Hosea 8

Kamba (MBIVILIA ŨVOO MŨSEO)

← Chapter 7 Jump to: Chapter 9 →

1Vuva soo, amaitha nĩmavithũkĩĩte andũ makwa ta ndiũ! Nũndũ andũ makwa nĩmanangĩte ũtianĩo wakwa namo, na kũtũla mĩao yakwa.

2Andũ ma Ĩsilaeli nĩmambĩkaĩlaa mayasya atĩĩ, “Ame Ngai waitũ, nĩtwĩsĩ nue Ngai waitũ!”

3Ĩndĩ nĩmaleete ũla ũseo, mũmaitha akamaatĩĩa.

4Nĩmeenyuvĩie asumbĩ ndamanengete mwanya; nĩmanyuvaa atongoi ndametĩkĩlĩtye. Nĩmeeseũvĩisye mĩvw'anano maitũmĩa thaavu na silĩva woo; mĩvw'anano ĩsu nĩyatw'ĩkie wanangĩko woo.

5Inyw'ĩ andũ ma Samalia, ĩkyai ĩtheka mũvw'anano wenyu wa kasalũ. Nĩnĩthatĩte mũno nũndũ wenyu; mwĩendeea kũthaitha mĩvw'anano nginya ĩndĩĩ?

6Mĩvw'anano ĩsu yumĩte Ĩsilaeli! Kasalũ kaa kasũviw'e nĩ mũndũ; kasalũ kaa ti Ngai nongi; kasalũ kau ka Samalia kakatilangwa ilungu.

7“Mavandaa kĩseve, na makaketha kĩlingi. Mĩmea ĩla yĩ vo ndĩ na ũsyao, ndĩkakethwa kĩndũ; ĩkesa kwĩthĩwa na ũsyao, andũ kuma nthĩ ingĩ nĩmo meya ũsyao ũsu.

8Andũ ma Ĩsilaeli nĩ amelye, yu me katĩ wa andũ ma nthĩ ila ingĩ, matw'ĩkĩte ta mũio wa mana.

9Nũndũ nĩmaendete Asuli kwĩtya ũtethyo, mailyĩ ta ĩng'oi ya kĩthekanĩ yĩkwanganga yĩ yoka. Evalaimu nũthooete endwa make.

10O na vala nĩmethooeaa andũ kuma mbaĩnĩ ingĩ, yu nĩngũmombany'a. Nĩmekwambĩĩa kũthela, nũndũ wa kũvinyĩĩwa nĩ mũsumbĩ wĩ vinya.

11“Evalaimu nĩwingĩvĩtye ithembeo sya kumya nthembo ya ũekeo wa naĩ, ĩndĩ ithembeo isu nitw'ĩkĩte kwake ithembeo sya kwĩkĩa naĩ.

12O na ngamũandĩkĩa mĩao yakwa ngili mbingĩ, mĩao ĩsu amĩtalaa ta kĩndũ kĩeni.

13Nĩmendete kumya nthembo; nĩmathembaa nthembo na maiya i nyama, ĩndĩ nyie Mwĩai Ngai ndyendeeaw'a nĩmo. Yu nĩngũlilikana ũthũku woo, na kũmakany'a nũndũ wa naĩ syoo, nĩmekũsyoka nthĩ ya Misili.

14Andũ ma Ĩsilaeli nĩmolĩtwe nĩ Mũmbi woo, na makaka nyũmba sya kĩ-ũsumbĩ. Yuta nĩlũlũmĩĩlye ndũa mbingĩ na ũkũta, ĩndĩ ngaete mwaki ũvĩvye ndũa syoo, na kwananga ngũta syasyo ndũmu.”

← Chapter 7 Jump to: Chapter 9 →