2 Chronicles 21

Kikuyu Bible (IBUKU RĨRĨA ITHERU RĨA NGAI)

← Chapter 20 Jump to: Chapter 22 →

1Nake Jehoshafatu agĩgĩkoma hamwe na maithe, agĩthikwo hamwe na maithe o kũu itũũra rĩa Daudi; nake Jehoramu, mũrũwe, agĩthamaka ithenya rĩake.

2Nake agĩkorũo aarĩ na ariũ a ithe, o ihĩĩ cia Jehoshafatu, nacio nĩ Azaria, na Jehieli, na Zekaria, na Azaria, na Mikaeli, na Shefatia; icio ciothe ciarĩ ihĩĩ cia Jehoshafatu, mũthamaki wa Isiraeli.

3Nake ithe wacio nĩaaciheete iheo cia bata, cia betha, na thahabu, o na indo cia goro, hamwe na matũũra mairigĩtwo o kũu Juda; no rĩrĩ, ũthamaki aaũheire Jehoramu, nĩ gũkorũo nĩwe warĩ wa irigithathi.

4Na rĩrĩ, hĩndĩ ĩrĩa Jehoramu aarĩkirie kwĩhanda ũthamaki-inĩ wa ithe, o na akĩĩĩkĩra hinya-rĩ, akĩũraga ariũ a ithe othe na rũhiũ rũa njora, o na andũ amwe angĩ arĩa maarĩ anene a Isiraeli.

5Nake Jehoramu aaninĩte mĩaka mĩrongo ĩtatũ na ĩĩrĩ hĩndĩ ĩrĩa aambĩrĩirie gũthamaka; agĩgĩthamaka mĩaka ĩnana kũu Jerusalemu.

6Nake agĩthiĩ na mĩthiĩre ta ĩrĩa ya athamaki a Isiraeli, o ta ũrĩa nyũmba ya Ahabu yekaga; nĩ gũkorũo aahikĩtie mwarĩ wa Ahabu; nake agĩgĩĩka maũndũ marĩa monagwo marĩ moru nĩ Jehova.

7No rĩrĩ, Jehova ndaigana kũnina nyũmba ya Daudi, nĩ ũndũ wa kĩrĩkanĩro kĩrĩa aarĩkanĩrĩte na Daudi, o na ũndũ wa ũrĩa eranĩire atĩ nĩegũtũũra amũheete tawa we mwene, o na ciana ciake, hingo ciothe.

8Na rĩrĩ, ihinda rĩake-rĩ, nĩrĩo Aedomu mokĩrĩire Ajuda makĩmarema matigacoke gũthamakĩrũo nĩo, nao magĩgĩtua mũndũ ũngĩ mũthamaki wao.

9Hĩndĩ ĩo Jehoramu akĩringĩrĩra Aedomu me na anene ake a ita o na ngari ciake ciothe cia ita; nake akĩarahũka ũtukũ, akĩhũra Aedomu arĩa maamũrigicĩirie, o na anene a ngari ciao cia ita.

10Ũguo nĩguo Aedomu mokĩrĩire athamaki a Juda, makĩmarema o na ũmũthĩ; ningĩ matukũ o ro macio, Alibina o nao magĩũkĩrĩra Jehoramu, makĩmũrema. Kwonekire ũguo nĩ ũndũ nĩaatiganĩte na Jehova, Ngai wa maithe.

11O na ningĩ nĩaakithirie matĩri ma kũndũ gũtũũgĩru irĩma-inĩ cia Juda, nake agĩgĩtũma andũ arĩa maatũũraga Jerusalemu merirĩrie ngai cia mathara; nao Ajuda akĩmatongoria na njĩra njũru.

12Na atĩrĩrĩ, hagĩũka marũa harĩ we moimĩte harĩ Elija ũrĩa mũnabii, makoiga atĩrĩ, Jehova, Ngai wa Daudi thoguo, oiga uũ: Atĩrĩrĩ, tondũ ndũnathiĩ na mĩthiĩre ĩrĩa thoguo Jehoshafatu aathiaga nayo, o na kana mĩthiĩre ya Aaa, mũthamaki wa Juda;

13no nĩ gũthiĩ ũthiĩte na mĩthiĩre ya athamaki a Isiraeli, na nĩũtũmĩte Juda, o na andũ arĩa matũũraga Jerusalemu, merirĩrie ngai cia mathara, o ta ũrĩa nyũmba ya Ahabu yekaga, na ningĩ nĩũũragĩte ariũ a thoguo, o acio a nyũmba ya thoguo kĩũmbe, arĩa maarĩ ega gũgũkĩra-rĩ,

14Jehova nĩekũhũra andũ aku na ihũra inene mũno, o na ciana ciaku, o na aka aku, o na indo ciaku ciothe;

15nawe nĩũkũrũara mũrimũ mũnene mũno nda, o nginya hĩndĩ ĩrĩa mara ma nda yaku magagũthira nĩ ũndũ wa kũrũara hĩndĩ ciothe mũthenya o mũthenya.

16Nake Jehova akĩarahũra ngoro cia Afilisiti ciũkĩrĩre Jehoramu, o na cia Aarabu, arĩa marĩ ndere-inĩ cia Akushi;

17nao magĩũkĩrĩra Juda, magĩtonya kuo na hinya, magĩgĩtaha indo ciothe iria cionekire nyũmba ya mũthamaki thĩinĩ, o na ariũ ake, o na aka ake, o nginya hakĩaga kuoneka mũrũwe o na ũmwe atigarĩirio, tiga o Jehoahazu, ũrĩa warĩ mũnyinyi wa arĩa angĩ othe thĩinĩ wa ariũ ake.

18Na thutha wa maũndũ macio mothe, Jehova akĩmũhũra na mũrimũ wa nda ũrĩa ũtangĩhoneka.

19Na gũgĩkinya atĩrĩ, atĩ matukũ maathiathia, mĩaka ĩĩrĩ yathira, mara ma nda yake magĩkĩmũthira nĩ ũndũ wa mũrimũ ũcio aarũarĩte, nake agĩkĩũragwo nĩ mĩrimũ mĩũru mũno. Nao andũ ake matiigana kũmũthondekithĩria icua rĩa gũcinwo ta ũrĩa maacinithĩirie maithe.

20Nake aaninĩte mĩaka mĩrongo ĩtatũ na ĩĩrĩ hĩndĩ ĩrĩa aambĩrĩirie gũthamaka, agĩthamaka kũu Jerusalemu mĩaka ĩnana, nake agĩĩthengera o ro ũguo hatarĩ mũndũ wĩ na mĩĩrirũa nake; nao andũ makĩmũthika itũũra rĩa Daudi, no ti mbĩrĩra-inĩ cia athamaki.

← Chapter 20 Jump to: Chapter 22 →