2 Samuel 22 — Kikuyu Bible (IBUKU RĨRĨA ITHERU RĨA NGAI)

1Nake Daudi agĩkĩarĩria Jehova na ciugo cia rũĩmbo rũrũ hĩndĩ ĩrĩa Jehova aamũhonokirie akĩmũruta moko-inĩ ma thũ ciake ciothe, o na guoko-inĩ gwa Saulu;

2agĩkiuga atĩrĩ, Jehova-rĩ, nĩwe rũaro rũakwa rũa ihiga, nĩ kĩhingo gĩakwa kĩa hinya, o na nowe mũ’hatũri; nĩ wakwa hatarĩ nganja;

3Nĩwe Mũrungu, o we ndũmba yakwa ya ihiga, ĩrĩa ndahagĩra, Ningĩ ngo yakwa, o naruo rũhĩa rũrĩa rũ’honokagia, o na nowe rĩangĩro rĩakwa rĩakĩtwo handũ haraihu na igũrũ, o na ũũrĩro wakwa; Wee mũhonokia wakwa, nĩwe ũ’honokagia, ndige kũguthũkĩrũo nĩ andũ na hinya.

4Ngayagĩra Jehova, o ũcio wagĩrĩire kũgoocagwo; Ngakĩhonokio harĩ thũ ciakwa.

5Ndihũ cia gĩkuũ nĩciahĩtĩrĩirie, Nayo mĩiyũro ya wanangi ĩkĩndua nda;

6Mĩgeto ya Kwa-ngoma nĩyo yeĩ’thiorereirie, Ngagwatwo nĩ mĩtego ya gĩkuũ.

7Ndĩ na mĩnyamaro ĩo, ngĩitĩka gũkaĩra Jehova; Ti-itherũ ndarĩrĩire Ngai wakwa; Mũgambo wakwa we nĩaakĩũiguire e thĩinĩ wa hekarũ yake, Kĩrĩro gĩakwa gĩkĩmũkinyĩra o matũ-inĩ make.

8Hĩndĩ ĩo thĩ ĩgĩkĩrika kwerera o ĩgĩtetemaga, O nacio itina cia matu-inĩ ikĩenyenya O ikĩereraga, nĩ tondũ we nĩaakanirũo nĩ marakara.

9Hagĩkĩambata ndogo yumĩte maniũrũ-inĩ make, Naguo mwaki ũkiuma kanua gake, ũkĩninana, O nginya makara makĩya kũrĩrĩmbũkio nĩguo.

10Agĩcuhĩrĩria matu, agĩikũrũka thĩ, Na makinya-inĩ make no nduma ndumanu haarĩ.

11Nake agĩgĩthiĩ akuuĩtwo nĩ kerubi, e rĩera-inĩ; Ĩĩ, ti-itherũ onirũo akuuĩtwo nĩ mathagu ma rũhuho;

12Nayo nduma aamĩtuire ta hema ĩmũthiũrũrũkĩirie na mĩena yothe, O ya maĩ macokanĩrĩire hamwe, o mo matu marĩa mathimbu mũno ma igũrũ.

13Tondũ wa ũkengi ũrĩa warĩ harĩ we, Makara ma mwaki makĩya kũrĩrĩmbũka.

14We Jehova agĩkĩrurumia marurumĩ e kũu matu-inĩ, Nake Ũrĩa-wĩ-igũrũ-mũno akĩruta mũgambo wake.

15Aaikanirie mĩguĩ, akĩhurunja thũ, Agĩcirehithĩrie rũheni, agĩcinyaagia.

16Hĩndĩ ĩo ndĩra cia iria ĩkĩonekana, Nacio itina cia thĩ igĩkĩhumbũrio, Nĩ ũndũ wa ũrĩa Jehova aarũithanĩtie, O na ũndũ wa itiiha rĩa mĩrukĩ ya maniũrũ make.

17Aatambũrũkirie guoko arĩ o igũrũ, akĩ’nyita, Akĩngucia, akĩnduta maĩ-inĩ macio mang’etu.

18Nĩaa’honokirie akĩndeithũra harĩ thũ yakwa ĩrĩa yarĩ na hinya, Akĩnduta kũrĩ acio a’thũũri, nĩ gũkorũo maarĩ nding’ũri kũngĩra.

19Maa’harũkĩire mũthenya ũrĩa ndarĩ na mũtino, No Jehova nĩwe watuĩkire mũndiirĩrĩri.

20Aanyumirie na nja, akĩndwara kũndũ kwariĩ; Aa’tharire, akĩnduta ũgwati-inĩ, nĩ ũndũ nĩekenagĩra nĩ niĩ.

21Jehova aa’thukĩire maũndũ maringaine na ũthingu wakwa; O ta ũguo moko makwa matherete-rĩ, ũguo noguo a’thukĩire,

22Nĩ ũndũ ndũire nũmĩrĩire njĩra cia Jehova, Na ndirĩ ndaaganĩra Ngai wakwa ngĩĩnyegenyũra harĩ we.

23Nĩ gũkorũo matuĩro make mothe maaikaraga o mbere yakwa, O naho ha ũhoro wa irĩra cia watho wake, ndirĩ ndacithengera,

24O na ningĩ ngĩonwo nĩwe-rĩ, ndiarĩ ũcuke, Na ngerĩithagia njeherere waganu wakwa.

25Tondũ ũcio Jehova nĩa’thukĩire ithuka rĩringaine na ũthingu wakwa, O ta ũrĩa ’therete ngĩonwo na maitho make.

26Wee-rĩ, harĩ ũrĩa mũigua tha, ũrĩĩonanagia o nawe wĩ mũigua tha, Na harĩ ũrĩa ũtarĩ ũcuke-rĩ, ũrĩĩonanagia atĩ ndũrĩ ũcuke;

27Harĩ ũrĩa mwĩtheria ũrĩĩonanagia wĩ mũtheru, Naho harĩ mbũra-matũ, ũrĩĩonanagia wĩ mũmũhutatĩri;

28Nao arĩa athĩnie-rĩ, wee nĩwe ũmahonokagia, No rĩrĩ, maitho maku maroranagia na andũ a rũng’athio, nĩguo ũmaagithie bata.

29Nĩ ũndũ atĩrĩ, wee Jehova nĩwe tawa wakwa, Nake Jehova nĩwe ũtũmaga nduma yakwa ĩtuĩke ũtheri.

30Amu tondũ waku ndahota gũtharĩkĩra mbũtũ ng’ima, Ningĩ tondũ wa Ngai wakwa ndahota kũrũũga rũirigo.

31Mũrungu-rĩ, njĩra yake nĩ nginyanĩru, Naguo uuge wa Jehova nĩ mũthuranĩre; Nĩwe ngo ya arĩa othe megiritanagia nake,

32Amu-rĩ, nũ ũngĩ Mũrungu thengia o Jehova? O na ningĩ-rĩ, nũ ũngĩ rũaro rũa ihiga thengia o Ngai witũ?

33Mũrungu nĩwe kĩhingo gĩakwa kĩrĩa kĩrũmu mũno, Ningĩ nĩwe wonagĩrĩria mũndũ ũrĩa ũtarĩ ũcuke mĩthiĩre yake.

34Atũmaga magũrũ makwa magĩe ihenya ta ma thwariga ya mũgoma, Agakĩnginyia kũndũ gwakwa kũrĩa gũtũũgĩru.

35Wee nĩwe ũmenyithagia moko makwa mũrũĩre wa mbaara, O nginya icoka ciakwa igakĩhota kũhaca ũta wa gĩcango.

36O na ningĩ-rĩ, wee nĩwe ũ’heete ngo ĩrĩa ya ũhonokania waku, Naguo ũhoreri waku nĩguo ũ’nenehetie.

37Wee nĩwe ũnjaramĩirie ũthiĩro wa makinya makwa, Magũrũ makwa magakĩaga gũtirũka.

38Thũ ciakwa ndĩciteng’eretie ngacinina biũ, O na ndiigana kũhũndũka o nginya hĩndĩ ĩrĩa cianinirũo o kũninwo biũ.

39Nĩ kũnina ndĩcininĩte biũ, ngacihehenjanga itikanacoke kwarahũka; Ti-itherũ nĩ kũgũa igũĩte makinya-inĩ makwa.

40Nĩ ũndũ wee ũ’hotorete ũhoti wa kũrũa mbaara, Ugagĩtũma arĩa maanjũkĩrĩire, makurumanĩre harĩ niĩ,

41O na ũgĩtũma thũ ciakwa inyonie ciande, Nĩ getha andũ arĩa ma’thũũrĩte ndĩmang’ũrie biũ.

42Nĩmaacũthangĩrĩirie, no mationire wa kũmahonokia, O nginya magĩkaĩra Jehova, no ndaigana kũmetĩka.

43Hĩndĩ ĩo ngĩkĩmamemenda magĩtuĩka o ta rũkũngũ rũa thĩ, Ngĩmarangĩrĩria thĩ o ta ndoro ya njĩra-inĩ, ngĩcoka ngĩmanyaagia kũndũ guothe.

44Ningĩ nĩwe ũ’honoketie, ũkanduta ngiano-inĩ ya andũ akwa, O na ũkanjikaria wega nĩguo nduĩke mũtongoria wa ndũrĩrĩ; Na rũruka rũa andũ itoĩ nĩrũkandungatagĩra.

45Andũ a kũngĩ-rĩ, nĩmarĩĩ’nyihagĩria, O rĩrĩa maaigua ngumo yakwa makagwata o kũnjathĩkĩra.

46Andũ acio a kũngĩ-rĩ, no kũhinyara makahinyara, Nao magoka makĩinainaga moimĩte na kũrĩa mehingĩire.

47Jehova atũũraga muoyo; o we rũaro rũakwa rũa ihiga arogathwo; We Ngai ũrĩa rũaro rũa ihiga rũa ũhonokio wakwa arotũũra atũũgĩrĩte;

48Nowe Mũrungu ũrĩa ũndĩhagĩria, O na akanyihia ndũrĩrĩ agatũma ndĩciathe.

49Nĩwe ũnyumagaragia akanduta harĩ thũ ciakwa; Ĩĩ-ni, nĩwe ũndũũgagĩria ngakĩra arĩa manjũkagĩrĩra; Wee nĩwe ũ’honokagia ũkandeithũra harĩ mũndũ ũrĩa mũtoi.

50Tondũ ũcio no ngũcokagĩrie ngatho, wee Jehova, ndĩ thĩinĩ wa ndũrĩrĩ, O narĩo rĩĩtwa rĩaku ndĩrĩinagĩre nyĩmbo ngĩrĩgooca.

51Mũthamaki wake-rĩ, nĩatũmaga one ũhonokio mũnene; Mũndũ wake mũitĩrĩrie maguta nĩamũtugaga, O we Daudi na mbeũ yake tene na tene.