Daniel 8

Kamba (MBIVILIA ŨVOO MŨSEO)

← Chapter 7 Jump to: Chapter 9 →

1“Mwakanĩ wa katatũ wa kũsumbĩka kwa Mbelisasa, nyie Ndanieli nĩnoonie woni ĩtina wa woni ũla ũngĩ noonete mbeenĩ.

2Woninĩ ũsu neeyonie nĩ mũsyĩnĩ mũnene wa Susa, kĩsionĩ kya Elamu, na naũngyĩ ũtee wa ũsĩ wĩtawa Ulai.

3Nĩnasyaisye na noona ndũũme vau ũtee wa ũsĩ ũsu. Ndũũme ĩsu yaĩ na mbya ilĩ; ũmwe wa mbya isu waĩ mũasa kwĩ ũla ũngĩ, ĩndĩ wameie ĩtina wa ũla ũngĩ.

4Nĩnoonie ndũũme ĩsu ĩyũkita yelekele ngalĩko ya ũthũĩlonĩ wa syũa, ya ĩũlũ na ya ĩtheo. Vai nyamũ o na yĩva yaĩ ĩtonya kũmĩsiĩĩa, kana kũsindana nayo. Yeekaa kĩla kyamyendeesya, na nĩyambĩĩie kwĩthĩwa na mĩtũlyo.

5“Nĩendee kũsũanĩa ĩũlũ wa ũndũ ũsu, nĩnoonie nthenge yũkĩte na mĩtũkĩ kuma ngalĩko ya ũthũĩlonĩ wa syũa. Nthenge ĩsu yasembete mũno ũkethĩa ndĩkinyĩte nthĩ. Yaĩ na ũvya wa kũseng'ya katĩ wa metho mayo.

6Nthenge ĩsu nĩyookie kũla kwĩ ĩla ndũũme yaĩ na mbya ilĩ noonete ĩũngyĩ ũtee wa ũsĩ, na yamĩvithũkĩa na mĩtũkĩ na vinya wayo w'onthe.

7Nĩnoonie nthenge ĩsu yathengeea ndũũme ĩsu yĩna woo mwingĩ, yamĩkima yatũlanga mbya syayo syelĩ. Ndũũme ĩsu ndyaĩ na vinya wa kũsiĩĩa nthenge ĩsu, na kwoou nthenge nĩyamĩkimie yavalũka, na yamĩkinyangĩa nthĩ. Vai mũndũ waĩ atonya kũtangĩĩa ndũũme ĩsu kuma vala ve nthenge ĩsu.

8Nthenge ĩsu nĩyaendeeie kwĩthĩwa na ngathĩĩo, ĩndĩ ĩvinda yĩla yaĩ na vinya mwingĩ mũno, ũla ũvya wayo mũnene nĩwatũlĩkile. Vala ũvya ũsu wameete nĩvameie mbya ingĩ inya sya kũseng'ya, kĩla ũmwe wasyo welekele ngalĩko yaw'o.

9“Kuma kwa ũmwe wa mbya isu nĩvameie kalũvya kangĩ, na keana mũno kelekele ngalĩko ya ĩtheo, ngalĩko ya wumĩlonĩ wa syũa, na ngalĩko ya ĩla Nthĩ Nzeo Mũno.

10Kalũvya kau nĩkeanie nginya kathi kũvikĩa nguthu sya matunĩ, na kavalũkangya imwe sya nguthu sya ndata na kũikinyangĩa nthĩ.

11Nĩkavũthisye Mũnene wa nguthu sya ĩtunĩ. Nĩkaũngamisye nthembo sya kĩla mũthenya ila wathembeawa, na o ta ũu kaananga Ĩkalũ yake.

12Andũ nĩmeekĩie naĩ vau vandũ va kũthemba nthembo ila syaĩlĩte kũthembwa kĩla mũthenya, na ũthaithi ũla wa w'o wavetangwa. Kalũvya kau nĩkeekaa ũndũ ũla kavanga kwĩka kakaũmina.

13“Nĩvo ĩndĩ neewie ũmwe wa alaĩka aneena na ũngĩ, na ũsu waneeniw'e amũkũlya atĩĩ, ‘Maũndũ asu monanĩtw'e mawoninĩ asu meendeea kũvika ĩndĩĩ? Nthembo sya kũvĩvw'a sya kĩla mũthenya syĩendeea kũsiĩĩwa iikaumw'e, na andũ maiendeea kwĩthĩwa mate na kĩkĩo kya Ngai na kwĩka naĩ kũvika ĩndĩĩ?’

14Mũlaĩka ũsu ũngĩ nĩwasũngĩie asya atĩĩ, ‘Maũndũ asu meendeea vandũ va mawĩoo na makwakya ngili ilĩ na maana atatũ, na ĩndĩ Ĩkalũ yĩithew'a ĩngĩ ũndũ yailyĩ.’

15“Yĩla nyie Ndanieli noonie woni ũsu, nĩnendie kũmanya ũalyũlo waw'o. Nĩvo ĩndĩ noonie ũmwe ũilyĩ mũndũ aũngamĩte mbee wakwa.

16Nĩneewie wasya wa mũndũ ayĩtana e mũingo wa ũsĩ wa Ulai ayasya atĩĩ, ‘Kavilieli, elesya mũndũ ũsu ũalyũlo wa woni ũla woona.’

17Yĩla mũlaĩka Kavilieli wathengeeie vala naũngamĩte, nĩnatelemile, na navalũka nakoma nthĩ na ĩvu. Nĩwambĩie atĩĩ, ‘Mwana wa mũndũ, manya kana woni ũsu wĩneena ĩũlũ wa ĩvinda ya mũminũkĩlyo.’

18“Aendee kũneena nakwa, nĩnavalũkile nthĩ na ĩvu, na nakwatwa nĩ too mwingĩ. Ĩndĩ nĩwangwatie kw'oko ambũkĩlya,

19na ambĩa atĩĩ, ‘Nĩngũũtavya maũndũ ala meĩkĩka ĩtina wa ĩvinda ya ũthatu wa Ngai. Woni ũsu nĩ ĩũlũ wa ĩvinda ya mũminũkĩlyo yĩla yĩtw'ĩtwe.

20“ ‘Ĩla ndũũme yĩ mbya ilĩ woona nĩ asumbĩ elĩ ma Metia na Velisia.

21Nthenge nĩ mũsumbĩ wa Ũkiliki. Ũla ũvya mũnene wĩ kĩtulyanĩ kyayo nĩ mũsumbĩ wa mbee wa Ũkiliki.

22Mbya inya ila imeie yĩla ũla ũmwe ũtilĩkile nĩ mosumbĩ ana ala makaanĩka kuma ũsumbĩnĩ ũsu ũmwe. Mosumbĩ asu maikethĩwa na vinya ta ũsumbĩ ũla wa mbee.

23Yĩla mũminũkĩlyo wa mosumbĩ asu wĩthengeea, na ũyĩthĩa no nginya makanw'e nũndũ wa ũvuku ũla mekĩte, vakeethĩwa na mũsumbĩ wĩ ngoo mbũmũ, mũthũku na wĩ ũvũngũ.

24Akeethĩwa na vinya mwingĩ mũno, o na kau ti kwa ũtonyi wake mwene. Akaete wanangĩko mũnene, na ayĩendeea nesa maũndũnĩ onthe ala wĩĩkaa. Akaete wanangĩko andũnĩ me ũtonyi, na atheunĩ ma Ngai.

25Akakengana nĩ kana aendee nesa, na akeew'a e mũnene. Yĩla andũ meĩthĩwa na mũuo, akooaa aingĩ, na aileana na Mũsumbĩ wa asumbĩ. Ĩndĩ ũu wĩ o vo akooawa, na ti kwa vinya wa mũndũ.

26Woni ũũ wa nthembo sya wĩoo na kwakya ũla waelew'a ũkeanĩa. Ĩndĩ yu ũvithany'e, nũndũ nũkwĩkala ĩvinda ĩasa ũyĩsa kwĩanĩw'a.’

27“Nyie Ndanieli nĩnakwatiwe nĩ mĩnoo, na nakoma mĩthenya yĩana ũndũ mũna nĩ mũwau. Nĩvo ĩndĩ nookĩlile, na nathi kũtethya wĩa ũla mũsumbĩ wanengete. Nĩnaseng'iw'e mũno nĩ woni ũsu; ndwaĩ ũtonya kũeleeka.

← Chapter 7 Jump to: Chapter 9 →