Proverbs 2

Krio (Krio Fɔs Oli Baybul)

← Chapter 1 Jump to: Chapter 3 →

1Mi pikin, lisin to wetin a de tel yu ɛn du wetin a se.

2Lisin to ɛni sɛns tɔk ɛn tray fɔ de ɔndastand,

3aks fɔ lɛ yu go sabi; beg fɔ lɛ yu ɔndastand tin we gɛt dip dip minin.

4Tray yu bɛst fɔ gɛt sɛns lɛkɛ aw nɔmɔ dɛn kin dig fɔ fɛn silva ɔ ɛnitin we gɛt valyu.

5If yu du dat yu go no wetin i min fɔ fred PAPA GƆD, ɛn yu go no bɔt PAPA GƆD.

6Na PAPA GƆD de gi sɛns; nain de mek pɔsin no bɔt sɔntin ɛn ɔndastand gud wan.

7I de gi udat tret pawa fɔ gen viktri. I de kɔba dɛn wan we nɔ de pan bɛnbɛn.

8I de kɔba dɛn wan we de trit dɛn kɔmpin fia wan, ɛn sev dɛn wan we biliv pan am ɛn de obe am.

9If yu lisin to mi, yu go no aw fɔ du tin tret wan, wetin gud ɛn aw fɔ trit pɔsin fia wan. Yu go no wetin fɔ du.

10Bikɔs sɛns go de insay yu ed, ɛn di pawa fɔ sabi sɔntin go mek yu gladi,

11yu go gɛt pawa fɔ de si fa ɛn ɔndastand,

12ɛn dat go mek yu nɔ du di rɔŋ tin. I go kɔba yu frɔm dɛn mɔtalman we na fɔ tɔk bad tin nɔmɔ dɛn sidɔm fɔ,

13ɛn dɛn nɔ de waka na di rayt rod, na fɔ du bad nɔmɔ dɛn de fɔ.

14Dɛn kin gladi fɔ du bad ɛn de ɛnjɔy di bad we dɛn de du.

15Dɛn pipul ya, nɔ fɔ trɔs dɛn bikɔs dɛn gɛt bɛnbɛn.

16If yu gɛt sɛns nɔn rare gyal nɔ go tɔn yu to rederaun. Nɔn lus gyal sɛf nɔ go tek in swit mɔt waka pan yu sɛns,

17afta we i dɔn lɛf in man ɛn fɔgɛt se in bin dɔn mek vaw to PAPA GƆD.

18If yu go nain os, na day rod yu de waka ɛn na ɔdɔun yu de fɛn.

19Ɛnibɔdi we go to am nɔ wan bɛtɛ, infakt sɛf nain layf i nɔ de tɔn bak wit.

20Na gud pipul yu fɔ de falamakata, ɛn yu go de du tin tret wan.

21Na udat de waka tret go de na di land, wit di wan dɛn we de du di rayt tin,

22bɔt as fɔ di bad wan dɛn, PAPA GƆD go pul dɛn kɔmɔt na di land, ɛn dɛn wan we nɔ bɛtɛ i go rut dɛn lɛkɛ plant.

← Chapter 1 Jump to: Chapter 3 →