Chapter 10 →