2 Chronicles 31

Kikuyu Bible (IBUKU RĨRĨA ITHERU RĨA NGAI)

← Chapter 30 Jump to: Chapter 32 →

1Na rĩrĩ, maũndũ macio mothe maathira, Aisiraeli othe arĩa maarĩ hau magĩthiĩ matũũra-inĩ ma Juda, makiunanga itugĩ cia kũhoyũo, na magĩtemenga Maashera, o na magĩtharia matĩri ma kũndũ gũtũũgĩru, o na igongona, kũu Juda guothe na Benjamini, o na Efiraimu na Manase, o nginya magĩciananga ciothe biũ. Thutha wa ũguo ciana cia Isiraeli ciothe igĩkĩhũndũka, o mũndũ agĩcoka kũndũ kũrĩa egwatĩire gũgĩtuĩka gwake, o itũũra-inĩ rĩake.

2Nake Hezekia agĩtua atĩ gũcoke kũgĩa matuanĩra ma athĩnjĩri-Ngai o na Alawii o ta ũrĩa matuanĩra mao ma mawĩra maatariĩ, mũndũ o mũndũ wa athĩnjĩri-Ngai o na Alawii agwate wĩra wake ituanĩra-inĩ rĩake, wa kũruta mahaki ma njino, na magongona ma ũiguano, o na gũtungatĩra Jehova, na kũmũcokeria ngatho, na kũmũgoocagĩra ihingo-inĩ cia kĩraaro gĩake.

3O na ningĩ gĩcunjĩ kĩrĩa kĩaagĩrĩirũo nĩ kũrutwo nĩ mũthamaki, kiumĩte indo-inĩ ciake we mwene gĩkoniĩ mahaki ma njino, namo nĩmo magongona marĩa maarutagwo rũcinĩ na hwaĩ-inĩ, o na mahaki ma njino marĩa maarutagwo thabatũ ciothe, o na karũgamo-inĩ ka mweri hĩndĩ ciothe, o na ciathĩ-inĩ iria ciaigĩtwo, o ta ũrĩa kwandĩkĩtwo watho-inĩ wa Jehova, gĩcunjĩ kĩu gĩothe-rĩ, agĩathana akiuga kĩrutagwo o ta ũrĩa kwagĩrĩire.

4O na ningĩ agĩatha andũ arĩa maatũũraga Jerusalemu atĩ marutage gĩcunjĩ kĩa indo ciao gĩa kũheo athĩnjĩri-Ngai o na Alawii, nĩ getha andũ acio matuĩke atabarĩri a watho wa Jehova kĩũmbe.

5Na rĩrĩ, hĩndĩ ĩrĩa watho ũcio wathanĩtwo wamenyekire nĩ andũ othe-rĩ, ciana cia Isiraeli ikĩruta narua na ũtana maciaro ma mbere ma ngano, hamwe na ndibei, na maguta, na ũũkĩ, na uumithio wothe wa irio cia mĩgũnda; o na gĩcunjĩ gĩa ikũmi kĩa indo ciao ciothe magĩkĩruta na ũtana.

6Na rĩrĩ, ciana cia Isiraeli o na Juda, iria ciatũũraga matũũra ma Juda, o nacio igĩtwara gĩcunjĩ gĩacio gĩa ikũmi kĩa ndegwa ciacio o na kĩa mbũri; ningĩ gĩcunjĩ gĩa ikũmi kĩa indo ciacio iria ciaamũrĩtwo cia kũrutĩrũo Jehova Ngai wacio, igĩcitwara, igĩciiga irũndo.

7Naguo mweri wa ĩtatũ nĩguo ciaitĩkire kũrũnda indo icio irũndo, nacio igĩkĩrĩkia wĩra ũcio mweri wa mũgwanja.

8Na rĩrĩ, hĩndĩ ĩrĩa Hezekia, o na anene, maathiire makĩona irũndo icio, makĩgooca Jehova, o na makĩrathima andũ ake Isiraeli.

9Hĩndĩ ĩo Hezekia akĩhoya athĩnjĩri-Ngai o na Alawii ũhoro wa irũndo icio.

10Nake Azaria, mũthĩnjĩri-Ngai ũrĩa mũnene, wa nyũmba ya Zadoku, akĩmũcokeria akiuga atĩrĩ, Gwata hĩndĩ ĩrĩa andũ maambĩrĩirie kũrehe indo cia igongona gũkũ nyũmba ya Jehova-rĩ, nĩtũrĩĩte na tũkahũna, na tũgatigaria nyingĩ mũno, nĩ gũkorũo Jehova nĩarathimĩte andũ ake; nacio indo iria itigarĩte nĩcio ici tũhaĩte nyingĩ mũno haha.

11Hĩndĩ ĩo Hezekia agĩgĩathana akiuga atĩ tũnyũmba tũmwe twa nyũmba ya Jehova tũthondekwo; nao andũ magĩgĩtũthondeka o ta ũguo.

12Nao magĩgĩtonyia indo icio ciarutĩtwo, o na gĩcunjĩ kĩu gĩa ikũmi, hamwe na indo iria ciamũrĩirũo Jehova, o ta ũrĩa mehoketwo meke; nake mũnene wa gũcirora aarĩ Konania, Mũlawii, na wa kerĩ aarĩ Shimei, mũrũ wa ithe.

13Nao Jehieli, na Azazia, na Nahathu, na Asaheli, na Jerimothu, na Jozabadu, na Elieli, na Isimakia, na Mahathu, na Benaia, nĩo maarĩ anyabara me watho-inĩ wa Konania, na Shimei mũrũ wa ithe, nĩ ũndũ wa ũrĩa gwatuirũo ũguo nĩ Hezekia, mũthamaki, o na Azaria, mwathi wa nyũmba ya Jehova.

14Nake Kore wa Imuna, Mũlawii, ũrĩa waikaragia mũrango wa mwena wa irathĩro, nĩwe waroraga indo iria ciarutagĩrũo Ngai na ũndũ wa kwĩendera, nĩguo agayanagie indo iria irutĩirũo Jehova, o na iria nyamũre mũno.

15Na rĩrĩ, kũu matũũra-inĩ ma athĩnjĩri-Ngai aateithagio nĩ Edeni, na Miniamini, na Jeshua, na Shemaia, na Amaria, na Shekania, magakĩgayania ariũ a ithe wao indo na kĩhooto, arĩa anene na arĩa anyinyi, o ta ũrĩa matuanĩra ma wĩra wao maatariĩ;

16thengia arũme a thiritũ ya arĩa maakinyĩtie mĩaka ĩtatũ o na magakĩria hau magĩtarũo ta ũrĩa njiaro ciao ciatariĩ, arĩa maakoragwo mũndũ o mũndũ atonyete nyũmba ya Jehova arute wĩra ũrĩa aheetwo, o ta ũrĩa wĩra wake watariĩ matuanĩra-inĩ mao, na agakĩheerũo rũgai rũake rũa mũthenya o mũthenya kũu.

17Nao athĩnjĩri-Ngai maatarirũo o ta ũrĩa njiaro ciao ciatariĩ, o na ta ũrĩa nyũmba cia maithe mao ciatariĩ, hamwe na Alawii arĩa maakinyĩtie mĩaka mĩrongo ĩĩrĩ na magakĩria hau, o ta ũrĩa matuanĩra ma wĩra wao maatariĩ.

18Nao maatarirũo o ta ũrĩa njiaro cia ciana ciao ciothe, o na aka ao, o na ariũ ao, o na airĩtu ao, ciatariĩ kĩrĩndĩ-inĩ gĩothe nĩguo monage rũgai rũao, nĩ gũkorũo wĩra-inĩ ũcio wao wa andũ ehokeku nĩmeamũraga magetheria nĩ ũndũ wa wĩra ũcio mũtheru mũno;

19o na ningĩ ha ũhoro wa ariũ a Haruni arĩa athĩnjĩri-Ngai, arĩa maarĩ ithaka-inĩ ciao cia ũrĩithio cia matũũra-inĩ mao, itũũra o itũũra, nĩkwarĩ andũ amwe arĩa maagwetetwo marĩĩtwa mao a kũruta wĩra ũcio kĩũmbe, nĩguo magayagĩre arũme othe thĩinĩ wa athĩnjĩri-Ngai indo ciao, o na arĩa othe maatarirũo thĩinĩ wa Alawii o ta ũrĩa njiaro ciao ciatariĩ.

20Ũguo nĩguo Hezekia ekire kũu Juda guothe, agĩgĩĩka maũndũ marĩa monagwo marĩ mega, na merekereire, na ma kwĩhokwo, nĩ Jehova Ngai wake.

21Na mawĩra-inĩ mothe marĩa aaitĩkire kũruta makonainie na wĩra wa nyũmba ya Ngai, o na ũhoro-inĩ wa watho, o na wa kũrũmĩrĩra maathani nĩguo arongorie Ngai wake, maũndũ macio mothe-rĩ, aamekire na ngoro yake yothe; nake agĩkĩgaacĩra.

← Chapter 30 Jump to: Chapter 32 →