2 Samuel 9

Kikuyu Bible (IBUKU RĨRĨA ITHERU RĨA NGAI)

← Chapter 8 Jump to: Chapter 10 →

1Nake Daudi agĩkĩũria atĩrĩ, Ĩ hihi nĩkũrĩ mũndũ o na ũmwe ũtigarĩte wa nyũmba ya Saulu ũrĩa ingĩhota gwĩka maũndũ mega ma ũtugi nĩ ũndũ wa Jonathani?

2Na rĩrĩ, gwakĩrĩ ndungata ĩmwe ya andũ a nyũmba ya Saulu, nayo yetagwo Ziba; nao andũ makĩmĩĩta ĩthiĩ he Daudi; nake mũthamaki akĩmĩũria atĩrĩ, Wee nĩwe Ziba? Nayo ĩkiuga atĩrĩ, Niĩ ndungata yaku, nĩ niĩ we.

3Nake mũthamaki akĩmũũria atĩrĩ, Kaĩ hatarĩ mũndũ o na ũmwe ũtigarĩte o na rĩu wa nyũmba ya Saulu, nĩ getha ndĩmwĩke maũndũ mega ma ũtugi wa Ngai? Nake Ziba agĩkĩĩra mũthamaki atĩrĩ, Jonathani e na mũriũ ũmwe aatigĩirio, nake nĩ mũndũ ũthuaga.

4Mũthamaki agĩkĩmũũria atĩrĩ, Mũndũ ũcio e ha rĩu? Nake Ziba agĩkĩĩra mũthamaki ũũ: Atĩrĩrĩ, arĩ kwa Makiru wa Amieli, mũciĩ, o kũu Lo-debari.

5Hĩndĩ ĩo mũthamaki, ti Daudi, akĩrekania, akĩmũgĩrithia, akĩmũrutithia mũciĩ wa Makiru wa Amieli, o kũu Lo-debari.

6Nake Mefiboshethu ũcio wa Jonathani wa Saulu agĩthiĩ agĩkinya he Daudi, akĩĩgũithia, agĩturumithia ũthiũ thĩ, akĩmwĩnyihĩria. Nake Daudi akiuga atĩrĩ, Mefiboshethu. Nake agĩgĩcokia ũũ: Niĩ ũyũ, ndungata yaku!

7Nake Daudi akĩmwĩra atĩrĩ, Tiga gwĩtigĩra, nĩ ũndũ ti-itherũ nĩngũgwĩka maũndũ mega ma ũtugi nĩ ũndũ wa thoguo Jonathani, na nĩngũgũcokeria gĩthaka gĩa thoguo Saulu gĩothe; nawe ũgũtũũra ũrĩagĩra irio metha-inĩ yakwa hingo ciothe.

8Nake Mefiboshethu akĩĩinamia akĩmwĩnyihĩria, akiuga atĩrĩ, He! Niĩ ndungata yaku ndĩ mũndũ wa kĩ, atĩ nĩkĩo wendete kũndora, o niĩ ndariĩ ta ngui nguũ?

9Hĩndĩ ĩo mũthamaki agĩgĩĩta Ziba, ndungata ĩo ya Saulu, akĩmĩĩra atĩrĩ, Indo ciothe iria ciarĩ cia Saulu, o na cia nyũmba yake yothe, nĩndacihe mũrũ wa mwathi waku.

10Nawe nĩwe ũrĩmũrĩmagĩra mĩgũnda, mwĩ na ariũ aku, o na ndungata ciaku, namo maciaro mayo ũmainũkagie mũciĩ, nĩ getha mũrũ wa mwathi waku onage irio cia kũrĩa; no rĩrĩ, Mefiboshethu, mũrũ wa mwathi waku, arĩrĩagĩra irio metha-inĩ yakwa hĩndĩ ciothe. Nake Ziba agĩkorũo arĩ na ariũ ake andũ ikũmi na atano, o na ndungata mĩrongo ĩĩrĩ.

11Hĩndĩ ĩo Ziba akĩĩra mũthamaki atĩrĩ, O ta ũrĩa maũndũ mothe matariĩ marĩa ũkũnjatha niĩ ndungata yaku, wee mũthamaki ũyũ, mwathi wakwa-rĩ, ũguo noguo niĩ, ndungata yaku, ndĩrĩĩkaga. Naho ha ũhoro wa Mefiboshethu, mũthamaki akiuga atĩrĩ, Arĩrĩagĩra irio metha-inĩ yakwa, o ta arĩ mũndũ ũmwe wa ariũ a mũthamaki.

12Nake Mefiboshethu aarĩ na kamwana kanini getagwo Mika. Nao andũ othe arĩa maatũũrĩte mũciĩ wa Ziba magĩgĩtuĩka ndungata cia Mefiboshethu.

13Nake Mefiboshethu agĩgĩtũũra Jerusalemu; nĩ ũndũ aarĩagĩra irio metha-inĩ ya mũthamaki hĩndĩ ciothe; nake nĩaathuaga magũrũ merĩ.

← Chapter 8 Jump to: Chapter 10 →