Deuteronomy 9

Khmer (ព្រះគម្ពីរបរិសុទ្ធកែសម្រួល ២០១៦)

← Chapter 8 Jump to: Chapter 10 →

1«ឱអ៊ីស្រា‌អែលអើយ ចូរស្តាប់! អ្នករាល់គ្នាត្រូវឆ្លងទន្លេយ័រ‌ដាន់នៅថ្ងៃនេះ ដើម្បីចូលទៅបណ្ដេញសាសន៍នានាដែលធំជាង ហើយពូកែជាងអ្នក គឺជាក្រុងធំៗ មានកំផែងខ្ពស់ដល់ផ្ទៃមេឃ

2ជាប្រជា‌ជនមាឌធំខ្ពស់ គឺពួកកូនចៅអ័ណាក់ ដែលអ្នកស្គាល់ហើយ ក៏បានឮនិយាយពីគេថា "តើអ្នកណាអាចនឹងឈរនៅមុខពួកកូនចៅអ័ណាក់បាន?"

3ដូច្នេះ នៅថ្ងៃនេះ ចូរដឹងថា ព្រះ‌យេហូវ៉ាជាព្រះរបស់អ្នក ដែលនាំមុខអ្នកឆ្លងទៅ ព្រះ‌អង្គដូចជាភ្លើងដែលឆេះបន្សុស ព្រះ‌អង្គនឹងបំផ្លាញគេ ហើយបង្ក្រាបគេនៅមុខអ្នក ដើម្បីឲ្យអ្នកអាចបណ្តេញគេបាន ហើយបំផ្លាញគេយ៉ាងឆាប់រហ័ស ដូចព្រះ‌យេហូវ៉ាបានសន្យានឹងអ្នក ។

4កាលណាព្រះ‌យេហូវ៉ាជាព្រះរបស់អ្នក បានបណ្តេញគេ ពីមុខអ្នកចេញហើយ នោះមិនត្រូវគិតក្នុងចិត្តថា ព្រះ‌យេហូវ៉ាបាននាំខ្ញុំចូលមកកាន់កាប់ស្រុកនេះ ព្រោះតែខ្ញុំសុចរិតនោះឡើយ តែដោយព្រោះអំពើអាក្រក់របស់សាសន៍ទាំងនោះទេ ដែលព្រះ‌យេហូវ៉ាបណ្តេញគេចេញពីមុខអ្នក ។

5មិនមែនដោយព្រោះសេចក្ដីសុចរិតរបស់អ្នក ឬដោយព្រោះចិត្តអ្នកទៀងត្រង់ ដែលអ្នកនឹងចូលទៅកាន់កាប់ស្រុករបស់គេនោះឡើយ គឺដោយព្រោះអំពើអាក្រក់របស់សាសន៍ទាំងនោះវិញទេតើ ដែលព្រះ‌យេហូវ៉ាជាព្រះរបស់អ្នក ព្រះ‌អង្គបណ្តេញគេចេញពីមុខអ្នក ដើម្បីនឹងបញ្ជាក់សេចក្ដី ដែលព្រះយេហូវ៉ាបានស្បថនឹងបុព្វបុរសរបស់អ្នក គឺលោកអ័ប្រា‌ហាំ លោកអ៊ីសាក និងលោកយ៉ាកុប។

6ដូច្នេះ ចូរដឹងថា ដែលព្រះ‌យេហូវ៉ាជាព្រះរបស់អ្នក ប្រទានស្រុកដ៏ល្អនេះឲ្យអ្នកកាន់កាប់ មិនមែនដោយព្រោះសេចក្ដីសុចរិតរបស់អ្នកទេ ដ្បិតអ្នកជាប្រជា‌ជនដែលមានចិត្តរឹង‌រូស។

7ចូរនឹកចាំ កុំឲ្យភ្លេចថា អ្នកបានបណ្ដាលឲ្យព្រះ‌យេហូវ៉ាជាព្រះរបស់អ្នក មានសេចក្ដី‌ក្រោធ នៅត្រង់ទីរហោ‌ស្ថាន ហើយចាប់តាំងពីថ្ងៃដែលអ្នកចេញពីស្រុកអេស៊ីព្ទ រហូតមកដល់ទីនេះ អ្នករាល់គ្នាចេះតែបះ‌បោរនឹងព្រះ‌យេហូវ៉ាជា‌និច្ច។

8នៅត្រង់ភ្នំហោរែបក៏ដែរ អ្នករាល់គ្នាបានបណ្ដាលឲ្យព្រះ‌យេហូវ៉ាមានសេចក្ដី‌ក្រោធ ហើយព្រះ‌យេហូវ៉ាខ្ញាល់នឹងអ្នករាល់គ្នាជាខ្លាំង រហូតដល់ចង់បំផ្លាញអ្នករាល់គ្នាទៀតផង។

9ក្នុងគ្រាដែលខ្ញុំបានឡើងទៅលើភ្នំដើម្បីទទួលបន្ទះថ្ម ជាបន្ទះថ្មនៃសេចក្ដី‌សញ្ញាដែលព្រះ‌យេហូវ៉ាបានតាំងជា‌មួយអ្នករាល់គ្នា នោះខ្ញុំបាននៅលើភ្នំអស់សែសិបថ្ងៃសែសិបយប់ ឥតមានបរិ‌ភោគអាហារ ឬផឹកទឹកសោះ។

10ព្រះ‌យេហូវ៉ាបានប្រទានបន្ទះថ្មទាំងពីរផ្ទាំងមកខ្ញុំ ដែលសរសេរដោយអង្គុលីរបស់ព្រះ ហើយនៅលើថ្មទាំងពីរនោះ មានអស់ទាំងព្រះ‌បន្ទូល ដែលព្រះ‌យេហូវ៉ាមានព្រះ‌បន្ទូលមកកាន់អ្នករាល់គ្នា នៅលើភ្នំពីក្នុងភ្លើង នាថ្ងៃជួបប្រជុំគ្នានោះ។

11លុះដល់ផុតសែសិបថ្ងៃសែសិបយប់នោះហើយ ព្រះ‌យេហូវ៉ាក៏ប្រទានបន្ទះថ្មទាំងពីរផ្ទាំងនោះមកខ្ញុំ គឺជាបន្ទះថ្មនៃសេចក្ដី‌សញ្ញា។

12ពេលនោះ ព្រះ‌យេហូវ៉ាមានព្រះ‌បន្ទូលមកខ្ញុំថា "ចូរក្រោកឡើង ចុះពីនេះជាប្រញាប់ទៅ ដ្បិតប្រជា‌ជនរបស់អ្នក ដែលអ្នកបាននាំចេញពីស្រុកអេស៊ីព្ទមក បានប្រព្រឹត្តយ៉ាងខូចអាក្រក់។ គេរហ័សនឹងបែរចេញពីផ្លូវដែលយើងបានបង្គាប់គេ គេបានសិតធ្វើរូបព្រះសម្រាប់គេហើយ"។

13ព្រះ‌យេហូវ៉ាមានព្រះ‌បន្ទូលមកខ្ញុំទៀតថា "យើងបានរំពឹងមើលឃើញថា ប្រជា‌ជននេះសុទ្ធតែជាមនុស្សមានចិត្តរឹង‌រូស។

14ចូរទុកឲ្យយើង យើងនឹងបំផ្លាញពួក‌គេចេញ ហើយលុបឈ្មោះរបស់គេឲ្យបាត់ពីក្រោមមេឃ រួចយើងនឹងយកអ្នក បង្កើតឡើងជាសាសន៍មួយដ៏ខ្លាំងពូកែ ហើយមានគ្នាច្រើនជាងប្រជា‌ជននេះ"។

15ដូច្នេះ ខ្ញុំក៏វិលចុះពីភ្នំមកវិញ ក្នុងកាលដែលភ្នំមានភ្លើងឆេះយ៉ាងសន្ធោសន្ធៅ។ ឯបន្ទះថ្មទាំងពីរនៃសេចក្ដី‌សញ្ញា នៅជាប់នឹងដៃខ្ញុំទាំងសងខាង។

16ខ្ញុំក្រឡេកមើលទៅឃើញថា អ្នករាល់គ្នាបានធ្វើបាបទាស់នឹងព្រះ‌យេហូវ៉ាជាព្រះរបស់អ្នករាល់គ្នា ដោយបានសិតធ្វើរូបកូនគោមួយ។ អ្នករាល់គ្នាបានងាកចេញយ៉ាងរហ័សពីផ្លូវដែលព្រះ‌យេហូវ៉ាបានបង្គាប់អ្នករាល់គ្នា។

17ដូច្នេះ ខ្ញុំក៏ចាប់យកថ្មទាំងពីរផ្ទាំង ហើយគ្រវែងចេញពីដៃទាំងពីររបស់ខ្ញុំ បំបែកបន្ទះចោលនៅចំពោះមុខអ្នករាល់គ្នា។

18បន្ទាប់មក ខ្ញុំក្រាបចុះនៅចំពោះព្រះ‌យេហូវ៉ាដូចពីមុន អស់សែសិបថ្ងៃសែសិបយប់ ខ្ញុំមិនបរិ‌ភោគនំប៉័ង ឬផឹកទឹកឡើយ ព្រោះតែអំពើបាបទាំងប៉ុន្មានដែលអ្នករាល់គ្នាបានប្រព្រឹត្ត ដោយធ្វើការអាក្រក់នៅព្រះ‌នេត្រព្រះ‌យេហូវ៉ា ជាការដែលបណ្ដាលឲ្យព្រះ‌អង្គខ្ញាល់។

19ដ្បិតខ្ញុំភ័យខ្លាចចំពោះសេចក្ដី‌ខ្ញាល់ និងសេចក្ដីក្រេវក្រោធដែលព្រះ‌យេហូវ៉ាអត់ទ្រាំនឹងអ្នករាល់គ្នា រហូតដល់ចង់បំផ្លាញអ្នករាល់គ្នា។ ប៉ុន្ដែ ព្រះ‌យេហូវ៉ាទ្រង់ព្រះសណ្ដាប់ខ្ញុំនៅវេលានោះ។

20ព្រះ‌យេហូវ៉ាខ្ញាល់នឹងលោកអើរ៉ុនជាខ្លាំង រហូតដល់ចង់បំផ្លាញលោកទៀតផង តែនៅវេលានោះ ខ្ញុំក៏បានទូលអង្វរឲ្យលោកអើរ៉ុនដែរ។

21ពេលនោះ ខ្ញុំបានយករូបកូនគោដែលអ្នករាល់គ្នាបានធ្វើ គឺជាអំពើបាបរបស់អ្នករាល់គ្នា ទៅដុតកម្ទេចនឹងភ្លើង ហើយកិនឲ្យម៉ដ្តដូចធូលី រួចបាចធូលីនោះទៅក្នុងជ្រោះទឹកដែលហូរចុះពីភ្នំ។

22កាលនៅតាបេរ៉ា នៅម៉ាសា និងនៅគីប្រុត-ហាតាវ៉ា អ្នករាល់គ្នាក៏បានធ្វើឲ្យព្រះ‌យេហូវ៉ាក្រោធដែរ។

23កាលព្រះ‌យេហូវ៉ាបានចាត់អ្នកពីកាដេស-បារនា ដោយព្រះ‌បន្ទូលថា "ចូរឡើងទៅចាប់យកស្រុកដែលយើងបានប្រគល់ឲ្យអ្នករាល់គ្នាចុះ" នោះអ្នករាល់គ្នាបានបះ‌បោរទាស់នឹងបញ្ជារបស់ព្រះ‌យេហូវ៉ាជាព្រះរបស់អ្នករាល់គ្នាទៀត ហើយមិនបានជឿ ក៏មិនបានស្តាប់តាមព្រះសូរសៀងរបស់ព្រះ‌អង្គសោះ។

24អ្នករាល់គ្នាចេះតែបះបោរទាស់នឹងព្រះ‌យេហូវ៉ាជានិច្ច តាំងតែពីខ្ញុំ បានស្គាល់អ្នករាល់គ្នាមក។

25ដូច្នេះ ខ្ញុំបានក្រាបចុះនៅចំពោះព្រះ‌យេហូវ៉ា អស់សែសិបថ្ងៃសែសិបយប់នោះ ដោយព្រោះព្រះ‌យេហូវ៉ាបានមានព្រះ‌បន្ទូលថា ព្រះ‌អង្គនឹងបំផ្លាញអ្នករាល់គ្នា

26ខ្ញុំក៏ទូលអង្វរដល់ព្រះ‌យេហូវ៉ាថា "ឱព្រះ‌យេហូវ៉ា ជាព្រះ‌អម្ចាស់អើយ សូមកុំបំផ្លាញប្រជា‌រាស្ត្ររបស់ព្រះ‌អង្គ និងមត៌ករបស់ព្រះ‌អង្គឡើយ ដ្បិតព្រះ‌អង្គបានលោះគេដោយតេជា‌នុភាពរបស់ព្រះ‌អង្គ ហើយបាននាំគេចេញពីស្រុកអេស៊ីព្ទមក ដោយព្រះ‌ហស្តដ៏ខ្លាំងពូកែ។

27សូមនឹកចាំពីលោកអ័ប្រា‌ហាំ លោកអ៊ីសាក និងលោកយ៉ាកុប ជាអ្នកបម្រើរបស់ព្រះ‌អង្គវិញ សូមកុំទតចំពោះសេចក្ដីរឹង‌រូសរបស់ប្រជា‌ជននេះ ឬសេចក្ដីអាក្រក់ ឬអំពើបាបរបស់គេឡើយ

28ក្រែងមនុស្សនៅស្រុកដែលព្រះ‌អង្គបាននាំយើងចេញមកនោះ និយាយថា "ដោយព្រោះតែព្រះ‌យេហូវ៉ាពុំអាចនាំគេចូលទៅក្នុងស្រុកដែលព្រះ‌អង្គបានសន្យានឹងគេ ហើយដោយព្រោះព្រះ‌អង្គស្អប់គេ បានជាព្រះ‌អង្គនាំគេចេញទៅសម្លាប់នៅទីរហោ‌ស្ថាន"។

29ដ្បិតពួក‌គេជាប្រជា‌រាស្ត្រ និងជាមត៌ករបស់ព្រះ‌អង្គ ដែលព្រះ‌អង្គបាននាំចេញមក ដោយ‌សារព្រះ‌ចេស្តាដ៏ធំ និងដោយព្រះ‌ពាហុលើកសម្រេច"»។

← Chapter 8 Jump to: Chapter 10 →