Micah 1

Luganda (BIBU1) (BIBULIYA ENTUKUVU)

Jump to: Chapter 2 →

1Ekigambo ky'Omukama ne kijjira Mika ow'e Moreseti mu mirembe gya bakabaka ba Yuda: Yotamu, Akazi ne Kezekiya, kye yawulira bwe yalabikirwa ku Samariya ne ku Yeruzaalemu.

2Muwulire, mmwe amawanga mwenna, mutegereze, ggwe ensi na bonna abagirimu, Omukama Katonda y'aba abalumiriza, Omukama ng'ayima mu Kiggwa kye ekitukuvu.

3Wuuyo Omukama ajja ng'ava mu kifo kye, akkirira, alinnyirira ebifo ebigulumivu eby'ensi.

4Ensozi wansi we zisaanuuka, ebiwonvu biryebukamu ng'envumbo awali omuliro, ng'amazzi agakkirira akaserengeto.

5Ebyo byonna bya kubaawo olw'omusango gwa Yakobo n'ebibi by'ennyumba ya Yisirayeli. Omusango gwa Yakobo guluwa? Si Samariya? Ate omusango gwa Yuda guluwa? Si Yeruzaalemu?

6“Samariya ndikifuula kifulukwa, nnimiro awasimbibwa emizabbibu. Amayinja gaakyo ndigayiringisiza mu kiwonvu, emisingi gyakyo ne ngireka nga myereere.

7Ebifaananyi byakyo byonna ebya balubaale biriseseggulwa, empeera yaakyo yonna eryokebwa omuliro, ebifaananyi byakyo byonna ebya balubaale ndibizikiriza; kubanga kyekuŋŋaanyizanga empeera mu bwamalaaya, empeera gye baggya mu bwamalaaya gye bajja okubeera.”

8Kyendiva nkungubaga ne nkuba ebiwoobe, ne ntambuza bigere bikalu nga ndi bwereere, ne mpowoola ng'ekibe, ne mpunuuna ng'ekiwuugulu.

9Kubanga ekiwundu kye si kya kuwona, kituuse ne ku Yuda, kituukidde ddala ku mulyango gw'abantu bange, ku Yeruzaalemu kwennyini.

10Temukirangirira mu Gati, temukaaba maziga; mu Beti-Ofura mwevulunge mu nfuufu.

11Abatuuze b'omu Safiri, muyiteewo nga muli busa nga n'ensonyi zibatta; abasula mu Zaanani, tebafulumanga; Beti-Yezeli ali mu kukuba biwoobe, akuggyeko obukuumi bwe.

12Abasula mu Meroti bakabirirwa nga beesunga ekirungi, kubanga akabi kakkiridde nga kava ew'Omukama ne katuuka ne ku mulyango gwa Yeruzaalemu.

13Abasula mu Lakisi, embalaasi muzisibe ku bigaali. Mmwe mwali entandikwa y'ekibi kya muwala wa Siyoni, kubanga emisango gya Yisirayeli gyasangibwa mu ggwe.

14Kyoliva owaayo omutwalo olwa Moreseti-Gati. Ennyumba ya Akuzibu eriba kiguumaaza eri bakabaka ba Yisirayeli.

15Mmwe abasula mu Maresa, ndibawendulira anaabawangula, oyo ekitiibwa kya Yisirayeli alijja e Adullamu.

16Muwalakate emitwe gyammwe, musale enviiri; olw'abaana abaali essanyu lyammwe; mwemwe ebiwalaata ng'ensega, kubanga bajja kubavaako bagende mu busibe.

Jump to: Chapter 2 →