Esther 7

Kamba (MBIVILIA ŨVOO MŨSEO)

← Chapter 6 Jump to: Chapter 8 →

1Kwoou mũsumbĩ na Amani nĩmaendie kũĩsanĩa mboka na Esita mũka wa mũsumbĩ.

2Maendee kũnyw'a ndivai ĩvindanĩ yĩu ya mboka ya kelĩ, mũsumbĩ nĩwamũkũlilye Esita o ĩngĩ, “Vata waku nĩ mwaũ we Esita, mũka wa mũsumbĩ? Ndavye na nũũnengwa kĩla ũkwenda. Wĩenda kwĩkwe ata? O na ethĩwa nĩ nyusu ya ũsumbĩ wakwa nũũnengwa.”

3Esita nĩwamũsũngĩie amwĩa atĩĩ, “Ethĩwa nĩwendeeaw'a ninyie we mũsumbĩ, na nũkwona wĩ waĩlu, vata wakwa nĩ thayũ wakwa wĩthĩwe ũsũvĩonĩ, naw'o wendi wakwa o ta ũu, nĩ andũ ma mbaĩ yakwa maendee kwĩkala thayũ.

4Nũndũ nyie na andũ ma mbaĩ yakwa nĩtũthooetw'e tũawe tũthele vyũ. Kethĩwa tũthooetw'e o ta ngombo sya aũme na aka, nyie nonĩvindye na ndikũthĩny'a ĩũlũ wa ũndũ ũsu, ĩndĩ yu ithyĩ tũkilĩlye kũminwa vyũ.”

5Mũsumbĩ Aasuelo nĩwamũkũlilye Esita, “Mũndũ ũsu nũũ na aĩva ũsu ũtonya kwĩka ũu?”

6Esita amũsũngĩa, “Mũmaitha waitũ, na ũla ũkwenda tũawe nĩ mũndũ ũũ mũthũku ũkwĩtwa Amani!” Amani nĩwakwatiwe nĩ kũthĩlĩa nĩ w'ĩa, e mbee wa mũsumbĩ na mũka wake Esita.

7Mũsumbĩ nĩwookĩlile ew'ĩte woo auma vau mboka yaseũvĩw'e athi nza wa nyũmba yake kũla kũvandĩtwe malaa. Ĩndĩ Amani nĩwatiiwe vau na athi kwĩkalanĩla na Esita amwĩsũve ew'ĩwe tei ndakoawe, nũndũ nĩwamanyie kana ve ũndũ mũthũku mũsumbĩ ũendee kũvanga ĩũlũ wake.

8Yĩla mũsumbĩ wasyokie vala manyw'ĩĩaa ndivai kuma vala waĩ anathi, nĩweethĩie Amani evalũkĩtye kĩvĩlanĩ kĩasa vala Esita wailyĩ ayĩsũvana ew'ĩwe tei. Mũsumbĩ nĩwaseng'ie na aneena na wasya mũnene asya atĩĩ, “Mũndũ ũũ esyoka akwate mũka wa mũsumbĩ na kũmũvukya nĩ o vo nyũmbanĩ yakwa mwene?” Mũsumbĩ aimina kũneena ndeto isu oou, ala aũme avakũe mekalaa kwa mũsumbĩ, nĩmavw'ĩkie Amani ũthyũ.

9Ũmwe wa aũme asu weetawa Alivona nĩwaisye atĩĩ, “O na ve mũtĩ wĩ na ũasa wa mita mĩongo ĩlĩ na ilĩ mũsyĩ kwa Amani, ũla ũseũvĩtye akenzĩla nĩ kana asũsye Molitekai, ũla watangĩĩie mũsumbĩ ndakoawe!” Nĩvo ĩndĩ mũsumbĩ waisye, “Mũsũsyei vo!”

10Kwoou nĩmasũisye Amani mũtĩnĩ ũla waseũvĩtye nĩ kana asũsye Molitekai vo. Naw'o ũthatu wa mũsumbĩ wausya.

← Chapter 6 Jump to: Chapter 8 →