Deuteronomy 29

Khmer (ព្រះគម្ពីរបរិសុទ្ធកែសម្រួល ២០១៦)

← Chapter 28 Jump to: Chapter 30 →

1នេះជាពាក្យនៃសេចក្ដី‌សញ្ញា ដែលព្រះ‌យេហូវ៉ាបានបង្គាប់ឲ្យលោកម៉ូសេតាំងជា‌មួយប្រជា‌ជនអ៊ីស្រា‌អែលនៅស្រុកម៉ូអាប់ ក្រៅពីសេចក្ដី‌សញ្ញាដែលព្រះ‌អង្គបានតាំងជា‌មួយពួក‌គេ នៅភ្នំហោរែប។

2លោកម៉ូសេបានកោះហៅពួកអ៊ីស្រា‌អែលទាំងអស់មក ហើយប្រាប់គេថា៖ «អ្នករាល់គ្នាបានឃើញគ្រប់ទាំងការដែលព្រះ‌យេហូវ៉ាបានធ្វើនៅស្រុកអេស៊ីព្ទដល់ផារ៉ោន ដល់ពួកមហា‌តលិក និងដល់ស្រុកទ្រង់ទាំងមូល នៅចំពោះមុខអ្នករាល់គ្នាហើយ

3គឺអស់ទាំងការល្បងយ៉ាងធំ ដែលភ្នែករបស់អ្នកបានឃើញ ព្រមទាំងទីសម្គាល់ និងការអស្ចារ្យដ៏ធំផង។

4ប៉ុន្តែ លុះមកដល់សព្វថ្ងៃនេះ ព្រះ‌យេហូវ៉ាមិនបានប្រទាន ឲ្យអ្នករាល់គ្នាមានចិត្តយល់ ឬភ្នែកដែលមើលឃើញ ឬត្រចៀកដែលស្តាប់ឮនៅឡើយ។

5យើងបាននាំអ្នករាល់គ្នាក្នុងទីរហោ‌ស្ថានអស់សែសិបឆ្នាំហើយ ឯសម្លៀក‌បំពាក់របស់អ្នក នោះមិនបានសឹកនៅលើខ្លួនសោះ ហើយស្បែកជើងរបស់អ្នកក៏មិនបានសឹកដែរ

6អ្នករាល់គ្នាមិនបានបរិ‌ភោគនំបុ័ង ឬផឹកស្រាទំពាំង‌បាយ‌ជូរ ឬគ្រឿងស្រវឹងណាសោះ ដើម្បីឲ្យបានដឹងថា យើងនេះជាព្រះ‌យេហូវ៉ាជាព្រះរបស់អ្នក

7ពេលអ្នករាល់គ្នាបានមកដល់ទីនេះ នោះស៊ីហុនជាស្តេចក្រុងហែសបូន និងអុកជាស្តេចស្រុកបាសាន បានចេញមកច្បាំងនឹងយើង ហើយយើងក៏បានវាយឈ្នះគេ។

8យើងបានចាប់យកស្រុកគេ ក៏ចែកជាមត៌កដល់ពួករូបេន ពួកកាដ និងកុល‌សម្ព័ន្ធម៉ាណា‌សេមួយចំហៀង។

9ដូច្នេះ ចូរកាន់ ហើយប្រព្រឹត្តតាមអស់ទាំងពាក្យនៃសេចក្ដីសញ្ញានេះ ដើម្បីឲ្យអ្នករាល់គ្នាបានចម្រើនឡើង ក្នុងគ្រប់ទាំងការដែលអ្នកធ្វើ។

10នៅថ្ងៃនេះ អ្នកទាំងអស់គ្នាកំពុងឈរនៅចំពោះព្រះ‌យេហូវ៉ាជាព្រះរបស់អ្នក គឺពួកមេនៃកុល‌សម្ព័ន្ធរបស់អ្នក ពួកចាស់‌ទុំរបស់អ្នក ពួកនាយករបស់អ្នក បុរសអ៊ីស្រា‌អែលទាំងអស់

11ពួកកូនតូចៗរបស់អ្នក ប្រពន្ធរបស់អ្នក និងពួកអ្នកប្រទេសក្រៅដែលនៅក្នុងជំរំអ្នក តាំងពីអ្នកពុះឧស រហូតទៅដល់អ្នកដែលដងទឹកឲ្យអ្នក

12ត្រូវចុះសញ្ញាជា‌មួយព្រះ‌យេហូវ៉ាជាព្រះរបស់អ្នក និងសម្បថ ដែលព្រះ‌យេហូវ៉ាជាព្រះរបស់អ្នក ព្រះ‌អង្គស្បថនឹងអ្នកនៅថ្ងៃនេះ

13ដើម្បីឲ្យព្រះ‌អង្គបានតាំងអ្នកទុកជាប្រជា‌រាស្ត្ររបស់ព្រះ‌អង្គនៅថ្ងៃនេះ ហើយឲ្យព្រះ‌អង្គបានធ្វើជាព្រះរបស់អ្នក ដូចព្រះ‌អង្គបានសន្យានឹងអ្នក ដូចព្រះ‌អង្គបានស្បថនឹងលោកអ័ប្រា‌ហាំ លោកអ៊ីសាក និងលោកយ៉ាកុប ជាបុព្វ‌បុរសរបស់អ្នក។

14យើងតាំងសេចក្ដី‌សញ្ញា និងសម្បថនេះ មិនមែនតែជា‌មួយអ្នករាល់គ្នាប៉ុណ្ណោះទេ

15គឺជា‌មួយអ្នកដែលឈរនៅទីនេះ នៅចំពោះព្រះ‌យេហូវ៉ាជាព្រះរបស់យើង នៅថ្ងៃនេះ និងជា‌មួយអ្នកដែលមិននៅទីនេះ នៅថ្ងៃនេះផងដែរ។

16អ្នករាល់គ្នាដឹងស្រាប់ហើយថា យើងធ្លាប់រស់នៅស្រុកអេស៊ីព្ទ ហើយយើងឆ្លងកាត់កណ្ដាលសាសន៍នានាដោយរបៀបណា។

17អ្នករាល់គ្នាបានឃើញការគួរស្អប់ខ្ពើមរបស់គេ និងព្រះដែលធ្វើពីឈើ និងពីថ្ម ពីប្រាក់ និងពីមាស នៅក្នុងចំណោមពួក‌គេហើយ។

18ចូរប្រយ័ត្នក្រែងនៅក្នុងចំណោមអ្នករាល់គ្នានៅថ្ងៃនេះ មានបុរស ឬស្រ្ដីណា ឬពូជអំបូរណា ឬកុល‌សម្ព័ន្ធណា ដែលមានចិត្តបែរចេញពីព្រះ‌យេហូវ៉ាជាព្រះរបស់យើង ទៅគោរពបម្រើព្រះរបស់សាសន៍ទាំងនោះ។ ចូរប្រយ័ត្នក្រែងនៅក្នុងចំណោមអ្នករាល់គ្នា មានឫសណាដែលបង្កើតជាតិពុល និងផ្លែល្វីងជូរចត់

19ជាអ្នកដែលកាលណាខ្លួនឮពាក្យសម្បថនេះ រួចឲ្យពរដល់ខ្លួននៅក្នុងចិត្តថា "ខ្ញុំនឹងមានសេចក្ដីសុខ ទោះបើខ្ញុំដើរតាមចិត្តរឹង‌ចចេសរបស់ខ្ញុំក៏ដោយ"។ យ៉ាងនេះនឹងនាំឲ្យអន្តរាយដូចគ្នា ទាំងមនុស្សល្អ ទាំងមនុស្សអាក្រក់។

20ព្រះ‌យេហូវ៉ានឹងមិនអត់ទោសអ្នកនោះឡើយ គឺសេចក្ដី‌ខ្ញាល់ និងសេចក្ដីប្រចណ្ឌរបស់ព្រះ‌យេហូវ៉ា នឹងហុយឡើងទាស់នឹងអ្នកនោះ ហើយគ្រប់ទាំងបណ្ដា‌សាដែលបានកត់ក្នុងគម្ពីរនេះ នឹងនៅជាប់លើអ្នកនោះ រួចព្រះ‌យេហូវ៉ានឹងលុបឈ្មោះគេចេញពីក្រោមមេឃ។

21ព្រះ‌យេហូវ៉ានឹងញែកអ្នកនោះ ចេញពីគ្រប់កុល‌សម្ព័ន្ធនៃសាសន៍អ៊ីស្រា‌អែល សម្រាប់សេចក្ដីអាក្រក់ តាមអស់ទាំងពាក្យបណ្ដា‌សានៃសេចក្ដី‌សញ្ញាដែលចែងទុកក្នុងគម្ពីរក្រឹត្យ‌វិន័យនេះ។

22ឯតំណមនុស្សក្រោយមក គឺកូនចៅរបស់អ្នករាល់គ្នាដែលនឹងកើតតពីអ្នក និងពួកអ្នកដទៃដែលមកពីស្រុកឆ្ងាយ កាលណាគេឃើញសេចក្ដីវេទនានៅស្រុកនោះ និងជំងឺទាំងប៉ុន្មានដែលព្រះ‌យេហូវ៉ាបានធ្វើឲ្យឈឺ

23គឺស្រុកទាំងមូលត្រូវឆេះដោយស្ពាន់‌ធ័រ និងអំបិល គ្មានអ្វីបានសាប‌ព្រោះ គ្មានអ្វីបានលូត‌លាស់ គ្មានរុក្ខ‌ជាតិណាចេញពន្លក ហើយត្រូវបំផ្លាញដូចនៅក្រុងសូដុម ក្រុងកូម៉ូរ៉ា ក្រុងអាត់ម៉ា និងក្រុងសេបោមដែរ ជាទីក្រុងដែលព្រះ‌យេហូវ៉ាបានបំផ្លាញ ដោយសេចក្ដី‌ខ្ញាល់ និងសេចក្ដី‌ក្រោធរបស់ព្រះ‌អង្គ

24នោះអស់ទាំងសាសន៍នឹងពោលថា "ហេតុអ្វីបានជាព្រះ‌យេហូវ៉ាប្រព្រឹត្តដូច្នេះដល់ស្រុកនេះ? ហេតុអ្វីបានជាព្រះ‌អង្គខ្ញាល់ខ្លាំងបែបនេះ?"

25នោះគេនឹងឆ្លើយថា "គឺដោយព្រោះតែគេបានបោះ‌បង់ចោលសេចក្ដី‌សញ្ញារបស់ព្រះ‌យេហូវ៉ា ជាព្រះនៃបុព្វ‌បុរសរបស់គេ ដែលព្រះ‌អង្គបានតាំងនឹងគេ នៅពេលព្រះ‌អង្គបាននាំគេចេញពីស្រុកអេស៊ីព្ទ

26គេបានបែរទៅជាគោរពប្រតិ‌បត្តិ ហើយទៅថ្វាយ‌បង្គំព្រះដទៃ ជាព្រះដែលគេមិនបានស្គាល់ ហើយជាព្រះដែលព្រះ‌អង្គមិនអនុញ្ញាតឲ្យពួក‌គេថ្វាយ‌បង្គំ។

27ហេតុនេះហើយបានជាសេចក្ដី‌ក្រោធរបស់ព្រះ‌យេហូវ៉ាបានឆួលឡើងទាស់នឹងស្រុកនេះ ហើយទម្លាក់អស់ទាំងបណ្ដា‌សាដែលបានចែងទុកក្នុងគម្ពីរនេះ មកលើពួក‌គេ

28ព្រះ‌យេហូវ៉ាបានរំលើងគេចេញពីស្រុក ដោយសេចក្ដី‌ខ្ញាល់ សេចក្ដីឃោរ‌ឃៅ និងសេចក្ដី‌ក្រោធជាខ្លាំង ហើយបានបោះគេចោលទៅក្នុងស្រុកមួយទៀត ដូចជាមានសព្វថ្ងៃនេះ"

29សេចក្ដីលាក់កំបាំង នោះស្រេចនៅព្រះ‌យេហូវ៉ាជាព្រះរបស់យើងរាល់គ្នា តែសេចក្ដីដែលបានបើកសម្ដែងមក នោះស្រេចនៅយើងរាល់គ្នា និងកូនចៅរបស់យើងជារៀងរហូត ដើម្បីឲ្យយើងបានប្រព្រឹត្តតាមអស់ទាំងពាក្យក្នុងក្រឹត្យ‌វិន័យនេះ»។

← Chapter 28 Jump to: Chapter 30 →