Esther 2

Kamba (MBIVILIA ŨVOO MŨSEO)

← Chapter 1 Jump to: Chapter 3 →

1Ĩtina wa maũndũ asu, yĩla woo wa Mũsumbĩ Aasuelo wauisye, nĩwalilikanile mũka wake Vasiti na maũndũ ala weekĩte vamwe na ũtw'ĩo ũla waumĩtye ĩũlũ wake.

2Nĩvo ĩndĩ atai amwe ala mekalaa vakuvĩ na mũsumbĩ mamwĩie atĩĩ, “Eka ũmanthĩwe eĩtu ma mũika, anake, ala mataamanyana kĩ-mwĩĩ na mũndũ-ũme.

3Naku mũsumbĩ ũinyuva andũ kuma kĩla kĩmwe kya kĩsio kĩ ũsumbĩnĩ waku, nĩ kana mamaete eĩtu asu onthe nyũmbanĩ yaku ya kĩ-ũsumbĩ, ĩla yĩkalaa aka ndũanĩ nene ya Susa. Mekalae vo maisũvĩwa nĩ Ekai, ũla mũvakũe waku we mũsumbĩ, ũla nĩwe ũsũvĩaa aka. Eĩtu asu manengawe syĩndũ sya kwĩyanakavya.

4Mwĩĩtu ũla wĩkwendeesya we mũsumbĩ nĩetw'ĩka kĩveti kyaku vandũ va Vasiti.” Ũndũ ũsu nĩwamwendeeisye mũsumbĩ na eeka ũu.

5Ndũanĩ ĩsu nene ya Susa vaĩ Mũyuti ũmwe weetawa Molitekai mwana wa Yaili. Aĩ wa mbaĩ ya Mbengyameni, na nzyawa ya Kisi na Simei.

6Yĩla Nevukatinesa mũsumbĩ wa Mbavilonĩ watavie Yekonia, mũsumbĩ wa nthĩ ya Yuta kuma Yelũsalemu, vamwe na andũ angĩ ala watwaie me atave, Molitekai aĩ ũmwe woo.

7Molitekai nĩwe waeete Esita, mwĩĩtu wa mwendw'a-ĩthe, nĩkwĩthĩwa ndaĩ ĩthe kana nyinyia. Esita aĩ mwĩĩtu mwanake na wa kwendeesya, na ĩsyĩtwa yake ya Kĩevelania nĩ Atasa. Yĩla ĩthe na nyinyia makwie, Molitekai nĩwamwosie amũea ta mwĩĩtu wake.

8Kwoou yĩla ũtw'ĩo wa mũsumbĩ watavaniw'e kĩla vandũ, eĩtu aingĩ nĩmaetiwe ndũanĩ nene ya Susa na maiwa ũsũvĩonĩ wa Ekai. Esita o nake nĩwatwaiwe nyũmbanĩ ya mũsumbĩ, na anenganwe ũsũvĩonĩ wa Ekai ũla waũngamĩe nyũmba ĩla yasũvĩĩawa aka.

9Ekai nĩwendeeiw'e mũno nĩ Esita na atw'a kũmwĩka nesa. O kwa mĩtũkĩ nĩwamũnengie syĩndũ sya kwĩyanakavya vamwe na lĩu mũna. Nĩwamũnyuvĩie athũkũmi mũonza ma eĩtu kuma akanĩ ala mathũkũmaa nyũmbanĩ ya mũsumbĩ, na atwawa vamwe namo mamũsũvĩae vandũnĩ vala vaseo vyũ nthĩnĩ wa ĩla nyũmba yasũvĩĩawa aka.

10Esita ndaĩ aaweta andũ ma mbaĩ yake nĩ aaũ, nĩkwĩthĩwa Molitekai nĩwamwĩaĩĩte akamwĩa ndakaawete.

11Kĩla mũthenya Molitekai nĩwookaa vau nza wa nyũmba ĩsu, nĩ kana amanye ũndũ Esita ũendee na kĩla kĩendee ĩũlũ wake.

12Kĩla mwĩĩtu atanamba kũthi mbee wa Mũsumbĩ Aasuelo, aaĩlĩte kwĩthĩwa aminĩte myei ĩkũmi na ĩlĩ ayĩka maũndũ onthe ma kwĩyanakavya ala eĩtu mathĩĩwe kwĩka, myei thanthatũ ya kwĩvaka mauta me mũuke mũseo mũno metawa manemane, na myei ĩla ĩngĩ thanthatũ makĩyanakavya kwa kwĩvaka mauta angĩ maseo mũno, na syĩndũ ingĩ nzeo ila syĩvakawa nĩ aka.

13Na ũũ nĩw'o mwĩĩtu waendaa mbee wa mũsumbĩ: Kĩla ũkwenda kyonthe athi kwa mũsumbĩ ekĩĩte, nĩwanengawe kuma nyũmbanĩ ĩsu yasũvĩĩawa aka.

14Ĩa mawĩoo mwĩĩtu nĩwaendaa mbee wa mũsumbĩ na ũnĩ ũsu aisyoka na kũlika nyũmbanĩ ĩngĩ na kwiwa ũsũvĩonĩ wa Sasikasi, mũthũkũmi ũngĩ mũvakũe wa mũsumbĩ ũla waũngamĩe iveti sya ndũsyo ila syekalaa kũu nyũmbanĩ kwa mũsumbĩ. Mwĩĩtu auma kwa mũsumbĩ ndaĩ atonya kũsyoka vo, ate o mũsumbĩ akendeew'a nĩwe na aitũmana kwa ũsu wamwendeesya kwa kũmwĩta na ĩsyĩtwa.

15Ĩvinda nĩyavikie ya Esita kũthi mbee wa mũsumbĩ. Esita aĩ mwĩĩtu wa Aviaili, mwendw'a-ĩthe wa Molitekai, ũla wamwosete na kũmũea ta mwĩĩtu wake. Mwĩĩtu ũsu nĩwendeeisye andũ onthe ala mamwonie, na aithi mbee wa mũsumbĩ ndaaĩtya kĩndũ ate o kĩla Ekai ũla mũndũ mũvakũe wamũtavĩtye.

16Esita nĩwatwaiwe mbee wa mũsumbĩ Aasuelo nyũmbanĩ yake ya kĩ-ũsumbĩ mweinĩ wa ĩkũmi ũla wĩtawa Tevethi, naw'o waĩ mwaka wa mũonza kuma Aasuelo asumbĩka.

17Mũsumbĩ nĩwamwendie Esita mũno mbee wa aka ala angĩ onthe. Nĩwendeeiw'e mũno nĩwe kũvĩtũka eĩtu ala angĩ onthe, na amwĩkĩa ngovia ya kĩ-ũsumbĩ amũtw'ĩkĩthya mũka wake vandũ va Vasiti.

18Kwoou mũsumbĩ nĩwaseũvĩisye andũ make ma ndaĩa na athũkũmi make mboka nene kwondũ wa ndaĩa ya Esita. O ta ũu mũsumbĩ nĩwanengie andũ ala me ungu wa ũsumbĩ wake ĩvinda ya kũthũmũa, na amanenga mĩthĩnzĩo ya thooa mũnene kuma kwake.

19Yĩla eĩtu asu meetiwe ĩvinda ya kelĩ, Molitekai aĩ ananyuvwa atw'ĩke mũthũkũmi nyũmbanĩ ya mũsumbĩ.

20Kũvika o na ĩvinda yĩu Esita ndaĩ aaweta andũ ma mbaĩ yake nĩ aaũ, kwĩanana na ũndũ Molitekai wamwĩaĩĩte. Esita nĩwamwĩw'aa Molitekai, o tondũ wamwĩw'aa aimũea e kana kanini.

21Ĩvindanĩ yĩla Molitekai wathũkũmaa nyũmbanĩ ya mũsumbĩ, elĩ katĩ wa ala aũme avakũe ma mũsumbĩ namo nĩ Mbikithana na Telesi, ala masungaa mũomonĩ wa kũlika kwa mũsumbĩ, nĩmathatiw'e nĩ mũsumbĩ na maseũvya mũvango wa kũmũaa.

22Ũndũ ũsu nĩwamanyĩkie nĩ Molitekai na atavya Esita mũka wa mũsumbĩ. Esita nĩwaendie amũtavya mũsumbĩ ũvoo ũsu watavĩtw'e nĩ Molitekai.

23Yĩla ũvoo ũsu waatĩĩiwe na weethĩwa nĩ wa w'o, andũ asu me elĩ nĩmooaiwe kwa kũsuw'a mũtĩnĩ vala vooaĩawa andũ. Ũndũ ũsu nĩwaandĩkiwe Ĩvukunĩ ya Ũlilikany'o wa maũndũ mũsumbĩ asyaĩĩsye.

← Chapter 1 Jump to: Chapter 3 →