Esther 9

Kamba (MBIVILIA ŨVOO MŨSEO)

← Chapter 8 Jump to: Chapter 10 →

1Matukũ ĩkũmi na atatũ mwei wa ĩkũmi na ilĩ, ũla nĩw'o wĩtawa Atali, nĩw'o mwĩao na ũtw'ĩo wa mũsumbĩ weanĩaw'a. Ũũ now'o mũthenya ũla amaitha ma Ayuti meeteelete mamoae na kũmamina, ĩndĩ maũndũ nĩmaalyũkile na Ayuti makwata ũsindi ĩũlũ wa amaitha moo.

2Ayuti nĩmoombanĩie ndũanĩ syonthe sya isio ila Mũsumbĩ Aasuelo wasumbĩkĩte, nĩ kana mavithũkĩe ala mendaa kũmamina. Vai mũndũ waĩ atonya kũmakĩlya vinya, nũndũ andũ onthe nĩmamakĩaa mũno.

3Atongoi ma isio isu, makavana, na anini moo onthe na athũkũmi ma kwa mũsumbĩ nĩmatetheeisye Ayuti nũndũ o namo nĩmamũkĩaa Molitekai.

4Molitekai aĩ anambĩĩa kwĩthĩwa mũndũ wĩ ũtonyi nyũmbanĩ ya mũsumbĩ, na nguma yake ĩkanyaĩĩka isionĩ isu syonthe. Mũndũ ũsu ũkwĩtwa Molitekai nĩwaendee kwongeleka kwĩthĩwa na ũtonyi mwingĩ.

5Kwoou Ayuti nĩmooaie amaitha moo kwa kũmatemanga na ũvyũ, na meeka ũndũ mendaa kwa onthe ala mamamenaa.

6Ndũanĩ nene ya Susa yĩ yoka, nĩmooaie andũ maana atano.

7O ta ũu, nĩmooaie Valĩsandatha, Ndalivoni, Asivatha,

8Volatha, Atalia, Alitatha,

9Valimasita, Alisai, Alitai na Vaisatha,

10ala maĩ ana ĩkũmi ma Amani mwana wa Ametatha ũla waĩ mũmaitha wa Ayuti. Ĩndĩ Ayuti mayaaosa kĩndũ o na kĩmwe kya andũ asu mooaie.

11Mũthenyanĩ o ũsu mũsumbĩ nĩwataviw'e ũtalo wa andũ ala mooaiwe ndũanĩ ya Susa.

12Mũsumbĩ nĩweeie Esita mũka wake atĩĩ, “Ndũanĩ ya Susa yĩ yoka, Ayuti moaie andũ maana atano vamwe na ana ĩkũmi ma Amani. Wĩona ta mekie ata isionĩ ila ingĩ syĩ ũsumbĩnĩ wakwa? Yu vata waku nĩ mwaũ? Nũũkwata kĩla ũkwenda? Wĩenda kwĩkwe ũndũ ũngĩ mwaũ? Ũu o naw'o nũkwĩkwa.”

13Esita nĩwasũngĩie mũsumbĩ amwĩa atĩĩ, “Ethĩwa nũkwona wĩ waĩlu we mũsumbĩ, ĩtĩkĩlya Ayuti ala me Susa meĩka ĩngĩ ũnĩ maũndũ ala meeka ũmũnthĩ, na ũyumya mwĩao nĩ kana mĩĩ ya ana asu ma Amani ĩsũw'e ũla mũtĩnĩ.”

14Kwoou mũsumbĩ nĩwaumisye mwĩao ũndũ ũsu wĩkwe; mwĩao ũsu nĩwatavaniw'e vau Susa na mĩĩ ĩsu yasũw'a.

15Matukũ ĩkũmi na ana ma mwei wa ĩkũmi na ilĩ, ũla nĩw'o wĩtawa Atali, Ayuti ala maĩ Susa nĩmoombanie onthe vamwe, na mooaa andũ maana atatũ ndũanĩ ĩsu. Ĩndĩ mayaaosa kĩndũ o na kĩmwe kya andũ asu mooaie.

16Ayuti ala angĩ maĩ isionĩ ila ingĩ Aasuelo wasumbĩkĩte, o namo nĩmoombanie vamwe metetee kwa kũkita amaitha, na mooaa andũ ala mamamenaa ngili mĩongo mũonza na itano, ĩndĩ mayaaosa kĩndũ o na kĩmwe kya andũ asu mooaie.

17Maũndũ asu meekĩkie matukũ ĩkũmi na atatũ mwei ũsu wa Atali, na mũthenya ũsu waatĩĩe wa matukũ ĩkũmi na ana mathũmũa, na maũtw'ĩkĩthya mũthenya woo wa kwĩthĩawa na mboka na kũtana.

18Ĩndĩ Ayuti ala maĩ Susa moombanie vamwe mokite na amaitha moo matukũ ĩkũmi na atatũ na matukũ ĩkũmi na ana. Nĩmathũmũie matukũ ĩkũmi na atano, na ũsu maũtw'ĩkĩthya mũthenya woo wa kwĩthĩawa na mboka na kũtana.

19Kĩu nĩkyo kĩtumaa Ayuti ala mekalaa motũinĩ, na ndũanĩ ila nini methĩwa na mũthenya wa matukũ ĩkũmi na ana ma mwei wa ĩkũmi na ilĩ, ũla nĩw'o wĩtawa Atali ta mũthenya wa kũthũmũa maitanaa, kwĩthĩwa na mboka na kũnenganae mĩthĩnzĩo ya lĩu ũmwe kwa ũla ũngĩ.

20Molitekai nĩwaandĩkie maũndũ asu na anengane mavalũa kwa Ayuti onthe ala mekalaa isionĩ syonthe ila Aasuelo wasumbĩkĩte.

21Nĩwamatavĩtye kana kĩla mwaka matukũ ĩkũmi na ana na ĩkũmi na atano ma mwei wa ĩkũmi na ilĩ, ũla nĩw'o wĩtawa Atali nĩ mĩthenya ya kũthũmũa.

22Ĩsu nĩ mĩthenya ĩla Ayuti masindie amaitha moo, na nĩw'o mwei ũla kĩmako kyoo kyatw'ĩkie ũtanu, na vandũ va kyeva meethĩwa na mũthenya wa kũthũmũa. Nĩmeeyĩaĩiwe kana mĩthenya ĩsu yaĩlĩte kwĩthĩwa ya mboka na kũtana, na o ta ũu ya kũnenganae mĩthĩnzĩo ya lĩu ũmwe kwa ũla ũngĩ na kũtethya ngya.

23Kwoou Ayuti nĩmeekie ũndũ Molitekai wameaĩie na mboka ĩsu yatw'ĩka ya kĩla mwaka.

24Amani mwana wa Ametatha, ĩla nzyawa ya Akaki na ũla waĩ mũmaitha wa Ayuti nĩweeaĩte kũkũnwe kula ila syeetawa Vuli, nĩ kana kũmanyĩke mũthenya ũla Ayuti onthe meũawa mathele vyũ.

25Ĩndĩ yĩla Esita waendie kũmũtavya mũsumbĩ, mũsumbĩ nĩwaumisye mwĩao kũandĩkwe ũtw'ĩo kana mũvango ũsu mũthũku Amani waseũvĩtye ĩũlũ wa Ayuti nĩ wĩanĩw'e kwake, na we na ana make masũw'e mũtĩnĩ ũla waseũvĩtye.

26Kĩu nĩkyo kĩtumaa mĩthenya ĩsu yĩtwa Vulimu kumana na ndeto ĩsu Vuli. Kumana na valũa ũla waandĩkĩtwe nĩ Molitekai na maũndũ onthe ala meekĩkie kwoo.

27Ayuti onthe nĩmaseũvisye mwĩao kwondũ woo, nzyawa syoo, na andũ onthe ala maketĩkĩla kũtw'ĩka Ayuti. Mwĩao ũsu waasya kana ĩvindanĩ yĩla yaĩlĩte kĩla mwaka, mĩthenyanĩ ĩsu ĩlĩ, Ayuti makeekaa maũndũ onthe kwĩanana na ũndũ maandĩkĩiwe ĩũlũ wayo nĩ Molitekai.

28Nĩkwavĩtũkĩthiw'e kana mĩthenya ĩsu ĩlĩ ĩkeethĩawa yĩ ya mwanya kĩla mwaka kwa andũ ma mĩsyĩ yonthe na nzyawa syoo, nthĩnĩ wa kĩla ndũa na kĩla kĩsio.

29Nĩvo ĩndĩ Esita mũka wa mũsumbĩ, mwĩĩtu wa Aviaili, na Molitekai ũla Mũyuti maĩkĩĩthisye kwa kũandĩka na ũkũmũ valũa ũngĩ wa kelĩ woonanĩtye kũvĩtũkĩthw'a kwa mboka ya Vulimu.

30Valũa ũsu nĩwatwaiwe kwa Ayuti onthe, isionĩ isu ĩana na mĩongo ĩlĩ na mũonza, ila syasumbĩkĩtwe nĩ Aasuelo. Ndeto sya valũa ũsu syamendeaa Ayuti mũuo na kwĩkalaa me ũsũvĩonĩ,

31na kũmataa vamwe na nzyawa syoo mekalasye mĩthenya ĩsu ya mboka ya Vulimu yĩ ya mwanya ĩvindanĩ yĩla yĩtw'ĩtwe, o ũndũ mekalasya mĩthenya ya kũtĩĩa kũya na ĩla ĩngĩ ya ĩvinda ya kyeva yĩ ya mwanya. Ũndũ ũsu weeaĩtwe nĩ Molitekai na Esita

32Esita nĩwaumisye mwĩao wa kũlũlũmĩĩlya walany'o ũsu wa mboka ya Vulimu, na mwĩao ũsu waandĩkwa vandũ ĩvukunĩ.

← Chapter 8 Jump to: Chapter 10 →