Proverbs 23

Krio (Krio Fɔs Oli Baybul)

← Chapter 22 Jump to: Chapter 24 →

1Wɛn impɔtant pɔsin invayt yu fɔ it, mɛmba usay yu de.

2If yu na pɔsin we awaŋɔt, kɔntrol yu apitayt.

3Nɔ fala yu at, sɔntɛm na trap i sɛt fɔ yu.

4Nɔ kil yusɛf yu de fɛn jɛntri, tek tɛn fɔ du am;

5bikɔs, sɔntɛm we yu dɔn gɛt am dɔn, ɔl kin flay lɛkɛ briz, dɔn yu lɔs ɔltin.

6Nɔ go it na krabit man in os, nɔ fala yu at pan in it.

7I go put yu insay se lɛ yu it, bɔt i go de wach yu fɔ si aw yu de it.

8If yu bin ebul fɔ rid in at, yu go want fɔ vɔmit in it ɛn rigrɛt sɛf we yu tɛl am tɛnk.

9Nɔ wes yu tɛm de kɔrɛkt fulman, i go kɔs yu ɛn laf yu.

10Nɔ pul ɛni ol bekin we dɛn bin dɔn put, ɔ go kapu dɛn wan we nɔ gɛt papa dɛn land,

11bikɔs PAPA GƆD gɛt trɛnk ɛn i go fɛt yu fɔ dɛn.

12Lisin to di advays we dɛn de gi yu, ɛn nɔ fɔgɛt wetin dɛn tɛl yu.

13Nɔ fred fɔ disiplin pikin, if yu flag am wit ratlan i nɔ go day.

14Infakt if yu flag am nain layf yu de sev.

15Mi pikin, if yu gɛt sɛns, misɛf, sɛf yon at go gladi.

16Mi ed go big we a yɛri yu de tɔk sɛns.

17Nɔ jɛlɔs nɔn bad mɔtalman, liv yu layf fɔ de ɔna ɛn rɛspɛkt PAPA GƆD.

18Ɛn wɛn yu du dat di tumara go fayn fɔ yu.

19Mi pikin, yɛri wɔd ɛn biev yusɛf, nɔ mek natin kɔnfyus yu na layf.

20Nɔ miks wit drɔnk kabudu, ɔ bigyay ɛn awaŋɔt mɔtalman dɛn,

21drɔnkɔman o, bigyay man o, ɛn awaŋɔt man o, dɛn ɔl gɛt fɔ day po, ɛn udat de drɔŋɔ ɛn kɔlik, na pisis go lɛf nain bɔdi.

22Lisin to yu papa we bɔn yu ɛn nɔ fɔgɛt fɔ mɛn yu mama we i ol.

23Nɔ skyad fɔ spɛnd fɔ lɛ yu no di tru ɛn we yu gɛt am, nɔ mek bigful te yu lɔs am, ɛn tray fɔ lan, no wetin rayt frɔm rɔŋ, ɛn ɔndastand wetin yu de du.

24Papa de ɔltɛm gladi wɛn in pikin liv raychɔs layf, ɛn if pɔsin bɔn pikin we gɛt sɛns, in ed de big.

25Pikin fɔ de mek in mama ɛn papa gladi; nɔ fɔgɛt fɔ de mek yu mama we bɔn yu gladi.

26Mi pikin, pe atɛnshɔn to wetin a de tɛl yu, tray fɔ de fala mi ɛgzampul.

27Rare gyal fiba dip, dip ol, ɛn bambot mared uman tan lɛkɛ bad trap.

28Dɛn kin de ayd na kɔna lɛkɛ am rɔba ɛn mek bɔku man tɔn plebɔy.

29Na udat kin alaki ɛn gɛt bɔku yagba? Udat lɛk fɔ de sɛt gbosgbos ɛn agyu? Udat kin gɛt brusbrus nain bɔdi we nɔbɔdi nɔ fɛt am? Udat in yay kin rɛd lɛk faya?

30Na dɛn wan we de drɔŋɔ ol nɛt; dɛn wan we de miksɔp ɔlkayn rɔm na dɛn bɛlɛ.

31Nɔ put yu yay pan di rɛd we di wayn rɛd na di bɔtul lɛk aw i de bɔbul insay di glas, ɛn nɔ de bɔn di trot we i de go nɔ dɔŋ;

32Wɛn i dɔn dɔn wit yu, i go tan lɛk fɔ se na bad snek bɛt yu, wit in pɔyzin.

33Yu yay go bigin de dɔl, ɛn yu go de si tin tu, tu; yu nɔ go de tink kɔrɛkt wan, ɛn wetin yu nɔ want tɔk nain yu go de tɔk.

34Yu go de fil ay lɛk fɔ se na tot dɛn tot yu; yu go jɛs de go rawnd ɛn rawnd;

35yu go de tɔk se, “dɛn nak yu, bɔt yu nɔ fil am; dɛn bit yu, bɔt yu nɔ mɛmba natin. Infakt sɛf wɛn yu wek yu go drink mɔ.”

← Chapter 22 Jump to: Chapter 24 →