Proverbs 18

Krio (Krio Fɔs Oli Baybul)

← Chapter 17 Jump to: Chapter 19 →

1Pɔsin we de kip to insɛf nɔmɔ nɔ wan no bɔt ɔda pɔsin.

2Fulman nɔ de pe atɛnshɔn fɔ kapu sɛns, i kin lɛk fɔ sho insɛf se in smat.

3Usay bad plɛnti, shem ɛn disgres de biɛn am ɛn pipul nɔ de rɛspɛkt udat bad.

4Ɛni sɛns tɔk we de kɔmɔt na pɔsin in mɔt tan lɛkɛ wata we de gɛda na di oshɔn, na so i kin de flo lɛkɛ spriŋ wata.

5Lɛkɛ aw i nɔ fayn fɔ fri udat gilti, na so i nɔ fayn fɔ rog di pɔsin we de waka tret.

6Wɛn fulman opin in mɔt na fɔ briŋ plaba, na gud bit i kin de fɛn fɔ insɛf.

7Wɛn fulman tɔk, nainsɛf i de pwɛl; wetin de kɔmɔt nain mɔt na trap fɔ kech insɛf, sɛf.

8Kongosa tan lɛkɛ swit it we pɔsin de ɛnjɔy, na so i kin go bon.

9Pɔsin we les ɛn pɔsin we sabi pwɛl, dɛn tu na lɛkɛ tatu ɛn yawa.

10PAPA GƆD na lɛkɛ big kɔtintri, pɔsin we de waka tret na PAPA GƆD in yay kin go ayd biɛn am.

11We man gɛt mɔni, prɔblɛm nɔ de ebul am; i kin de fil se in mɔni na ɔltin.

12Bifo pɔsin alaki na kak fɔs i kin bigin kak, yu gɛt fɔ put yusɛf dɔŋ bifo dɛn go es yu ɔp.

13If yu ansa bifo yu yɛri wetin dɛn de tɔk, yu jɛs de sho se yu na fulman.

14If yu bɔdi sik, yu kin manej bɔk ɔp, bɔt if yu spirit sik, udat go ebul bia?

15Udat gɛt sɛns de tray fɔ lan mɔ, ɛn yu tik nɔ brok nain yes, insɛf de tray fɔ lan.

16Udat de mek frian de opin we fɔ insɛf, ɛn dat de mek i rɔbskin wit impɔtant pɔsin.

17Udat fɔs le kɔmplen kin tan lɛk i gɛt rayt, te dɛn yɛri di ɔda pati in stori.

18Wɛn tu pawaful pipul de mek plaba, na fɔ lɛf PAPA GƆD fɔ kɔt di kes.

19I at fɔ mek pis wit yu brɔda, pas fɔ kapchɔ siti we gɛt wɔl rawnd am.

20Wetin de kɔmɔt na pɔsin in mɔt nain de satisfay am, ɛn na bay aw i tɔk am i go si di bɛnifit.

21Dis mɔt, nain de mek, nain de pwɛl; aw yu yuz am, na so yu go bɛnifit.

22Udat gɛt gud wɛf gɛt lɔk, ɛn na blɛsin frɔm PAPA GƆD.

23Wɛn poman de beg, i gɛt fɔ dɔbalɛ; bɔt wɛn di jɛntri man de ansa am, na rɔf wan i de tɔk to am.

24Nɔto ɔl padi na padi, bɔt sɔm padi dɛn de we pas brɔda.

← Chapter 17 Jump to: Chapter 19 →