Proverbs 27

Krio (Krio Fɔs Oli Baybul)

← Chapter 26 Jump to: Chapter 28 →

1Nɔ bost bɔt tumara bikɔs yu nɔ no wetin go gɛt fɔ apin.

2Sɔl nɔ de prez insɛf na sup, lɛ ɔda pɔsin prez yu, i lɛk sɛf na trenja.

3Ston ɛn sansan ebi bɔt di trɔbul we fulman kin kɔz pas ɔltu.

4Pɔsin we gɛt wamat ɛn lɛk plaba kin pwɛl in kɔmpin, bɔt jɛlɔs pɔsin wɔs pas am.

5I bɛtɛ lɛ yu kɔrɛkt pɔsin opin wan pas fɔ de ayd se yu lɛk am.

6We yu padi ɔpoz yu na we i lɛk yu, bɔt if yu ɛnimi kis yu mm! Yu fɔ fred.

7Bɛlful man nɔ de luk ɔni sɛf se na it; bɔt udat aŋri, miliju farinya sɛf de tes swit nain mɔt.

8Man we kin de lɛf in os go jɛs tan lɛkɛ bɔd we na so insɛf kin lɛf os go.

9Pafyum ɛn krim de mek pɔsin fil gladi, bɔt wɛn padi tru to yu, i bɛtɛ pas fayn insɛns.

10Nɔ fɔgɛt yu padi ɛn yu papa in padi; wɛn yu gɛt prɔblɛm nɔ se yu de go fɛn fambul fɔ ɛp yu; gud neba bɛtɛ pas fawe fambul.

11Mi pikin, sho se yu gɛt sɛns ɛn mek a gladi, so a go ebul ansa ɛnibɔdi we briŋ fityay to mi.

12Udat gɛt sɛns nain de si denja i ayd pan am, bɔt udat ful de waka go insay de ɛn sɔfa fɔ dat.

13Ɛnibɔdi we so styupid fɔ go tinap se in de pe dɛt fɔ trenja, nain prɔpati dɛn go siz te i pe dɔn.

14Nɔ wek ali mɔnin ɛn bigin ala tɛl yu neba adu dɛn go se yu de was mɔt pan am.

15Uman we lɛk plaba tan lɛk ren we nɔ de kɔt;

16fɔ kɔntrol am tan lɛkɛ we yu de tray fɔ kɔntrol briz, ɔ ol ɔyl wit yu ɛmti an.

17Lɛkɛ aw ayɛn de kɔt ayɛn, na so pɔsin de kɔba pɔsin.

18Yu we plant tik we de bia frut go it di frut, semweso da savant we wok fayn fɔ in masta go gɛt gud nem.

19Wɛn yu luk na wata na yu fes yu de si, semweso wɛn yu luk yusɛf gud insay yu at, na yusɛf yu de si tru tru wan.

20Lɛkɛ aw grev yad ɛn bɛriŋrɔn nɔ de bɛlful, na so mɔtalman sɛf nɔ de satisfay.

21Lɛkɛ aw na faya dɛn de yuz fɔ tɛst gold ɛn silva, na so na bay aw yu biev we pipul prez yu, dɛn go no udat yu bi.

22I lɛk aw yu bit fulman na mataodo lɛk kanda rɛs, di ful nɔ go kɔmɔt pan am.

23Ɛnti yu we de mɛn ship ɛn got no aw dɛn tan, so, mɛn dɛn fayn;

24bikɔs mɔni nɔ de de sote go, ɛn udat de rul sɛf nɔ de rul sote go.

25Wɛn yu dɔn kɔt di gras fɔ di animal dɛn, dɔn nyu gras bigin gro,

26yu go gɛt wul frɔm di ship fɔ mek klos dɔn di got go gi yu mɔni fɔ bay mɔ land;

27yu go gɛt bɔku got milk fɔ drink, yu famili go gɛt bɔku tin fɔ it ɛn yu wokuman dɛnsɛf go gɛt dɛn yon.

← Chapter 26 Jump to: Chapter 28 →