Job 42

Khmer 2014 (អាល់គីតាប)

← Chapter 41 Jump to:

1អៃយ៉ូបឆ្លើយ អុលឡោះ‌តាអាឡា ថា៖

2«ខ្ញុំទទួលស្គាល់ថា ទ្រង់អាចធ្វើគ្រប់កិច្ចការទាំងអស់បាន ហើយគ្មានការអ្វីមួយដែលធ្វើឲ្យទ្រង់ ទាល់តម្រិះឡើយ។

3ទ្រង់មានបន្ទូលមកខ្ញុំថា “ម្ដេចក៏អ្នកសង្ស័យលើគម្រោង‌ការរបស់យើង ដោយពោលពាក្យឥតខ្លឹមសារដូច្នេះ?” ពិតមែនហើយ ខ្ញុំបានថ្លែងនូវសេចក្ដី ដ៏អស្ចារ្យដោយពុំដឹងខ្លួន គឺការអស្ចារ្យខ្ពស់លើសពីប្រាជ្ញា ដែលខ្ញុំអាចយល់ និងអាចស្គាល់។

4ទ្រង់មានបន្ទូលទៀតថា “ចូរស្ដាប់សេចក្ដីដែលយើងថ្លែង យើងនឹងសួរអ្នក ហើយអ្នកត្រូវតែឆ្លើយ”

5កាលពីមុន ខ្ញុំគ្រាន់តែបានឮគេនិយាយ អំពីទ្រង់ ឥឡូវនេះ ខ្ញុំឃើញទ្រង់ ផ្ទាល់នឹងភ្នែកតែម្ដង។

6ហេតុនេះ ខ្ញុំសូមសារភាពកំហុស ហើយដាក់ខ្លួន ដោយក្រាបនៅក្នុងធូលីដី និងផេះ»។

7ក្រោយពេល អុលឡោះ‌តាអាឡា មានបន្ទូលទាំងនេះមកកាន់អៃយ៉ូបហើយ ទ្រង់មានបន្ទូលទៅកាន់លោកអេលី‌ផាសជាអ្នកស្រុកថេម៉ានថា៖ «យើងខឹងនឹងអ្នក ព្រមទាំងមិត្ត‌ភក្ដិទាំងពីររបស់អ្នកខ្លាំងណាស់ ដ្បិតអ្នកពុំបានថ្លែងអំពីយើង ដោយត្រឹមត្រូវដូចអៃយ៉ូប ជាអ្នកបម្រើរបស់យើងឡើយ។

8ដូច្នេះ ចូរយកគោបាប្រាំ‌ពីរ និងចៀមឈ្មោលប្រាំ‌ពីរ ទៅជួបអៃយ៉ូប ជាអ្នកបម្រើរបស់យើង ហើយធ្វើជាគូរបានដុតសម្រាប់អ្នករាល់គ្នាចុះ។ អៃយ៉ូប ជាអ្នកបម្រើរបស់យើង នឹងទូរអា‌អង្វរឲ្យអ្នករាល់គ្នា។ ដោយយើងយល់អធ្យា‌ស្រ័យដល់អៃយ៉ូបនោះ យើងនឹងមិនដាក់ទោសអ្នករាល់គ្នា ឲ្យសមនឹងគំនិតលេលារបស់អ្នករាល់គ្នាទេ ដ្បិតអ្នកពុំបានថ្លែងអំពីយើងដោយត្រឹមត្រូវ ដូចអៃយ៉ូប ជាអ្នកបម្រើរបស់យើងឡើយ»។

9លោកអេលី‌ផាសជាអ្នកស្រុកថេម៉ាន លោកប៊ីល‌ដាដជាអ្នកស្រុកស៊ូអា និងលោកសូផារជាអ្នកស្រុកណាអាម៉ានាំគ្នាចាកចេញទៅ ហើយធ្វើតាមសេចក្ដីដែល អុលឡោះ‌តាអាឡា បានបង្គាប់។ ពេលនោះ អុលឡោះ‌តាអាឡា ក៏អធ្យា‌ស្រ័យដល់អៃយ៉ូប។

10នៅពេលដែលអៃយ៉ូបទូរអា‌អង្វរឲ្យមិត្ត‌ភក្ដិរបស់គាត់ អុលឡោះ‌តាអាឡា ប្រោស‌ប្រណីគាត់ឲ្យបានចំរុង‌ចំរើនឡើងវិញ។ អុលឡោះ‌តាអាឡា ប្រទានឲ្យគាត់ទទួលអ្វីៗទាំងអស់ពីរដងច្រើនលើសមុន។

11បងប្អូនប្រុសស្រីទាំងប៉ុន្មានរបស់គាត់ និងញាតិ‌មិត្តទាំងអស់ដែលគាត់ធ្លាប់ស្គាល់ នាំគ្នាមកសួរសុខទុក្ខគាត់ ហើយបរិភោគអាហាររួមជាមួយគាត់ នៅក្នុងផ្ទះរបស់គាត់។ ពួកគេសំដែងការអាណិត‌អាសូរ និងសំរាលទុក្ខគាត់ ព្រោះតែទុក្ខវេទនាទាំងប៉ុន្មានដែល អុលឡោះ‌តាអាឡា បានបណ្ដាលឲ្យកើតមានដល់គាត់។ ពួកគេយកប្រាក់មួយណែនម្នាក់ ព្រមទាំងកងមាសម្នាក់មួយ មកជូនគាត់។

12អុលឡោះ‌តាអាឡា ប្រទានពរដល់អៃយ៉ូបលើកនេះ ច្រើនជាងមុនទៅទៀត គឺគាត់មានចៀមមួយម៉ឺនបួនពាន់ក្បាល អូដ្ឋប្រាំមួយពាន់ក្បាល គោមួយពាន់នឹម និងលាញីមួយពាន់ក្បាល។

13គាត់មានកូនប្រុសប្រាំ‌ពីរនាក់ និងកូនស្រីបីនាក់។

14គាត់ដាក់ឈ្មោះកូនស្រីទីមួយថា «យេមី‌ម៉ា» កូនស្រីទីពីរ «កេស៊ី‌យ៉ា» និងកូនស្រីទីបី «កេរេន-‌ហាពូក»។

15នៅក្នុងស្រុកនោះទាំងមូល គ្មាននារីណាមានរូបឆោមល្អស្អាត ដូចកូនស្រីរបស់អៃយ៉ូបទេ។ អៃយ៉ូប ជាឪពុក ក៏បានចែកមត៌កឲ្យនាងទាំងបី ដូចបងប្អូនប្រុសៗទាំងប្រាំ‌ពីរនាក់ដែរ។

16ក្រោយមក អៃយ៉ូបរស់បានមួយរយសែ‌សិបឆ្នាំទៀត គាត់បានឃើញកូនចៅរបស់គាត់រហូតដល់បួនតំណ។

17បន្ទាប់ពីមានអាយុយឺន‌យូរសម្បូណ៌សប្បាយមក អៃយ៉ូបក៏លាចាកលោកនេះទៅ៕

← Chapter 41 Jump to: