Esther 8

Kamba (MBIVILIA ŨVOO MŨSEO)

← Chapter 7 Jump to: Chapter 9 →

1Mũthenyanĩ o ũsu, Mũsumbĩ Aasuelo nĩwanengie Esita syĩndũ syonthe ila syaĩ sya Amani, ũla waĩ mũmaitha wa Ayuti. Molitekai nĩwookie kwa mũsumbĩ nĩkwĩthĩwa Esita aĩ anamũtavya ũndũ maileny'e.

2Mũsumbĩ nĩwaumisye mbete yake ya kwĩkĩa mũulĩ, ĩla waĩ anoosa kuma kwa Amani na amũnenga Molitekai. Esita nĩwamũnengie Molitekai syĩndũ syonthe ila syaĩ sya Amani asũvĩae.

3Esita nĩwasyokie kũmwĩsũva mũsumbĩ atulĩtye ndu maũũnĩ make, aĩĩte nĩ kana aalyũle mũvango mũthũku wa Amani nzyawa ya Akaki ũla waseũvĩtye wa kũaa Ayuti.

4Mũsumbĩ nĩwookĩlilye ĩla ndata yake ya thaavu amwelekelye Esita.

5Esita nĩwookĩlile aũngama mbee wake. Nĩwaisye atĩĩ, “Ethĩwa nũkwona wĩ waĩlu we mũsumbĩ, na nĩwendeeaw'a ninyie, na ethĩwa ũndũ ũũ nũkwoneka wĩ ũseo kwaku, nĩkũandĩkwe ũtw'ĩo ũleanĩte na ũla waandĩkĩtwe valũanĩ wa Amani, ĩla nzyawa ya Akaki na mwana wa Ametatha. Valũa ũsu aandĩkĩte nĩ kana Ayuti onthe ala me isionĩ ila we mũsumbĩ ũsumbĩkĩte moawe.

6Ndonya ata nyie kũmĩĩsya kwona andũ ma mbaĩ yakwa maiminwa, na andũ ma nyũmba yakwa mayũawa?”

7Nĩvo ĩndĩ Mũsumbĩ Aasuelo weeie Esita na Molitekai ũla Mũyuti, “Nĩnumisye mwĩao Amani ooawa kwa kũsũw'a na nakũnenga we Esita syĩndũ syake syonthe, nũndũ wa mũvango wake mũthũku wa kwenda kũaa Ayuti.

8Ũtw'ĩo wumĩtw'e nĩ mũsumbĩ na kũĩkĩĩthw'a na mũulĩ wa kĩ-ũsumbĩ ndũtonya kũvetwa. Ĩndĩ ũu wĩ o vo, nĩmũtonya kũandĩka mũkatavya Ayuti ũndũ o na wĩva ũla mũkwenda mũitũmĩa ĩsyĩtwa yakwa, na kũwũĩkĩĩthya kwa kwĩkĩa ũvano ũsu wa kĩ-ũsumbĩ.”

9Matukũ mĩongo ĩlĩ na atatũ mwei wa katatũ, ũla wĩtawa Sivani, Molitekai nĩweetie athũkũmi ma mũsumbĩ ala matethasya wĩa wa kũandĩka, na ameaĩa maandĩke maũndũ onthe ala wamatavisye. Valũa isu nĩsyatwaĩwe Ayuti, makavana onthe, na anini moo ala maĩ isionĩ isu syonthe syĩ ĩana na mĩongo ĩlĩ na mũonza. Isio isu syaumĩte India kũvika Ethiovia. Valũa isu syaandĩkĩtwe na ithyomo ila ineenawa isionĩ isu, na o ta ũu ikaandĩkĩwa Ayuti na kĩthyomo kĩla kyoo.

10Valũa isu syaandĩkĩtwe nĩ Molitekai ĩsyĩtwanĩ ya Mũsumbĩ Aasuelo, na kũĩkĩĩthw'a kwa kwĩkĩwa mũulĩ wa kĩ-ũsumbĩ. Nĩvo ĩndĩ andũ amwe matũmiwe matwaa valũa isu makuĩtwe nĩ mbalasi sya mũsumbĩ ila syaendaa syĩkalaatĩte mũno.

11Ũtw'ĩo ũsu wa mũsumbĩ nĩweetĩkĩlĩtye Ayuti onthe nthĩnĩ wa kĩla ndũa nene kũmbana vamwe na kwĩtetea kwa kũkita na amaitha moo. Nĩmeetĩkĩlĩtw'e kũaa na kũmina vyũ asikalĩ onthe ma kaũ ma mbaĩ sya kĩsio o na kĩva, ala matonya kũmavithũkĩa vamwe na iveti na syana syoo. O ta ũu nĩmeetĩkĩlĩtw'e kwosa ta mũtavo syĩndũ sya amaitha moo.

12Mũthenya ũla wanyuvĩtwe kwondũ wa Ayuti kwĩka maũndũ asu nthĩnĩ wa isio syonthe ila Aasuelo wasumbĩkĩte, waĩ wa matukũ ĩkũmi na atatũ mwei wa ĩkũmi na ilĩ, naw'o nĩ mwei wa Atali.

13Ũtw'ĩo ũsu waĩ ũtavanw'e ta mwĩao isionĩ syonthe sya Velisia, na kũmanyĩka nĩ kĩla mũndũ nĩ kana Ayuti meyũmbany'e kwĩyĩĩvanĩsya kwa amaitha moo mũthenya ũsu wavika.

14Kwoou andũ asu matũmĩtwe nĩmatũlile mbalasinĩ isu syatũmĩkaa mavatanĩ ma mũsumbĩ, na syathi isembete mũno kwĩanana na mwĩao wa mũsumbĩ. Ũtw'ĩo ũsu waandĩkĩwe ndũanĩ nene ya Susa.

15Molitekai nĩwaumie nyũmba kwa mũsumbĩ ekĩĩte ngũa ndaasa ya kĩ-ũsumbĩ yaĩ ya langi wa mbuluu na ũngĩ mweũ; ngũa nzeo ndũmu yailyĩ ta ndune na ngovia ya thaavu mbanake ya kĩ-ũsumbĩ. Andũ ala maĩ ndũanĩ ya Susa nĩmalonzanilye mũno nũndũ wa kũtana na kwĩw'a mũyo.

16Ayuti nĩmeethĩiwe na ũtanu, na kwĩw'a mũyo na meew'a me eanĩe ta andũ makwata ũsindi.

17Ayuti ma kĩla kĩsio na ndũa syonthe kũla mwĩao na ũtw'ĩo wa mũsumbĩ wavikaa, nĩmeethĩawa na ũtanu na kwĩw'a mũyo. Nĩmaseũvisye mboka na meethĩwa na ĩvinda ya kũthũmũa. Andũ aingĩ ma nthĩ isu nĩmatw'ĩkie Ayuti nũndũ nĩmambĩĩie kũkĩa Ayuti.

← Chapter 7 Jump to: Chapter 9 →