2 Chronicles 3

Kikuyu Bible (IBUKU RĨRĨA ITHERU RĨA NGAI)

← Chapter 2 Jump to: Chapter 4 →

1Na rĩrĩ, hĩndĩ ĩo Suleimani agĩkĩambĩrĩria gwaka nyũmba ya Jehova o kũu Jerusalemu, kĩrĩma-inĩ kĩa Moria, kũrĩa Jehova oimĩrĩire ithe, Daudi, kĩhuhĩro-inĩ kĩa ngano kĩa Orinani, Mũjebusi, o handũ harĩa Daudi aatuire atĩ nĩho ĩgaakwo.

2Nake aambĩrĩirie kũmĩaka mũthenya wa ĩĩrĩ wa mweri wa kerĩ, mwaka wa ĩna ĩrĩa aakorirũo athamakĩte.

3Na rĩrĩ, gĩtina kĩrĩa Suleimani aathimithirie nĩ ũndũ wa mwakĩre wa nyũmba ĩo ya Ngai gĩatariĩ ũũ: ũraihu wakĩo warĩ mĩkono mĩrongo ĩtandatũ, o ta ũrĩa mũthimĩre wa tene watariĩ; naguo wariĩ wayo warĩ mĩkono mĩrongo ĩĩrĩ.

4Nakĩo gĩthaku kĩrĩa kĩarĩ mbere ya nyũmba ĩo-rĩ, ũraihu wakĩo waiganaine na wariĩ wayo, naguo warĩ wa mĩkono mĩrongo ĩĩrĩ, o naguo ũraihu wa na igũrũ warĩ wa mĩkono igana rĩa mĩrongo ĩĩrĩ; nake Suleimani agĩkĩhumbithia na thĩinĩ guothe na thahabu ĩrĩa therie mũno.

5Nake akĩarithia mbaũ cia mĩthengera kũndũ guothe igũrũ rĩa nyũmba ĩrĩa nene; agĩcoka agĩcihumbithia na thahabu ĩrĩa therie mũno, na igũrũ rĩacio agĩcikururithia mĩhianano ya mĩkĩndũ, o na ya irengeri.

6Agĩkĩgemithia nyũmba ĩo na mahiga ma goro nĩguo ĩthakare; nayo thahabu ĩo yarĩ thahabu ya Paravaimu.

7Nayo nyũmba ĩo akĩmĩhumbithia igũrũ guothe na thahabu, naguo ũguo nĩ ta kuuga mĩratho yayo, na hingĩro cia mĩromo yayo, na thingo ciayo, na mĩrango yayo; nakuo thingo-inĩ agĩgũkururithia mĩhianano ya makerubi.

8Agĩcoka agĩthondekithia kanyũmba karĩa gatheru mũno; naguo ũraihu wako ũkĩiganana na wariĩ wako, naguo warĩ wa mĩkono mĩrongo ĩĩrĩ, o naguo wariĩ wayo ũgĩtuĩka mĩkono mĩrongo ĩĩrĩ; nako kanyũmba kau agĩkahumbithia igũrũ guothe na thahabu ĩrĩa therie mũno, nayo ĩgĩgĩkinyia taranda magana matandatũ ĩgĩthimwo.

9Naguo ũritũ wa mĩcumarĩ warĩ cekeri mĩrongo ĩtano cia thahabu. Natuo tũnyũmba twa igũrũ agĩtũhumbithia kũndũ guothe na thahabu.

10Nakuo kũu kanyũmba kau gatheru mũno thĩinĩ, agĩgũicũhithĩria mĩhianano ĩĩrĩ ya makerubi, nayo ĩkĩhumbwo igũrũ guothe na thahabu.

11Namo mathagu ma makerubi macio maarĩ mĩkono mĩrongo ĩĩrĩ magĩthimwo kũraiha makigiĩ; narĩo ithagu rĩa ikerubi rĩmwe rĩarĩ mĩkono ĩtano, narĩo rĩakinyĩte o rũthingo-inĩ rũa nyũmba ĩo, o narĩo ithagu rĩrĩa rĩngĩ rĩarĩ mĩkono ĩtano, na rĩkahutania na ithagu rĩa ikerubi rĩu rĩngĩ.

12O narĩo ithagu rĩa ikerubi rĩu rĩngĩ rĩarĩ mĩkono ĩtano, narĩo rĩakinyĩte rũthingo-inĩ rũa nyũmba; o narĩo ithagu rĩrĩa rĩngĩ rĩarĩ mĩkono ĩtano o ro ũguo, na nĩ kũhutania rĩahutanĩtie na ithagu rĩa ikerubi rĩrĩa rĩngĩ.

13Nakuo gũtambũrũka kwa mathagu ma makerubi macio kwarĩ mĩkono mĩrongo ĩĩrĩ namo merũgamĩtie na magũrũ mamo; namo mothiũ mamo maarorete kũu nyũmba thĩinĩ.

14Ningĩ agĩgĩthondekithia gĩtama gĩa kũhakania na ndigi cia rangi wa bururu, na wa zambarau, na wa gakarakũ, o na gatani ĩrĩa njega, agĩcoka agĩgĩtumĩrĩrithia mĩhianano ya makerubi.

15Ningĩ mwena wa na mbere wa nyũmba ĩo agĩthondekithĩria itugĩ igĩrĩ cia mĩkono mĩrongo ĩtatũ na ĩtano kũraiha na igũrũ; nacio ciongo iria irĩ mũnduru cia itugĩ-inĩ icio igũrũ, o kĩmwe kĩmwe, ciarĩ cia mĩkono ĩtano.

16Ningĩ agĩthondekithĩria irengeri handũ harĩa hatheru mũno, agĩciĩkĩrithia igũrũ rĩa itugĩ icio; agĩcoka agĩthondekithia mĩhianano ya makomamanga igana, akĩmĩĩkĩrithia irengeri-inĩ icio.

17Nacio itugĩ icio agĩcihanda hau mbere ya hekarũ, kĩmwe mwena wa ũrĩo, na kĩrĩa kĩngĩ mwena wa ũmotho nakĩo kĩa mwena wa ũrĩo, agĩgĩĩta Jakini, o nakĩo kĩa mwena wa ũmotho agĩgĩĩta Boazu.

← Chapter 2 Jump to: Chapter 4 →