Esther 4

Kamba (MBIVILIA ŨVOO MŨSEO)

← Chapter 3 Jump to: Chapter 5 →

1Yĩla Molitekai wamanyie ĩũlũ wa maũndũ onthe ala meekĩkĩte, nĩwatembũangie ngũa syake nĩ woo. Nĩwasyokie eekĩa ngũa ngaamu sya makunia, na eeyũmbanga mũu mũtwe na avĩtĩla ndũanĩ aĩĩte kĩĩo kĩ woo na wasya mũnene.

2Nĩwaendie nginya mũomonĩ wa mũvĩa wa nyũmba ya mũsumbĩ, nũndũ vai mũndũ waĩ atonya kũlika kwa mũsumbĩ ekĩĩte ngũa ngaamu sya makunia.

3Nthĩnĩ wa kĩla kĩsio vala ũtw'ĩo ũsu wa mũsumbĩ wavikaa, nĩveethĩawa kĩĩo na kyeva kĩnene andũnĩ ma mbaĩ ya Ayuti. O ta ũu nĩmatĩĩaa kũya, makaĩa kĩĩo kĩ woo na wasya mũnene, na aingĩ moo mayĩkĩa ngũa nziũ ngaamu sya makunia na kwĩyiliitya mũunĩ.

4Yĩla athũkũmi ala ma aka na ala angĩ maĩ aũme avakũe mamũtavisye Esita maũndũ ala Molitekai waendee kwĩka, kĩveti kĩu kya mũsumbĩ nĩkyeethĩiwe na kĩũũyũ kĩnene. Nĩkyanenganie ngũa itwaĩwe Molitekai nĩ kana aumye ngũa ngaamu sya makunia, ĩndĩ ailea vyũ.

5Nĩvo ĩndĩ Esita watũmanie Athaki, ũmwe wa ala aũme avakũe ma mũsumbĩ, ũla wanyuvĩtwe nĩ mũsumbĩ ethĩwe mũthũkũmi wake, aende vala ve Molitekai akamanye nĩ kyaũ kĩendee na kyumanĩte na ũndũ mwaũ.

6Athaki nĩwaendie vala ve Molitekai mũomonĩ wa mũvĩa wa kũlika nyũmbanĩ ya mũsumbĩ ĩla yaĩ ndũanĩ katĩ.

7Molitekai nĩwamũtavisye maũndũ onthe ala meekĩkĩte, na mbesa syonthe ila Amani wathanĩte kũnengane syĩkĩwe kĩnandũnĩ kya mũsumbĩ nĩ kana Ayuti onthe moawe.

8O ta ũu Molitekai nĩwanengie Athaki valũa ũla waandĩkĩtwe ũtw'ĩo ũla wanenganĩiwe vau Susa, ũeleetye kana Ayuti onthe nĩmaĩlĩte kũawa. Molitekai nĩwamũkũlilye nĩ kana atwaĩe Esita valũa ũsu, na aimũelesya maũndũ asu na kũmũkũlya athi akesũvane kwa mũsumbĩ nĩ kana andũ ma mbaĩ yake mew'ĩwe tei.

9Athaki nĩwaendie atavya Esita maũndũ onthe ala wataviw'e nĩ Molitekai.

10Esita nĩwatũmie Athaki kũla kwĩ Molitekai akamwĩe atĩĩ,

11“Athũkũmi onthe ma mũsumbĩ na andũ ala angĩ onthe mekalaa isionĩ ila syĩ ungu wa ũsumbĩ wake, nĩmesĩ kana ve mwĩao ũmwe tũ, ũla waasya kana mũndũ-ũme kana mũndũ mũka o na wĩva, ũla wĩthi alike nyũmbanĩ ya mũsumbĩ vala wĩkalaa atetĩtwe vo, akooawa. Mũndũ ũla ũtakoawa no ũla wĩlika vo na mũsumbĩ ayũkĩlya ĩla ndata yake ya thaavu kwonany'a kana ũsu ndaĩlĩte kũawa. Yu mĩthenya mĩongo ĩtatũ nĩ mĩthelu nyie ndalika kwa mũsumbĩ, nũndũ ndaandũmana nĩthi vo.”

12Yĩla Molitekai wakwatie ũtũmani wa Esita,

13nĩwanenganie ũsũngĩo ũũ, “Ndũkasũanĩe kana nũndũ wĩ nyũmbanĩ ya mũsumbĩ, no ue wĩ weka ũkavonoka katĩ wa Ayuti ala angĩ onthe.

14Nũndũ ethĩwa ũkavindya ĩvinda ta yĩĩ, ũkiakisyo na ũtangĩĩo wa Ayuti ũkauma kũndũ kũngĩ, ĩndĩ we na andũ ma mũsyĩ wenyu mũkooawa. Nũũ wĩsĩ kana ndũneetw'ĩkĩthw'a mũka wa mũsumbĩ kwondũ wa ĩvinda ta yĩĩ twĩ nayo.”

15Nĩvo ĩndĩ nake Esita wanenganie ũsũngĩo ũũ ũtwaĩwe Molitekai,

16“Enda wũmbany'e Ayuti onthe ala me ndũanĩ ya Susa, na mũitĩĩa kũya na kũvoya nũndũ wakwa. Mũikaye kana kũnyw'a kĩndũ vandũ va mĩthenya ĩtatũ, ũtukũ na mũthenya, nakwa vamwe na athũkũmi makwa ma aka nĩtũũtĩĩa kũya o ta ũu. Ĩtina wa ũu, ngathi vala ve mũsumbĩ, o na kau ũndũ ũsu ndwosana na mĩao, na ĩndĩ ethĩwa nĩ kũkw'a ngakw'a.”

17Molitekai nĩwaendie na eeka maũndũ onthe ala Esita wamũtavisye.

← Chapter 3 Jump to: Chapter 5 →