2 Chronicles 5

Kikuyu Bible (IBUKU RĨRĨA ITHERU RĨA NGAI)

← Chapter 4 Jump to: Chapter 6 →

1Ũguo nĩguo wĩra wothe ũrĩa Suleimani aarutithirie ũkoniĩ nyũmba ya Jehova warĩkire. Nake Suleimani agĩtonyia indo iria Daudi, ithe, aamũrĩire Jehova kũu nyũmba thĩinĩ; nacio nĩ betha, na thahabu, o na indo iria ingĩ ciothe, nake agĩciiga kũndũ kũrĩa kwaigagwo mũthithũ wa indo cia bata kũu nyũmba ya Ngai.

2Hĩndĩ ĩo Suleimani agĩkĩũnganithia athuri a Isiraeli moke kũu Jerusalemu, hamwe na anene othe a mĩhĩrĩga, nao nĩo atongoria a nyũmba cia maithe ma ciana cia Isiraeli, nĩguo makaambatie ithandũkũ rĩa kĩrĩkanĩro kĩa Jehova, marĩrute itũũra rĩa Daudi, narĩo nĩrĩo Zayuni.

3Nao andũ acio othe a Isiraeli magĩgĩtũngana he mũthamaki gĩathĩ-inĩ mweri wa mũgwanja.

4Athuri othe a Isiraeli magĩgĩthiĩ kuo, nao Alawii makĩoya ithandũkũ rĩu.

5Nao makĩambatia ithandũkũ rĩu, o na hema-ya-gũtũnganwo, o na indo ciothe iria nyamũre ciarĩ kũu hema-inĩ ĩo thĩinĩ; indo icio-rĩ, nĩcio athĩnjĩri-Ngai arĩa Alawii maambatirie.

6Nake mũthamaki Suleimani, o na kĩrĩndĩ gĩothe gĩa Isiraeli kĩrĩa kĩonganĩte harĩ we, maarĩ mbere ya ithandũkũ rĩu rĩa kĩrĩkanĩro, makĩruta magongona ma mbũri o na ndegwa itangĩheanĩka ũhoro wacio, o na kana itarĩke, nĩ ũndũ wa ũrĩa ciingĩhĩte.

7Nao athĩnjĩri-Ngai magĩgĩtonyia ithandũkũ rĩu rĩa kĩrĩkanĩro kĩa Jehova handũ harĩo, o handũ hau hatheru mũno ha nyũmba ĩo ya Ngai, makĩrĩiga o handũ hau hatheru mũno haamũrĩtwo, naguo ũguo nĩ ta kuuga hau mũhuro wa mathagu ma makerubi.

8Nĩ ũndũ makerubi macio maatambũrũkĩtie mathagu mamo igũrũ rĩa hau haaigĩtwo ithandũkũ rĩu, namo makerubi macio makahumba ithandũkũ rĩu na mĩtĩ yarĩo ĩrĩa mĩraya.

9Nayo mĩtĩ ĩo mĩraya nĩyaraihĩte mũno o nginya mĩthia yayo ĩkoneka nĩ mũndũ e nyumĩrĩra-inĩ ya hau ithandũkũ rĩa kĩrĩkanĩro rĩrĩ, mbere ya handũ harĩa hatheru mũno; no ndĩonagwo nĩ mũndũ wĩ nja; naho hau noho ĩrĩ o na ũmũthĩ.

10Narĩo ithandũkũ-inĩ rĩu thĩinĩ-rĩ, gũtiarĩ kĩndũ kĩngĩ tiga o ihengere icio igĩrĩ cia mahiga iria Musa ekĩrire kuo arĩ Horebu, hĩndĩ ĩrĩa Jehova aarĩkanĩire kĩrĩkanĩro na ciana cia Isiraeli, o ihinda rĩrĩa cioimaga Misiri.

11Na gũgĩkinya atĩrĩ, atĩ hĩndĩ ĩrĩa athĩnjĩri-Ngai maakorirũo moimĩte handũ hau, (nĩ gũkorũo athĩnjĩri-Ngai arĩa othe maarĩ ho nĩmeamũrĩte magetheria, maambĩte gũtiga wĩra wa ituanĩra;

12o nao Alawii arĩa aini nyĩmbo othe maarĩ ho, naguo ũguo nĩ ta kuuga Asafu, na Hemani, na Jeduthuni, o na ariũ ao, o na ariũ a ithe wao, mehumbĩte nguo cia gatani ĩrĩa njega mũno, na me na thani iria ihũrithanagio ikagamba, o na inanda cia kĩnubi, o na inanda nene cia mũgeto, na maarũgamĩte mũthia-inĩ wa kĩgongona mwena wa irathĩro wakĩo, na hamwe nao hakagĩa athĩnjĩri-Ngai, igana rĩa mĩrongo ĩĩrĩ maahuhaga tũrumbeta,)

13gũgĩgĩkinya atĩrĩ, atĩ ahuhi tũrumbeta o na aini maaiguithania mĩgambo yao o ta mũndũ ũmwe, makĩina na mũgambo wa kũiguwo ta arĩ o ũmwe makĩgooca Jehova, o na makĩmũgatha; o na hĩndĩ ĩrĩa maanagĩrĩra na mĩgambo yao, hamwe na tũrumbeta tũkĩhuhwo, o na thani icio ikĩhũrithanio ikagamba, o na inanda ikĩhũrũo, o na makĩgooca Jehova, makoigaga ũũ: Goocai Jehova nĩ ũndũ nĩ mwega, nĩ gũkorũo tha ciake itũũraga tene na tene-rĩ, hĩndĩ ĩo nyũmba ĩo, naguo ũguo nĩ ta kuuga nyũmba ya Jehova, ĩkĩiyũrũo nĩ itu,

14o nginya athĩnjĩri-Ngai makĩremwo nĩ kũrũgama marute wĩra nĩ ũndũ wa itu rĩu; nĩ gũkorũo riri wa Jehova nĩwaiyũire nyũmba ĩo ya Ngai.

← Chapter 4 Jump to: Chapter 6 →