Proverbs 7

Krio (Krio Fɔs Oli Baybul)

← Chapter 6 Jump to: Chapter 8 →

1Mi pikin, mɛmba ɔl wetin a de tɛl yu ɛn nɔ fɔgɛt natin we a tɛl yu fɔ du.

2Tek wetin a de tich yu ɛn yu go gɛt lɔŋ layf, ol am gud lɛkɛ se na eg.

3Lɛ ɔl wetin a dɔn tɛl yu de wit yu ɔltɛm, lɛ i de na yu at.

4Lɛ sɛns bi yu sista, ɛn lɛ di pawa fɔ si fa bi yu tayt padi,

5fɔ mek yu nɔ si pipul wɛf, ɛn dɛn uman wit swit mɔt.

6Wande a bin de luk winda,

7nain a si bɔku yɔŋ pipul we nɔ gɛt wan ɛkspiriɛns; bɔt a notis wan patikla wan we in ful bad, bad wan.

8I bin de waka kɔna na wan trit usay wan patikla uman in os bin de.

9Da tɛm de na tɛm we lamp bin dɔn layt, infakt nɛt sɛf bin dɔn kam.

10Nain di uman go mit am, i drɛs lɛk rare gyal; i bin de plan sɔntin.

11Na uman we gɛt maynd ɛn nɔ gɛt wan shem. Ɔltɛm i de na trit.

12Infakt wan minit i de na trit, wan minit i de na makit, ɔda minit i de na dɛn kɔna de ɛŋ de.

13Wantɛm nain i grip dis bɔy ɛn kis am. Wit dray yay i luk di bɔy pin nain yay ɛn tɛl am se,

14in mek sakrifays to PAPA GƆD da de de fɔ du wetin i prɔmis ɛn bɔku tin de nain os fɔ it.

15I se in bin de luk fɔ am ɔl di tɛm, ɛn in dɔn si am.

16I se in dɔn prɛd fayn bedshit nain bed we i ɔda frɔm Ijipt,

17ɛn in dɔn spre fayn, fayn ma, alo ɛn sinamɔn pafyum,

18so, lɛ dɛn go mek lɔv ol nɛt te do klin, lɛ dɛn ɛnjɔy dɛnsɛf.

19I se infakt sɛf in man nɔ de, i go patrol;

20I se in man kɛr wan bag mɔni go, ɛn na tu wik i go fɔ.

21I yuz in swit mɔt fɔ gɛt di bɔy, ɛn insɛf wɛr nain trap.

22I nɔ tink sɛf, nain i fala am go lɛkɛ we dɛn de kɛr ship fɔ go kil am, jɛs lɛk aw dia kin fɔdɔm na trap

23te dɛn chuk in gɔt wit aro; lɛk bɔd nɔmɔ we de fɔdɔm na trap, we nɔ no se nain layf i de risk.

24Una dɛn bɔypikin, una lisin to mi, una yɛri wɔd.

25Una nɔ mek dis kayn uman win una lɔv, una nɔ go in we.

26Na biɛn am bɔku man dɔn alaki ɛn i dɔn mek bɔku dɔn lɔs dɛn layf.

27If yu se nain yu de fasin, wɛl, na shɔt kɔt yu de fɛn fɔ go ɔdɔun.

← Chapter 6 Jump to: Chapter 8 →