2 Chronicles 1

Kikuyu Bible (IBUKU RĨRĨA ITHERU RĨA NGAI)

Jump to: Chapter 2 →

1NA RĨRĨ, Suleimani, mũrũ wa Daudi, agĩkĩgĩa na hinya ũthamaki-inĩ wake, nake Jehova, Ngai wake, agĩikara hamwe nake, o na akĩmũnenehia mũno mũno.

2Nake Suleimani agĩkĩaria na andũ othe a Isiraeli o arĩa maarĩ anene a athigari ngiri o ngiri, o na igana o igana, o na aciri, o na mũndũ o wothe ũrĩa warĩ mũnene kũu Isiraeli guothe, o arĩa maarĩ ciongo cia nyũmba cia maithe ma andũ a Isiraeli.

3Na gũgĩtuĩka atĩrĩ, atĩ Suleimani, me na kĩrĩndĩ kĩu gĩothe, magĩthiĩ itĩri-inĩ rĩa kũndũ kũrĩa gũtũũgĩru kũu Gibeoni; nĩ ũndũ kũu nĩkuo hema-ya-gũtũnganwo ya Ngai yarĩ, o ĩrĩa Musa, ndungata ya Jehova, aathondekete werũ-inĩ.

4No ithandũkũ rĩa Ngai Daudi nĩaarĩambatĩtie akarĩruta Kiriathu-jearimu akarĩiga harĩa aarĩthondekeire; nĩ gũkorũo nĩaarĩambĩire hema kũu Jerusalemu.

5O nakĩo kĩgongona gĩa gĩcango kĩrĩa Bezaleli wa Uri, mũrũ wa Huri, aathondekete, kĩarĩ o kũu mbere ya gĩikaro kĩa Jehova, nake Suleimani me na kĩrĩndĩ kĩu magĩthiĩ hau kĩarĩ.

6Nake Suleimini agĩkĩambata agĩthiĩ kĩgongona-inĩ kĩu gĩa gĩcango o hau mbere ya Jehova, o kĩu kĩarĩ hema-inĩ-ya-gũtũnganwo, na akĩrutĩra igũrũ rĩakĩo nyamũ ngiri ĩmwe cia mahaki ma njino.

7Na rĩrĩ, ũtukũ o ro ũcio Ngai akiumĩrĩra Suleimani, akĩmwĩra atĩrĩ, Hoya kĩrĩa ngũkũhe.

8Nake Suleimani agĩkĩĩra Ngai atĩrĩ, Wee nĩwekire baba, Daudi, maũndũ manene ma tha, na niĩ ũkĩndua mũthamaki wa gũcoka ithenya rĩake.

9Na rĩu, wee Jehova Ngai, tũma atĩ kĩĩranĩro gĩaku kĩrĩa werĩire baba, Daudi, gĩikare kĩrũmĩte; nĩ ũndũ nĩũnduĩte mũthamaki ’thamakĩre andũ maingĩhĩte o ta rũkũngũ rũa thĩ.

10Rĩu ndagĩgũthaitha ũ’he ũũgĩ, o na ũhoro wa kũmenya maũndũ, nĩ getha ’menye mĩthiĩre ĩrĩa njagĩrĩirũo nĩ gũthiaga nayo ndĩ hamwe na andũ aya aku; nĩ ũndũ-rĩ, andũ aya aku aingĩ ũũ-rĩ, nũ ũngĩkĩhota kũmacirĩra?

11Nake Ngai agĩkĩĩra Suleimani atĩrĩ, Kuona atĩ nĩ ũndũ ũcio warĩ ngoro-inĩ yaku, na ndwahoire ũtonga, kana kũgĩa indo nyingĩ, o na kana gĩtĩo, kana atĩ mĩoyo ya thũ ciaku ĩninwo, o na kana ũkĩĩhoera atĩ ũtũũre muoyo matukũ maingĩ, no nĩ ũũgĩ wehoeire, o na ũmenyi wega maũndũ, nĩ getha ũhotage gũcirĩra andũ akwa arĩa ndagũtuire mũthamaki wao-rĩ,

12nĩndetĩkĩra gũkũhe ũũgĩ, o na ũmenyi wega maũndũ; o na makĩria nĩngũkũhe ũtonga, o na indo nyingĩ, o na gĩtĩo, gũkĩra mũthamaki o na ũrĩkũ wa arĩa maarĩ mbere yaku, o na ningĩ thutha waku gũtikagĩa ũngĩ o na ũrĩkũ wĩ na maũndũ ta macio.

13Thutha wa ũguo Suleimani agĩkiuma itĩri-inĩ rĩu rĩa handũ hatũũgĩru kũu Gibeoni, hau hema-inĩ-ya-gũtũnganwo, agĩcoka Jerusalemu; nake agĩgĩthamakĩra Isiraeli.

14Nake Suleimani akĩĩũnganithĩria ngari cia ita, o na andũ arĩa mathiaga mahaicĩte mbarathi; akĩgĩa na ngari ngiri ĩmwe na magana mana cia ita, o na andũ ngiri ikũmi na igĩrĩ arĩa mathiaga mahaicĩte mbarathi, akĩmaiga matũũra-inĩ marĩa maaigagwo ngari icio, o na hamwe na mũthamaki kũu Jerusalemu.

15Nake mũthamaki ũcio agĩkĩingĩhia betha na thahabu, ikonagwo ihaana o ta irĩ mahiga kũu Jerusalemu, nayo mĩtarakwa akĩmĩingĩhia o ta mĩborothandi ĩrĩa ĩiyũrĩte bũrũri ũrĩa mũgũu.

16Nacio mbarathi iria Suleimani aarĩ nacio ciarutĩtwo Misiri, nao andũ arĩa maarutagĩra mũthamaki wĩra wa wonjoria, nĩo maacithogoraga irĩ ndũru nene, o rũũru thogora waruo.

17Nacio ngari cia ita iria maambatagia marutĩte Misiri, ĩmwe yarutagĩrũo cekeri magana matandatũ ma betha, nayo mbarathi ĩmwe ĩkarutĩrũo cekeri igana rĩa mĩrongo ĩtano; naguo ũguo nĩguo athamaki othe a Ahiti, o na athamaki a Suriata, maacithogoraga matwarĩirũo nĩ andũ acio a Suleimani a wonjoria.

Jump to: Chapter 2 →