Hosea 13

Kamba (MBIVILIA ŨVOO MŨSEO)

← Chapter 12 Jump to: Chapter 14 →

1Yĩla andũ ma mbaĩ ya Evalaimu maneena, andũ nĩmatetemaa, mbaĩ ila ingĩ sya Ĩsilaeli nĩsyamakathĩĩaa, ĩndĩ nĩmeekie naĩ kwa kũthaitha Mbaali na makw'a.

2Yu andũ ma Evalaimu nĩmaendee kwĩka naĩ mbeange, na makeseũvĩsya mĩvw'anano ya kyũma, mĩvw'anano ya silĩva ĩseũvĩtw'e kwĩanana na ũmanyi woo. Yonthe ĩseũvĩtw'e nĩ andũ me na ũmanyi, maneenaa makasya atĩĩ, “Thembeai mĩvw'anano ĩno.” Andũ makethasya mĩvw'anano ya tũsalũ na ngethi ya wendo!

3Kwoou makekala ta mũumbĩ wa kwakya, kana ta ĩmwe yĩla yĩthelaa kĩoko tene, ta mavuti ala maũlũkaa kuma kĩvũĩonĩ, kana ta syũki yumĩlĩĩle ndĩlĩsyanĩ.

4Mwĩai Ngai easya atĩĩ, “Ninyie Mwĩai Ngai, Ngai wenyu ũla wamumisye nthĩ ya Misili; vai Ngai ũngĩ mwĩsĩ ate o nyie, na eka nyie vai mũtangĩĩi ũngĩ.

5Nyie nĩnamũsũvĩie yĩla mwaĩ weũnĩ, nthĩ ĩla yaĩ mũnyao mũnene.

6Yĩla namaĩthisye nĩmavũnie, mavũna nĩmambĩĩie kwĩkathĩĩa, na kwoou moolwa ninyie.

7Kwoou ngamavithũkĩa ta mũnyambũ, ngamoveesya nzĩanĩ ta kĩkoyo.

8Ngamavithũkĩa ta nduva ĩvenetwe maswii mayo, ngamatembũanga ithũi syoo, na ta mũnyambũ mũka ngĩmaĩĩa vau, o ũndũ nyamũ mbai ĩtonya kũmatembũanga.

9“Inyw'ĩ andũ ma Ĩsilaeli ngamũmina, nũndũ nĩmũleanĩte nakwa; nĩmũleanĩte na mũtetheesya wenyu.

10Mũsumbĩ wenyu aĩva yu amwovosye? Maĩva atongoi ma ndũa syenyu syonthe mamũkitĩe, ala mwaneenaa ĩũlũ wamo mũyasya, ‘Tũnenge mũsumbĩ na atongoi?’

11Nĩthatĩte nĩnamũnengie mũsumbĩ, na navetanga mũsumbĩ ũsu nĩ na ũthatu mwingĩ.

12“Ĩvĩtyo ya Evalaimu nĩyiĩtwe vandũ; naĩ syake niandĩkĩtwe vandũ.

13Ĩsilaeli e na mwanya mũseo wa kwĩthĩwa thayũ, ĩndĩ nũkũũlea nũndũ wa ũtumanu wake, ailyĩ ta kana kavikĩĩsye kũsyawa, ĩndĩ kailea kuma ĩvunĩ.

14Nĩkũlya, nyie ngamovosya kuma kĩkw'ũnĩ? Nyie ngamatangĩĩa kuma kĩkw'ũnĩ? Kĩkw'ũ, maĩva mothĩny'o maku? We nthĩ ya ala akw'ũ ũĩva wanangĩko waku? Ndiĩw'ĩa andũ aa tei ĩngĩ.

15“O na eethĩwa na ũsyao mwingĩ katĩ wa ana-a-ĩthe, kĩseve kĩvyũ kuma wumĩlonĩ wa syũa kĩkooka, kĩuutani kya Mwĩai Ngai kyũke kuma weũnĩ. Ithima syake ikang'ala, na nthongo syake ikang'ala. Kĩseve kĩu kĩkoosa syĩndũ syonthe sya vata kuma vala wiaa ũthwii wake.

16Andũ ma Samalia no nginya maĩvĩe ĩvĩtyo yoo, nũndũ nĩmang'endeie nyie Ngai woo. Andũ asu makooaĩwa kaũnĩ; tũũkenge twoo tũkang'atanganw'a nthĩ tũtilĩkange, na mavu ma aka moo ala aito makataũwa.”

← Chapter 12 Jump to: Chapter 14 →