Hosea 12

Kamba (MBIVILIA ŨVOO MŨSEO)

← Chapter 11 Jump to: Chapter 13 →

1“Andũ ma Evalaimu maĩsaa kĩseve, na kũsembany'a na kĩseve kĩvyũ kyumĩte wumĩlonĩ wa syũa mũthenya w'onthe. Nĩmaendeeasya ũvũngũ na ũng'endu. Nĩmaseũvasya wĩw'ano na Asuli, na kũtwaa mauta Misili.

2“Mwĩai Ngai e na ũndũ wa kũsikata Yuta naw'o; akakany'a nzyawa sya Yakovo kwĩanana na mĩendele yoo, na kũmatuva kwĩanana na meko moo.

3Yĩla Yakovo waĩ ĩvunĩ kwa nyinyia, nĩwakwatie mwana-a-inyia kĩtiinyo, na atw'ĩka mũndũ mũima nĩwang'ang'anie na Ngai.

4Nĩwang'ang'anie na mũlaĩka amũsinda; nĩwaĩie na eesũva mũlaĩka amwĩw'ĩe tei. E Mbethi-eli nĩwakomanie na Ngai, na e kũu Ngai aneena nake.

5Mwĩai Ngai Mwene Ũtonyi W'onthe, Mwĩai Ngai nĩyo ĩsyĩtwa yake.

6Ĩndĩ inyw'ĩ mũsyokeei Ngai wenyu. Ĩthĩwai na wendo na kũatĩĩa sila wa katĩ, na kweteela Ngai wenyu kĩla ĩvinda.

7“Evalaimu nĩ ta mũthoosya wa syĩndũ, ũla ũtũmĩaa ithimi sya ũvũngũ, ũla wendete kũkenga andũ.

8“Evalaimu aneenete akasya atĩĩ, ‘Nĩ mũthwii mũno, nĩnĩkwatĩte ũthwii mwingĩ. Ĩndĩ vai mũndũ ũtonya kũndũla mũtĩ, akasya nakwatie ũthwii kwa nzĩa sya ũkengani.’ ”

9Mwĩai Ngai easya atĩĩ, “Ninyie Mwĩai Ngai, Ngai waku, ũla wakumisye nthĩ ya Misili. Ngatuma ũtũa maeemanĩ ĩngĩ, ta mĩthenyanĩ ya mboka ila itw'ĩtwe.

10“Nĩnaneenie na athani, na namony'a mawoni maingĩ, na kwĩsĩla vala maĩ naneena ngĩtũmĩa ngelekany'o.

11Ethĩwa andũ Ngileati me na ũthũku, vate ndĩi makatw'ĩka ma mana. Ethĩwa mathembeaa nthembo sya tũsalũ Ngilikali, ithembeo syoo nasyo ikatw'ĩka mbumbu sya mavia syũmbĩtwe mũũndanĩ mũĩme.”

12Yakovo nĩwakĩie athi Mesovotamia; e kũu nĩwathũkũmie akwate kĩveti, aĩthya malondu nĩ kana akwate mũka.

13Mwĩai Ngai nĩwatũmĩie mwathani, aumye andũ ma Ĩsilaeli nthĩ ya Misili, na amasũvĩa aitũmĩa mwathani.

14Evalaimu nũmũthatĩtye Mwĩai Ngai mũno, kwoou Mwĩai Ngai wake akamũĩvanĩsya nũndũ wa ũthũku wake, akamũkany'a nũndũ wa nthoni ila ũmwĩkĩĩthĩtye.

← Chapter 11 Jump to: Chapter 13 →