Hosea 1

Kamba (MBIVILIA ŨVOO MŨSEO)

Jump to: Chapter 2 →

1Ũũ nĩw'o ũtũmani ũla Mwĩai Ngai wanengie Osea mwana wa Mbeeli, ĩvindanĩ ya kũsumbĩka kwa Usia, Yothamu, Aasu na Esekia ala maĩ asumbĩ ma Yuta, na o ta ũu ĩvindanĩ ya kũsumbĩka kwa Yelovoamu mwana wa Yoasi mũsumbĩ wa Ĩsilaeli.

2Yĩla Mwĩai Ngai waneenie ĩvinda ya mbee na andũ ma Ĩsilaeli kwĩsĩla vala ve Osea, nĩweeie Osea atĩĩ, “Enda ũkatwae kĩveti ĩlwaya na ũisyaa nakyo syana sya ũmalwaya, nũndũ andũ ma nthĩ ĩno nĩmekwĩka ũmalwaya mwingĩ kwa kũndia nyie Mwĩai Ngai.”

3Kwoou Osea nĩwaendie na atwaa Ngomeli mwĩĩtu wa Ndivilaimu. Ngomeli nĩwaitavie na asyaa kavĩsĩ.

4Mwĩai Ngai nĩwaneenie na Osea amwĩa atĩĩ, “Ĩta kavĩsĩ kaa Yesileeli, nũndũ vatiele kavinda kanini na ngĩĩvanĩsya mũsumbĩ wa Ĩsilaeli nũndũ wa andũ ala ũmae wake Yeũ wooaĩie Yesileeli. Ngamina ũsumbĩ wa Ĩsilaeli.

5Mũthenya ũsu, ngaminĩa vinya wa asikalĩ ma Ĩsilaeli mwandanĩ wa Yesileeli.”

6Ngomeli nĩwaitavie ĩngĩ na asyaa kelĩtu. Mwĩai Ngai nĩwaneenie na Osea amwĩa atĩĩ, “Ĩta kelĩtu kaa Lo-luama, nũndũ kuma yu ndikambĩla kwĩw'ĩa andũ ma Ĩsilaeli tei, kana nĩmaekee ĩvinda o na yĩva.

7Ĩndĩ ngeew'ĩa andũ ma Yuta tei na kũmatangĩĩa nyie Mwĩai Ngai, Ngai woo; ndikamatangĩĩa na ũta, kana ũvyũ, kana kaũ, kana mbalasi, kana na asikalĩ ma kũlĩsa mbalasinĩ”

8Ngomeli amina kũaĩsya Lo-luama nĩwaitavie na asyaa kavĩsĩ.

9Mwĩai Ngai nĩwaneenie na Osea amwĩa atĩĩ, “Ĩta kavĩsĩ kaa Lo-ami, nũndũ inyw'ĩ mũi andũ makwa, nakwa ndi Ngai wenyu.”

10Ĩndĩ ũtalo wa andũ ma Ĩsilaeli ũkeethĩwa wĩ mwingĩ ta kĩthangathĩ kya ũkanga kĩla kĩtathimĩka kana kĩtatalĩka, na o vala vandũ meeĩiwe, “Mũi andũ makwa,” novo makeĩwa, “Mwĩ andũ ma Ngai ũla wĩ thayũ.”

11Andũ ma Yuta na andũ ma Ĩsilaeli makoombanĩw'a vamwe na mayĩnyuvĩa mũtongoi ũmwe, na makaendeea nesa me nthĩ yoo. Asi, ũsu ko nĩ mũthenya mũnene, mũthenya wa Yesileeli!

Jump to: Chapter 2 →