Esther 5

Kamba (MBIVILIA ŨVOO MŨSEO)

← Chapter 4 Jump to: Chapter 6 →

1Mũthenyanĩ wa katatũ wa kũtĩĩa kũya, Esita nĩweekĩie ngũa syake sya kĩ-ũsumbĩ, na athi aũngama nza vakuvĩ na mũomo wa nyũmba ya nthĩnĩ, ĩla mũsumbĩ wekalaa. Mũsumbĩ nĩwailyĩ nthĩ kĩvĩlanĩ kyake kya kĩ-ũsumbĩ asyaĩtye mũomonĩ wa nyũmba ĩsu.

2Yĩla mũsumbĩ woonie Esita mũka wake aũngyĩ nza, vakuvĩ na mũomo wa nyũmba ĩsu waĩ, nĩwendeeiw'e nĩwe na ookĩlya ĩla ndata yake ya thaavu wakwete. Kwoou Esita mũka wa mũsumbĩ nĩwathengeeie akwata mũthya wa ndata ĩsu.

3Mũsumbĩ nĩwamũkũlilye atĩĩ, “Wĩenda kwĩkwe ata we Esita? Vata waku nĩ mwaũ? Nũũnengwa kĩla ũkwenda o na ethĩwa nĩ nyusu ya ũsumbĩ wakwa.”

4Esita nĩwamũsũngĩie amwĩa atĩĩ, “Ethĩwa nũkwona wĩ waĩlu we mũsumbĩ, nĩngũũthokya ũmũnthĩ wĩ na Amani mũke mbokanĩ ĩla nĩseũvĩtye kwondũ waku.”

5Mũsumbĩ nĩweeaie asya atĩĩ, “Mwĩtei Amani mĩtũkĩ nĩ kana twĩke ũndũ Esita ũkwenda.” Kwoou mũsumbĩ na Amani nĩmaendie mbokanĩ ĩsu Esita waseũvĩtye.

6Maendee kũnyw'a ndivai, mũsumbĩ nĩwakũlilye Esita atĩĩ, “Vata waku nĩ mwaũ? Nũũnengwa kĩla ũkwenda. Wĩenda kwĩkwe ata? O na ethĩwa nĩ kũnengwa nyusu ya ũsumbĩ wakwa, ũu nĩw'o ũkwĩkwa.”

7Esita nĩwasũngĩie asya, “Vata wakwa na wendi wakwa nĩ atĩĩ:

8Ethĩwa mũsumbĩ nĩwendeeaw'a ninyie na nũkwona wĩ waĩlu kwĩanĩsya vata na wendi wakwa, vatonyeka we mũsumbĩ wĩ na Amani mwĩũka ũnĩ mbokanĩ ĩla ngũthi kũseũvya kwondũ wenyu. Nĩvo ĩndĩ nĩkũtavya we mũsumbĩ vata wakwa nĩ mwaũ.”

9Amani aumĩte mbokanĩ ĩsu aĩ mũtanu na nĩweew'aa e mwĩanĩe. Ĩndĩ yĩla woonie Molitekai mũvĩanĩ wa kũlika kwa mũsumbĩ, na Molitekai alea kũũngama kana kũmũnenga ndaĩa, Amani nĩwathatiw'e mũno nĩwe.

10Ĩndĩ Amani nĩwoomĩĩisye woo ũsu na enũka. Avika mũsyĩ nĩweetie anyanyae make na akũlya kĩveti kyake Nzelesi kĩthĩwe vamwe namo.

11Amani nĩwambĩĩie kwĩkathĩĩa na kũmatavya ũndũ ũthwii wake wĩana, ũtalo wa ana make, na mavinda onthe ala mũsumbĩ ũmũnenevetye akakwata ndaĩa nene, na ũndũ ũmũtw'ĩkĩthĩtye mũndũ mũnene kwĩ ala angĩ ma ndaĩa, na athũkũmi onthe ma mũsumbĩ.

12Nĩwaendeeie kũneena ayasya atĩĩ, “O na Esita mũka wa mũsumbĩ, ndanetĩkĩlya mũndũ ũngĩ o na wĩva aendany'e na mũsumbĩ mbokanĩ ĩla eĩseũvĩtye ate o nyie. O na ũnĩ no ũtũthoketye ĩngĩ nĩ na mũsumbĩ.

13Ĩndĩ o na maũndũ asu onthe me o vo, ndĩkwĩw'a nĩ mwĩanĩe yĩla ngwona ũla Mũyuti wĩtawa Molitekai ailyĩ mũomonĩ wa mũvĩa wa kũlika kwa mũsumbĩ.”

14Nĩvo ĩndĩ kĩveti kyake Nzelesi vamwe na anyanyae make onthe mamwĩie atĩĩ, “Ĩnzĩla mũtĩ wĩ na ũasa wa mita mĩongo ĩlĩ na ilĩ, na ũnĩ kwakya ũikũlya mũsumbĩ nĩ kana Molitekai asũw'e vo, na ĩndĩ ũithi ũkatane wĩ na mũsumbĩ mbokanĩ ĩsu.” Ũtao ũsu nĩwamwendeeisye Amani, na kwoou aumya mwĩao nĩ kana mũtĩ ũsu wĩnzĩlwe.

← Chapter 4 Jump to: Chapter 6 →